Keriekitho 28 - Angami Naga CL (Re-edited) Bible (BSI)

¹ Süsie Isak-e Jakob kielie di japie puo tsüshü, mu puo ki pu bei di sie, “N bu Kananpfüko miapuorei lielie lho.

² Sielie, di Padan-aram nu n zuo pfutsa Bethuel kinu volie; sidi n meiu Laban nuonuoko miapfü puo liepie n kimia chüliecie.

³ Kepenuopfü Kuokejokejüu bu japie n tsülie. N chü pekruo mu chü pekrashücie, n bu seyie kekra pfutsau chülieketuo la.

⁴ Puo bu Abraham thejau pie n tsülie, no mu n ze ketuo n nuosenuoyieko pete, sidi n bu rühou ketuo kijüko Ukepenuopfüe khapie Abraham tsüwaketa kijüko pie n vie chülietuo.”

⁵ Sidi Isak-e Jakob ketsewa, mu puoe Padan-aram nu Arammia Bethuel nuou Laban, Jakob mu Esau unie zuopfü Rebeka prüu kinu vota.

Esau Ishmael Nuopfü Liekelie

⁶ Siro Esaue Isak japie Jakob tsüshü di puo ketsepie Padan-aram nu shü di puo bu sünunu thenu lielienukeshü, mu japie puo tsü di puo ki pu bei di “No Kananpfüko miapuorei lielie lho,” ikeshü

⁷ mu Jakob-e puo puo mu puo zuo die ze di Padan-aram nu voketa ngushü.

⁸ Sidi Esaue puo puo mu puo zuo unie Kananpfüko ngu unie nei mo zokecü silie.

⁹ Sitse Esau puo kimia bata zorei Ishmael ki vo di Abraham nuou Ishmael nuopfü Mahalat, Nebaiot üpfü liepie puo kimia chü la salie.

Bethel nu Jakob Mho-u

¹⁰ Jakob-e Beersheba khawa di Harantsa vota.

¹¹ Sidi puo thechü puo nu vorlie di süzhü sünu bata. Kekreilamonyü niaki leketa la. Puoe süki kezhü ketsie puo chüpie puo tsükhe chülie di zelietuoü zhüta.

¹² Sitse puo mho pema mu kheya puo kijü doupie tha, tsiu puo tsüu kho tei tso ba; siro harie, Ukepenuopfü dielieko sügei kho mu ke ba!

¹³ Siro harie, Jihovae puo khieki tha di pucü, “Ae Jihova, n puo Abraham Kepenuopfü mu Isak Kepenuopfü; no zhükecü kijüu, a pie no mu n nuosenuoyie tsütuo;

¹⁴ tsiu n nuosenuoyieko bu kijü nu nyophe mhietuo, sidi n bu niakra mu niathu ketso, peso mu pekhro pete nu tshupfü votatuo; siro no mu n nuosenuoyieko geinu kijü nu ketuo kikru pete bu thejapfütuo.

¹⁵ Harie, a n ze tuo zo, mu n kevo cha pete nu n rüguose tuotuo, sidi n ze la thechü hau nu vorshütuo; a n ki pukeshüko chüshüwa kemochie a n khawalie lho zocü la.”

¹⁶ Sitse Jakob-e keze nunu cosier di pukecü, “Jihova thechü hanu ba tou zo mu a süu si tuo mo.”

¹⁷ Siro puo michieta di sie, “Thechü hau u ngo za! Hauha Ukepenuopfü ki kemo puorei mota zo, mu hauha teigei kharuuta zo.”

¹⁸ Siro Jakob khiserüna sielie di puo tsükhe chüpfü kezhü ketsieu chülie di süu doupie tsiese puo chüshü, sidi tier lapie süu tsüle gei shü.

¹⁹ Sidi puo thechü süu za thopie Bethel chüwa; sümhodzü we nadi süu üse Luz üya.

²⁰ Süsie Jakob rüse di sie, “Ukepenuopfü a ze tuo, mu a kevo cha nu a rüguo se tuo liro, tsiu thiethie va niekhrüda se a tsü siro dziemeneiketuo la pfhemenei se a tsü üliro,

²¹ a bu vi di a puo kinu la vorlie üro, a Jihova pie a Kepenuopfü chütuo.

²² Tsiu a ketsie hau pie tsiese puo chü di sekeshüu bu Ukepenuopfü ki chütuo, mu no mha kha a ketsü peteko nunu a ker-zapuo pie n tsü petuo zotuo.”