Keriekitho 38 - Angami Naga CL (Re-edited) Bible (BSI)

Juda mu Tamar Dze

¹ Siro Judae puo siezedzürieko kinu tuota di vor Adulammia Hira ücü puo khieki lhouta.

² Sünu Kananmia Shua ücüpfü puo ngushü; ru puo süpfü lielie, di puo ki vowata.

³ Süpfü nuonipfülie di thepfumia puo penuoshü, ru puo puo za thopie Er chülie.

⁴ Süsie rei süpfü nuonipfü lalie di thepfumia puo penuoshü mu hapfü puo za thopie Onan chülie.

⁵ Süsie rei puo nuonipfü lalie di thepfumia puo penuo lashü, ru hapfü puo za thopie Shela chülie. Puoe hau penuokelie ki Kezib nu ba.

⁶ Sitse Judae puo nuo nuorieu Er la thenu puo lieshü puo tsü, mu süpfü za Tamar.

⁷ Derei Er, Juda nuorieu, Jihova mhodzünu ziezhü mota, süla Jihova puo pesiawa.

⁸ Sitse Juda Onan ki, “No n dzürieu kimia ki vocie, sidi puo nupfu siezeu mhathoko chüpie puo gei shüwalie, sidi n dzürieu tsia pelhoushüliecie.”

⁹ Derei Onan-e puo yieu puo vielie lhokecü si, süla puo puo dzürieu kimia ki vocü ki puo phoudzüu vapie kijü shüwa, puotsiau khapie puo dzürieu tsüwa moketuo la.

¹⁰ Mu Jihova puo mhatho süu puo nei mo; süla puoe puo rei pesiawa.

¹¹ Sitse Judae puo miepfü Tamar ki, “No n puo kinu sami balie, a nuou Shela phichülie kemochie,” puoe puo rei puo dzürienie tuoi di siaketa keprei la. Süla Tamar vo di puo puo ki lhou tuota.

¹² Si keba teiu nu Juda kimia Shua nuopfü siata, mu Juda thekrü chü tseikewa sie, Timna nu puo kuomie kebeko ki kho, Adulammia puo zeu Hira unie.

¹³ Sitse mia Tamar ki, “N meiu puo kuomie betuo üdi Timna nu khozhie ho.”

¹⁴ Sitse puo puo geinu puo sami pfheneiko rhuowa, mu puo tsüdzeu pie puo yapfülie, di Enaim kharuu nu balie, süusü Timna nu kevo chau nu ba; puoe Shela phichülieta zorei puo bu puo ki nyi kemo ngu batacü la.

¹⁵ Siro Juda puo ngu tse, süpfüü thethenumia ücü leta, süpfüe puo zie dzepfülieketa la.

¹⁶ Sitse puo tuo cha khie hapfü ki vo di sie puo ki, “Vor di, a bu n ki vocie,” ishü. Puo hapfü üse puo miepfü ücü si kemo la. Sitse süpfü puo ki, “N bu a ki lelieketuo la, no kedipuo se a tsü ta?”

¹⁷ Sitse puoe süpfü die kela di “A temvü kro nunu temvünuo yopuo ketseshütuo,” sitse süpfüe sie, “No süu ketseshü kemo ki, mhapuo a ki phrashülietuo nyü?”

¹⁸ Sitse puoe sie, “A bu mha kikecüpuo phrashü n tsü ta?” ru süpfüe sie, “N zasi mu n ro-u, tsiu n dzie nu ketuo n theu liecie.” Süla puo süko khapie süpfü tsüwa, di puo ki lewa, mu süpfü puo geinu nuonipfülieta.

¹⁹ Süsie süpfü sielie di tuota, di puo geinu puo zie keyau biewa, di puo sami pfheneiko se lalie.

²⁰ Siro Judae thenupfü dzie nunu puo phrakeshüko lie lalietuo üdi puo zeu Adulam-u dzie nunu temvü yopuo ketseshü, derei süu süpfü pfhü pejüta.

²¹ Süla puo thechü sünu themiako ketso di sie, “Enaim nu kevo cha khieki keba rüsuoki thethenupfü kirapuo ba ga?” Sitse uko sie, “Hanu thethenumiapfü puorei ba vor mo.”

²² Sitse puo Juda ki la vo di, “A puo ngulie mote, mu sünu keba themiako rei, ‘Thethenumia puorei hanu baya mo,’ itelie.”

²³ Sitse Judae sie, “Süpfü thuo süko se batalie, moro avu mia krenyü chütatie ru, a temvüyo ketseshü derei puo ngulie mote.”

²⁴ Thekhrü se mese sie nu mia Juda ki, “N miepfü Tamar we thetheliewate; sizomonyü puoe thethe lie di nuonipfü tuote,” idi pushü. Sitse Juda sü sie, “Puo ze vorlie, di puo thewalie.”

²⁵ Mu mia puo ze vorkezhü ki puo die ketsepie puo meiu ki shü di pucü, “Mha hako niepuu geinu, a nuonipfü ba ücü siliecie,” sidi süpfüe sie, “A n ki chaya, hako supuo vie shi mehoshücie, zasiu, kero-u mu ketheu.”

²⁶ Sitse Judae süko silie di sie, “Hapfüe a ki miathokuo, ae a nuou Shela pie puo tsü kemo la eru.” Sidi puoe süpfü zezhü sa mota.

²⁷ Siro süpfü nuoze tei vorlie tse, nuobi puo va nu tuo di ngulie.

²⁸ Siro puo nuonuovachü chü vor tse, puo nuo yopuo puo dzie se par; sitse nuoze kethekepfüe sü pielie di kelo kemerie puo pie sügei phashü di sie, “Hau par rie.”

²⁹ Derei puoe puo dzie teshü la leta, harie, puo dzürieu parte; süla süpfüe sie, “No n thuo hai di mha pfüpha parta ze?” Sidi puo za thopie Perez chülie.

³⁰ Süsienu puo siezeu par, mu puo dzie nu kelo kemerie puo tuo; mu puo za thopie Zera chülie.