Keriekitho 4 - Angami Naga CL (Re-edited) Bible (BSI)

Kain mu Abel

¹ Siro Adam puo kimia Iv ze kesiwa, ru puo nuonipfülie sidi Kain penuolie tse puoe, Jihova a khruohishü di a nuo thepfunuomia puo nguliete idi puo za thopie Kain chülie.

² Süsie rei puo kimiae Kain siezeu Abel penuo lalie. Siro Abel tekuo peri, mu Kain lieciemia puo chüta.

³ Si tuo ru Kain-e puo lieyie nunu puosi se vor ruosuo chüpie Jihova tsü,

⁴ mu Abel liro puo kuoko donu nuorieko se vor di süko geinu puoshuo kevithoko se ruosuo chüpie Jihova tsü. Sitse Jihovae Abel mu puo ruosuo rei ngu puo neilie,

⁵ derei puo Kain mu puo ruosuo rhu mota. Sitse Kain puo nei mo seta, di puo nou kemeyiepfü puo dzüshie chüta.

⁶ Süla Jihovae Kain üse “No kiüdi n nou meyie mu n dzüshie chüta ga?

⁷ No rei mha puotouu chülie ro, n lielie lho üme? Derei no mha puotouu chülie moro kephouma n kikha ki zhü zo, süu n mengutuo, derei no süu penyülie morosuo.”

⁸ Süsie Kain-e puo siezeu Abel ki, “Avu lie nu tsu khe,” si. Hai di unie tsu lie nu ketuo ki Kain-e puo siezeu Abel gei puo nei mo sier di puo dukhriwa.

⁹ Sitse Jihovae Kain ki, “N siezeu Abel kirapuo ba ga?” siru puoe sie, “A si mo. A a siezeu kepfheu me?”

¹⁰ Sitse Jihovae “No kedipuo chüwata ga? N siezeu zie-e kijü nu a kiezhüte.

¹¹ Tsie no kijü nunu rüsepfüte ho, süu n dzie nunu n siezeu zie lielietuoü mekuolie.

¹² No lie cieshü rei; kijüu mhapuorei rüchüpie n tsülie lho; n bu kijü nu kitamia mu rühou ketuomia chütatuo.”

¹³ Sitse Kain-e Jihova ki, “Siazha hau a la mesithorte.

¹⁴ Noe kijüu geinu a whuowa di a bu n mhodzüki ba motatuo üzhie. Ae kijü nu kitamia mu rühou ketuomia puo chütatie, mu themia kehoupuorei a ngulie ro a dukhriwatie.”

¹⁵ Derei Jihovae puo ki, “Silie lho! Kehoupuorei Kain dukhriwa ro, sümia gei khepu süde thenie lietuo.” Sidi Jihovae mia puo dukhrikewa keprei la zasi puo chüpie Kain gei shüwa.

¹⁶ Mu Kain Jihova mhinguki nu tuota di vo Iden niathutsa Nod kijü nu lhouta.

Kain Nuosenuoyieko

¹⁷ Kain puo kimia siwa, mu hapfüe nuonipfülie di Inok penuolie. Süsie Kain nadi puo chülie di puo nuo Inok za pie nadi süu za tholie.

¹⁸ Siro Inok nuou Irad, mu Irad nuou za Mehujael mu Mehujael nuou za Methushael mu Methushael nuou za liro Lamek.

¹⁹ Siro Lamek puo kimia kenie nyi, unie za liro Ada mu Zila.

²⁰ Ada geinu Jabal penuolie, puoe pfheki nu lhou di perinuo periyakezhako krüu chü.

²¹ Siro puo siezeu za liro Jubal, puoe lyre mu luoü seyakezha ü kechümiako krüu.

²² Zila geinu Tubal-kain penuolie, puoe mese mu thegi dapie mhanya neiüko rükrei se parkeshüu. Tubal üpfü za ro Nama.

²³ Siro Lamek-e puo kimianie ki: “Ada mu Zila nnie a pfhe rünyüshücie; Lamek kimianie, a kepu rünyüshücie: mia puo a vü kerüzakeshü la a puo dukhriwa, khriesamia puo a pechükeshü la.

²⁴ Kain dukhrikewa la kerheiro thenie lietuo üro a dukhrikewa sie kerheiro hietheniethenie lietuo.”

²⁵ Adam puo kimia si lawa, mu süpfü thepfu puo penuolie. Sitse puo kimiae süze “Ukepenuopfüe Kain bu puo dukhrikewa Abel sou nu a nuo thepfu puo kha lashüte” idi puo za pie Seth tholie.

²⁶ Seth rei puo nuo thepfu puo ngulie di puo za pie Enosh tholie. Ha mese kinu themiae Jihova za kie sedete.