Keriekitho 36 - Angami Naga CL (Re-edited) Bible (BSI)

Esau Nuosenuoyieko

¹ Siro hako Esau nuosenuoyieko (Edom ücüu).

² Esau Kananmiapfü liete: Hitmia Edom nuopfü Ada, Hitmia Zibeon nuou Ana nuopfü Oholibama.

³ Siro Ishmael nuopfü Basemat, Nebaiot üpfü.

⁴ Adae Elifaz penuoshü Esau tsü; mu Basemat Reuel penuoshü;

⁵ mu Oholibamae Jeush, Jalam mu Kora penuoshü. Hako Esau nuonuo Kanan kijü nunu penuoshü puo ketsüko.

⁶ Süsie Esau sie puo kimiako, puo nuonuoko, puo nuopfüko tsiu puo kinu tsüphrü peteko, puo kiriko, khurinuo pete mu Kanan nunu puo nyaüra ngukelie pete selie di Jakob keba kijüu nunu tuota.

⁷ Unie vieko krathor di keze balie suoketa la; siro unie dopuo vor kebachüu unie khuriko la tsata.

⁸ Süla Esau Seir kijüthou gei lhouta, Esau sü Edom zo.

⁹ Siro hako Seir kijüthou gei Edommia pfutsau Esau seüyieko:

¹⁰ Hako Esau nuoko za: Esau kimia Ada nuou Elifaz, Esau kimia Basemat nuou Reuel.

¹¹ Siro Elifaz nuokoe Teman, Omar, Zefo, Gatam mu Kenaz.

¹² (Timnae Esau nuou Elifaz pelipfü, mu puo Amalek penuoshü Elifaz tsü.) Hako Esau kimia Ada nuoko.

¹³ Hako Reuel nuoko: Nahat, Zera, Shama mu Miza. Hako Esau kimia Basemat nuoko.

¹⁴ Siro hakoe Esau kimia, Zibeon nuou Ana nuopfü Oholibama nuoko, puo Jeush mu Jalam tsiu Kora uko penuopie Esau tsü.

Edom Chienuoko mu Kediko

¹⁵ Hako Esau nuonuo chienuoko: Esau nuo nuorieu Elifaz nuoko: chienuoko liro Teman, Omar, Zefo, Kenaz

¹⁶ Kora, Gatam mu Amalek: hako Edom kijü nu Elifaz geinu kevor chienuokowe; süko Ada nuoko.

¹⁷ Hako Esau nuou Reuel-nuoko chienuoko: Nahat, Zera, Shama mu Miza; hako Edom kijü nu Reuel gei kevor chienuoko; mu Esau kimia Basemat nuoko.

¹⁸ Siro hako Esau kimia Oholibama-nuoko chienuoko: Jeush, Jalam mu Kora; hako Esau kimia Ana nuopfü Oholibama geinu kevor chienuoko.

¹⁹ Hako Esau (süu Edom) nuoko mu hako uko chienuoko.

Seir Nuosenuoyieko

²⁰ Hako sünu kelhoumia Hormia Seir nuoko: Lotan, Shobal, Zibeon, Ana,

²¹ Dishon, Ezer mu Dishan; hako Hormia chienuoko: Edom kijü nu Seir nuoko.

²² Lotan nuonie liro Hori mu Heman; tsiu Lotan üpfüe Timna.

²³ Hako Shobal nuoko: Alvan, Manahat, Ebal, Shefo mu Onam.

²⁴ Hanie Zibeon nuonie: Aia mu Ana; Ana ha puo puo gadako theke di rayha nu ketuo ki dzüluoko pfhükelieu.

²⁵ Hanie Ana nuonie: Dishon mu Ana nuopfü Oholibama.

²⁶ Hako Dishon nuoko: Hemdan, Eshban, Ithran mu Keran.

²⁷ Hako Ezer nuoko: Bilhan, Zavan mu Akan.

²⁸ Hanie Dishan nuonie: Uz mu Aran.

²⁹ Hako Hormia chienuoko: Lotan, Shobal, Zibeon, Ana.

³⁰ Dishon, Ezer, Dishan; hako Hormia chienuoko, Seir kijü nu uko chienuo medzi di lekeshü.

Edom nu Kediko

³¹ Hako Israelmia mho kedi puorei dikecü mhodzü Edom kijü nu kedi kechüko.

³² Beor nuou Bela Edom nu kedi chü mu puo rüna nadiu za Dinhaba.

³³ Bela siata, sitse Bozra Zera nuou Jobab puo sou nu kedi chü;

³⁴ Jobab siata, mu Temanmia kijü nunu kevor Husham puo sou nu kedi chü.

³⁵ Siro Husham siata, Bedad nuou Hadad, Moab kijü nu Midian penyükewau, puo sou nu kedi chü; mu puo nadiu za Avit.

³⁶ Hadad siata, mu Masrekamia Samla puo sou nu kedi chülie.

³⁷ Samla siata, mu Eufrat nu Rehobotmia Shaul puo sou nu kedi chü.

³⁸ Shaul siata, sitse Akbor nuou Baal-hanan puo sou nu di.

³⁹ Süsie Akbor nuou Baal-hanan siata; Hadar puo sou nu kedi chü, mu puo nadiu za Pau; puo kimia za Mehetabel puo zuoe Matred, mu süpfüe Me-zahab nuopfü.

⁴⁰ Esau geinu kevor chienuoko za; uko kinumia mu uko lhou kevor thechüko, mu uko zako medzi di chienuoko hako: Timna, Alva, Jethet;

⁴¹ Oholibama, Ela, Pinon,

⁴² Kenaz, Teman, Mibzar,

⁴³ Magdiel mu Iram; hako Edom chienuoko; (süu Esau, Edom puou), uko kelhou thechü mu u vieko lekeshü medzi di.