Keriekitho 35 - Angami Naga CL (Re-edited) Bible (BSI)

Jakob Bethel nu La Kevor

¹ Ukepenuopfüe Jakob ki, “Sielie, Bethel nu volie, di sünu lhoutalie, sidi sünunu ruosuoba puo chüpie, no n dzürieu Esau kinu ta kevor ki n pengukeshüu Kepenuopfü tsüliecie.”

² Süla Jakob sie puo kinuko mu puo ze ketuo kheko üse, “Nieko donu seyie kekreimia rhuoko kha phrewalie, nie chü kemesalie mu nie pfheneiko kedilie;

³ sidi úko sielie di tuo Bethel nu kho khe, siro a sünunu ruosuoba puo chüpie a kemezhiekelie ki a pfhekhokeshüu, mu a kevo cha pete nu a ze ketuou Ukepenuopfü tsüshütuo.”

⁴ Süla uko seyie kekreimia rhuo u dzie nu ketuoko, mu menyie uko nyie nu ketuoko khapie Jakob tsüwa, sitse Jakob-e süko pie Shekem khieki phriebo-u khro nu keviewa.

⁵ Siro uko rüvecha nu, Ukepenuopfüe uko khieümhou keba nadiko bu uko preiketuo puo chüshüwa. Uko bu Jakob nuonuoko whuo molie.

⁶ Sidi Jakob-e Kanan kijü nu keba Luz (süu Bethel) nu vorlie, puo mu puo ze ketuo pete.

⁷ Sidi puo sünunu ruosuoba puo chüshü di thechüu za pie El-bethel chülie. Kekreilamonyü puoe puo dzürieu kinu tatakezhü ki Kepenuopfüe puo pengukeshü la.

⁸ Siro Rebeka kituopfü Debora siata, sidi Bethel khro ki phriebo-u khro nu puo khru; mu thechü süu za pie Alon-bakut chüta.

⁹ Ukepenuopfüe Jakob Padan-aram nu vorkelie ki puo pengu lashü, puo sidi japie puo tsü.

¹⁰ Siro Ukepenuopfü sie puo ki, “N zae Jakob zo; derei n za pie Jakob üdi kie salie lhote, n za bu Israel chütatuo.” Süla puo za Israel üdi kieta.

¹¹ Süsie Ukepenuopfü puo üse, “Ae Kuokejokejü Kepenuopfü we: kruolie mu kra miemieliecie, n geinu seyie puo tsiu seyie kekra siertuo, mu n geinu kediko siertuo.

¹² A kijü khapie Abraham mu Isak ketsüu pie n tsütuo, mu kijü süusü pie n sie n nuosenuoyieko tsütuo.”

¹³ Süsie Ukepenuopfü kinu puo rüchü kethachüu nunu tuo khota.

¹⁴ Mu Jakob-e thechü süu nu tsiese puo seshüwa, di kekrie ruosuo rupie sügei shü mu tier lashü.

¹⁵ Süla Jakob-e Ukepenuopfü puo rüchükecü thechü süu üse Bethel idi kieta.

Benjamin Kepenuo mu Rachel Se

¹⁶ Süsie uko Bethel nunu tuo lashü; mu uko Efrat nu volieketuo petse za baluokecü nu, Rachel-e nuoze vachü chülie, mu puo kechü reta.

¹⁷ Siro puo mhachü kemezhie se keba ki, nuoze kethekepfü puo üse, “Michie hiecie, no tsie thepfumia puo ngu lalietuomu.”

¹⁸ Siro puo ruopfü tuotakezhü ki, (puo siaketa la) süpfü puo za pie Ben-oni chü; derei puo puo we puo za pie Benjamin chü.

¹⁹ Sidi Rachel siata, mu Efrat nu vokezhü cha nunu puo khruwa (süu Bethlehem),

²⁰ tsiu Jakob-e puo mekhru gei tsiese puo seshü; Rachel mekhru gei tsieseu thie ketso rei ba zo.

²¹ Israel-e tuoshü di vo Eder tsiepfhe tse kevo ki nu puo pfheki pethoulie.

Jakob Nuonuoko

²² Siro Israel kijü sünu lhou keba ki, Reuben vo di puo puo pelipfü Bilha ze zhüwa; mu Israel süu sishü. Siro Jakob nuonuo thepfu kerekenie

²³ Leah nuonuoko: Reuben (Jakob nuorieu) Simeon, Levi, Juda, Isakar, mu Zebulun.

²⁴ Rachel nuonie: Josef mu Benjamin.

²⁵ Rachel thekepfü Bilha nuonie: Dan mu Naftali;

²⁶ Leah thekepfü Zilpa nuonie: Gad mu Asher. Hako Jakob nuonuo Padan-aram nu ketuo ki penuoshü puo ketsü thepfuko.

Isak Se

²⁷ Süsie Jakob-e Mamre morei Kiriat-arba (süu Hebron) nu puo puo Isak ki vor, Abraham mu Isak unie solhimia chü di lhou kevor-u nu.

²⁸ Siro Isak-e cie krie puo di hiethethata.

²⁹ Sidi Isak tsata mu teisozha kekra lhoulie, tsiu puo keha thelau chüwa di siata, di puo ze puo themiako ki vota, siro puo nuonie Esau mu Jakob unie puo khruwa.