Keriekitho 29 - Angami Naga CL (Re-edited) Bible (BSI)

Jakob Rachel Ze Kesekelie

¹ Siro Jakob-e rüve se niathutsa kelhou themiako kijü nu vorlie.

² Sidi puo mha mehoshü ru, harie, lie nu dzükhou puo mu tekuokro se süu khieki kezhü ngulie; tekuokroko dzükhou sünunu krieyakezha la. Dzükhou kege ketsie kezha puo.

³ Mu tekuokroko pete vo sünu kengulie ro, kuopfheko vo ketsie ketouwa di dzü pie tekuoko bu krielieya, sidi ketsieu chüpie dzükhouu ge lawawaya.

⁴ Sitse Jakob sie uko ki, “A kezeko, nieko kirapuo nu vor ga?” Uko sie, “Hieko Haran nunu vorwe,” si.

⁵ Puo uko ki, “Nieko Nahor nuou Laban si me?” sishü ru uko “Hieko puo siwe,” ita.

⁶ Süsie puo uko ki, “Puo vi ba zo nhie?” sishü ru uko sie, “Uwe, mu harie puo nuopfü Rachel tekuo ze di vorzhie.”

⁷ Sitse puo uko ki, “Harie, khinhieluo zoluo, kiriko khaketuo tei moluo; nieko vo dzü pie tekuoko bu krielie, di uko bu vo nha cü la tuotacie” sishü.

⁸ Derei uko sie, “Tekuokro pete vor tseilie kemochie silie suolie, sikelie ze dzükhou kege tsieu phou ketoushü di hieko dzü pie tekuoko tsüshüya.”

⁹ Puo uko ze kerüchü ketha nu Rachel-e puo puo kuoko ze di vor; puo süko pfheya.

¹⁰ Sitse Jakob sü puo zuo prüu Laban nuopfü Rachel mu puo prüu kuoko ngushü tse, phi di dzükhou kege tsieu ketouwa, di dzü pie puo zuo prüu Laban kuoko bu krielie.

¹¹ Süsie Jakob-e Rachel meboshü di kra peto parta.

¹² Sidi Jakob-e Rachel ki puoe puo puo seyiemiaü mu puoe Rebeka nuou ücü pushü. Sitse süpfü ta vo di puo puo ki pushü.

¹³ Siro Laban puo üpfü nuou Jakob dze silie tse puo ze kesetuo üdi ta vor, di puo meboshü, sidi puo ze puo kinu vorlie. Jakob-e Laban ki mha hako pete pushü tse,

¹⁴ Laban puo ki, “No sü a ru mu a chü ketho zo.” Sidi puo thekhrü puo sünu puo ze bata.

Jakob Leah mu Rachel Liekelie

¹⁵ Süsie Laban-e Jakob ki, “No a siezedzüriemia üdi n bu methuo a lie chü ba zotuo memu? Kedipuo pie n zha chütuo shi se a ki pushücie.”

¹⁶ Laban-e puo nuo rüümia kenie ba; phichüpfü za Leah mu nhicupfü za Rachel.

¹⁷ Leah mhi zivi phi, mu Rachel-e ngupie menenuoi mu mia neipfü.

¹⁸ Jakob-e Rachel ngu puo nei, süla puo sie, “A n nuo nhicupfü Rachel la cie thenie n lie chüshütuo.”

¹⁹ Sitse Laban sie, “Puo pie mia kekreimia ketsüu ki n ketsü we vikuo, süla a ze batalie.”

²⁰ Siro Jakob-e cie thenie Rachel la mhachü; derei puo süpfü ngu puo neicü la puo mhodzüki süko zha keduo yopuo mhie zo.

²¹ Süsie Jakob Laban ki, “A tei tseite ru a kimia khashü a tsücie, a bu puo ki volieketuo la,” si.

²² Süla Laban-e thechü sünu keba pete kie kengulie di thehe puo chüshü.

²³ Derei thevatie puoe puo nuopfü Leah ze vor Jakob tsüwa; sidi puo bu süpfü ki vowa.

²⁴ Laban-e puo kituopfü Zilpa pie puo nuopfü Leah bu puo kituopfü chülienu di khashü.

²⁵ Süsie teisolie tse, harie, Leah takecü ngulie; süla Jakob-e sie Laban ki, “No a gei chükeshü hau kedipuota ga? A Rachel la n lie chü vor mo me, siro no kiüdi a sewata ga?”

²⁶ Laban sie, “Hauha hie kijü nu chüya molie, phichüpfü mhodzü nhicupfü nyhükecü.

²⁷ Zhadoudo hau bu tseitaliecie, mu no kekreipfü la rei cie thenie a lie chü sa ro khashü n tsütuo.”

²⁸ Jakob-e sikecü chüwa, mu süpfü zhadoudo-u tseita tse, Laban puo nuopfü Rachel khapie puo kimia chüwa.

²⁹ Laban-e puo kituopfü Bilha bu puo nuopfü Rachel kituo chülienu di pie puo tsüshü.

³⁰ Siro puo Rachel ki rei vo, mu puo Leah ki rei Rachel khriekuo, sidi puo teicie kekrei thenie Laban lie chü la.

Pelhoupie Jakob Ketsü Nuonuoko

³¹ Jihovae puo Leah khrie mokecü ngushü tse, Leah nuobvü khrüshü derei Rachel bu nuojüpfü puo chüta.

³² Sidi Leah nuonipfülie di thepfunuomia puo penuolie, mu puo süu za thopie Reuben chülie; puo sie, “Jihova a mezhieko mehoshüte; tsie we a nupfu a khrietatuo.”

³³ Puo nuonipfü lalie di thepfumia puo penuolie ru sie, “Jihova mia a ngumecükecü sishüte, puo süla nuo hau rei kha sapie a tsü zo,” sidi puo süu za thopie Simeon chülie.

³⁴ Siro puo nuonipfü lalie di thepfumia puo penuo lalie ru sie, “Tsie we a nupfu a ze kekutatuo, a thepfumia se penuoshü puo tsüte ru,” sidi puo süu za thopie Levi chülie.

³⁵ Siro puo nuonipfü lalie di thepfumia puo penuo lalie, sitse puo, “Tsie we a Jihova tshetuo,” idi puo nuo za thopie Juda chülie; süsie puo nuoze sa mota.