Keriekitho 34 - Angami Naga CL (Re-edited) Bible (BSI)

Dina Perhukewa

¹ Siro Leah-e penuopie Jakob ketsü nuopfü Dina sü kijü süu nu thenuko ze kesetuoü pra.

² Sitse Hivmia Hamor, thechü sünu kediu nuou Shekem sü puo ngukeshü ki, puo telie di puo kemvü chü puo ze zhüwa. Sidi puo perhuwa.

³ Siro puo noue Jakob nuopfü Dina kitsa tuota; puo rüüpfü khrie mu menuo di süpfü rüchü.

⁴ Sidi Shekem puo puo Hamor ki “Rüüpfü liepie a kimia chüshücie.”

⁵ Siro puoe puo nuopfü perhuwata ücü Jakob-e si bata; derei puo nuonuo thepfuko lie nu periko ze tuo zo, süla uko vor kemochie Jakob-e kemekrie ba zo.

⁶ Sitse Shekem-nuo puo Hamor-e Jakob rüchütuo üdi par.

⁷ Sütei touki Jakob nuonuoko lie nunu vor, sidi uko thedzeu sishü tse, themiako u nou kekrü mu u nou meyie phita, kekreilamonyü puoe Jakob nuopfü ze zhükewa ha Israel nu kenya mhatho puo chüwata zo, sicü chü zhü mo zocü la.

⁸ Derei Hamor uko ki pu di sie, “A nuo Shekem noue n nuopfü mengu bate; puo bu puo ki nyitanu di, a n ki a mezhiemeloya.

⁹ Sidi hie ze kese kerilie; nie nuopfüko pie hie tsü mu hie nuopfüko rei lieliecie.

¹⁰ Siro nie bu hie ze lhou balietuo; mu kijü kha nie tsütuo; süra lhou mu thelhi chülie, tsiu sünunu n vie n ya balie,” ita.

¹¹ Shekem rei thenupfü-nuo puo mu puo prünuoko üse, “A bu nieko mhiki nieko neipfülie üthienyü, mu nieko a ki mhakehoupuo cha rei se nie tsütuo.

¹² Mha cha kenyü de chaliecie, siro a nie kepu de khashütuo; derei rüüpfü pie a ki penyiu penyishü zocie.”

¹³ Siro Jakob nuoko Shekem mu puo puo Hamor se kedowa, kekreilamonyü puoe uko üpfü Dina perhukewa la.

¹⁴ Sidi uko sie unie ki, “Hie mha hau chülie kenjü, hie üpfü khapie zhürekemomia tsülie kenjü, süue hie la thenga mhatho puota zo.

¹⁵ Mha hau nu rübei nieko ze kediekholie kevi zo; nieko rei hieko mhie di thepfumia pete zhürelie üro.

¹⁶ Süsie nu hie nuopfüko kha nie tsü mu hie rei nie nuopfüko lielie, di hie nie ze lhou tsiu úko keze themia puo chülietuo.

¹⁷ Derei nieko zhükere nu hie pfhekholie kemosie, hie nuopfü zelie di tuotatuo.”

¹⁸ Sitse Hamor mu Hamor nuou Shekem unie uko dieu unie medolie.

¹⁹ Sidi khriesau sü mha süu chüketuo kethe mo zo, puoe Jakob nuopfü ngu puo nei zocü la, mu puoe puo kikru nu kekrei pete ki rei therhupfükuo.

²⁰ Siro Hamor mu puo nuou Shekem unie uko nadiu kharu nu vor, di nadiu nu themiako ki pu di,

²¹ “Themia hako u khriethomia zo, süla uko bu u kijü nu lhou di sünunu thelhi chüliecie, mu harie, kijü meyapie uko kelhuo rei chülie vi zhü zo; úko uko nuopfüko lielie, mu úko rei u nuopfüko pie uko ki penyishülie.

²² Siro themiako u ze lhou balieketuoe we hauha chükelie geinu zotuoü ba, keze puo chüketuo la ukoe u zhürekepfü tuoi, u donu rei thepfumiako pete u zhüre morosuo.

²³ Süze uko kiri, uko nyako mu uko khunuoko u vie chüta motuo me? Uko ze kediekho-u kediekholie khe, siro uko u ze balietuo.”

²⁴ Sitse nadiu nu kharuki kepar pete Hamor mu puo nuou Shekem unie die zelie; sidi thepfumia khe u zhürelie, nadiu kharu nu kepar pete.

Dina Prünuoko Uko Üpfü Khepukelie

²⁵ Siro zha se nhie, thepfumiako u zhükere la u gei chü keba ki, Jakob nuo kenie, Simeon mu Levi, Dina prünie, zhiecha unie tse selie di mia le mo keba nu, nadiu nu vor thepfumia pete dukhriwa.

²⁶ Siro unie zhiecha pie Hamor mu puo nuou Shekem dukhriwa, sidi Shekem kinu Dina ze parlie di tuota.

²⁷ Siro Jakob nuo kekreikoe dukhrikewako kinu vor di nadiu pekawa, sükoe uko üpfü perhukewa la.

²⁸ Ukoe süko kuo kroko, u thukroko mu u gadako, nadiu nu kebako mu terha ketuo pete lielieta.

²⁹ Uko kinyi pete, u nuonuo pete tsiu uko nupfünuo pete telie mu kinu keba pete valie.

³⁰ Sitse Jakob-e Simeon mu Levi unie ki, “Nnie kemezhiekecü se a gei vorshüte, Kanan kijü nu kelhouko tsiu Perizko bu a mecülie kevi chüshüte; a we themia tsa, mu mhanuü mia kepekrolie di a ngumvü sier ro, a dukhriwatie, sidi a mu a kikruu pekawatie.”

³¹ Derei unie sie, “Mia bu hienie üpfü üse thethenumia puo mhie zotuo me?”