Keriekitho 33 - Angami Naga CL (Re-edited) Bible (BSI)

Jakob mu Esau Unie Kesekecü

¹ Jakob-e tosie mehoshü ru, harie, Esau vorzhü ngulie, mia krie dia ze di, süla puo nhicuko kezapie Leah, Rachel mu kituopfü nie tsüwa.

² Puo kituopfünie mu unie nuonuoko bu rielie, süsie, Leah mu puo nuonuoko, tsiu Rachel mu Josef bu kenuotholie.

³ Sidi puo thuo uko mhodzü vota; sidi va thenie nuke kijü tsushü di puo dzürieu penuo volie kemochie tuo vor.

⁴ Derei Esau puo ze kesetuo üdi ta vor, sidi puo ciepielie mu puo vo krapfü di puo mebo, tsiu unie krata.

⁵ Siro Esau tosiecü ki thenuko mu nhicuko ngulie sitse puo sie, “N ze ketuo hako suomia ga?” Sitse Jakob sie, “Ukepenuopfü ngukemezhie nunu khapie n kituou ketsü nuonuokolie.”

⁶ Süsie kituopfünie mu unie nuonuoko tuo penuo vor di nerhutsuta.

⁷ Sütuoi Leah mu puo nuonuoko vorlie di nerhutsushü; thela nu Rachel mu Josef unie penuo vorlie di nerhutsushü.

⁸ Sitse Esau sie, “A bu puo kro kekreikrei di ze kesekecü ha no kedipuo le di hai ga?” Sitse Jakob puo die kela di sie, “A niepuu nei chütuo üdi lie.”

⁹ Derei Esau sie, “A siezeu, a kelhuo bawe, n vie kebako bu n vie chü zolie.”

¹⁰ Sitse Jakob sie, “Simowe, a n neipfülie üro, n pezie rei a dzie nunu a mha khakeshüko lieliecie; a n zie kengu ha Ukepenuopfü zie kengu mhieta zo, no rei n nei di a zeliete ru.

¹¹ A n ki chaya, a mha se n ki kevorko lieliecie, kekreilamonyü Ukepenuopfü a ngumezhie phishüte, mu a a kemengu pete nyite.” Sidi pu beitacü puo rei lielie.

¹² Süsie Esau sie, “Úko rüve chau nu tuoshü khe, mu a n mhodzü rielietuo.”

¹³ Derei Jakob sie puo ki; “A niepuu si ba, nhicuko metei mo, siro tekuo mu mithu kroko a ze ketuoko unuonuo nuyacü la a uko ze menuo morosuo; mu mhanuü khunhie puo uko whuo keyieshü ro, thukro pete siatatie ru.

¹⁴ A niepuu bu puo kituou mhodzü votaliecie, sitse periko mu nhicuko chatuo ki ze Seir nu a niepuu ki vor tsolie kemochie a rülili di uko taze vorlietuo.”

¹⁵ Sitse Esau sie, “A bu a ze ketuo themia huo khapie n ze tuotacie.” Derei puo sie, “Kedipuo se sa ta? A bu a niepuu neipfülie üthienyü,” ita.

¹⁶ Süla Esau sünhie puo cha ze Seir nu la vota.

¹⁷ Derei Jakob tuo Sukot nu volie, sidi puo thuo puo la ki puo chülie, mu puo riko la pruko chülie. Süla thechü süu za pie Sukot chüta.

Jakob Vor Shekem Tsokelie

¹⁸ Siro Jakob-e mha kere puorei dzüwa mo di Padan-aram nunu Kanan kijü nu keba Shekem nadiu nu vorlie; sidi nadiu mhodzüki nu razhü chü bata.

¹⁹ Siro puo Shekem-nuo puo Hamor kinu kijü yopuo raka krie puo pie khrükelie nu puo pfheki pethoulie.

²⁰ Siro sükisünu ruosuoba chülie di süu üse El-Elohe-Israel üta.