Keriekitho 27 - Angami Naga CL (Re-edited) Bible (BSI)

Isak Japie Jakob Ketsü

¹ Isak-e tsata mu puo mhi merü di mha ngu moketa ki, puo nuo phichüu Esau kieshü di puo ki, “A nuo,” siru puo sie, “A haki bawe.”

² Isak sie, “Harie, ae tsate; a se zha si mote.

³ Süla no tsie n rünyieko, n theütsie bouko mu theü selie di nha nu tsucie di chügei se vor a tsücie.

⁴ Sidi a neiyakezha, gacha chülie di se vor a bu cü di a siaketa mhodzü a bu japie n tsüshüketuo la.”

⁵ Rebekae Isak puo nuo Esau rüchü keba ki unie die rünyü ba. Süla Esau chüwhuo di se vortuoü nha nu tsuketa ki,

⁶ Rebeka puo nuo Jakob ki, “N puoe n dzürieu Esau ki,

⁷ ‘Nhachü se vorlie di cü kevi mhacha chüpie a bu cücie, a bu siaketa mhodzü Jihova mhodzünu japie n tsüshüketuo la’ ikeba a si ho.

⁸ Süla a nuo, tsie a die ze di a n ki pukeshü chüliecie.

⁹ Khunuo kro nu vo di temvünuo puo phou kevi kenie se vorlie, siro a n puoe puo neiyakezha gacha chü puo tsüshütuo;

¹⁰ mu n bu se vo n puo tsütuo, sidi puo bu cülie di puo se mhodzü jashü n tsütuo.”

¹¹ Derei Jakob sie puo zuo Rebeka üse, “Harie, a dzürieu Esaue puomie kenyi puo, mu a we themia kemeju puoe.

¹² Mhanuü a puoe a kese di a puo seketuo silie ro, theja monyü rüse se vor a gei shülietatie.”

¹³ Puo zuo sie puo ki, “rüseu bu a gei vortacie, a nuo a die ze di vo sünie se vorlie.”

¹⁴ Süla puo vo di sünie se vor puo zuo tsüshü; mu puo zuoe puo puo neiyakezha gacha chülie.

¹⁵ Süsie ki nu puo nuo phichüu Esau pfhenei kevithoko chülie di pie Jakob bu selie.

¹⁶ Siro khunuo zhü lopie puo dzienie mu puo vo kemeju gei rei dashü.

¹⁷ Sidi puoe kesekelie cü kevi gachau mu niekhrüda khapie puo nuo Jakob dzie nu shüshü.

¹⁸ Sitse Jakob-e puo puo ki vo di sie, “A Puo” ishü; ru puoe sie, “A haki bawe, no supuo ga, a nuo?”

¹⁹ Jakob sie puo puo ki, “Ae n nuo nuorieu Esau we, no a ki kepu kemhiei chüliete; tsie sielie di a chügei cülie di, n bu jashü a tsüketuo la se tuolie.”

²⁰ Derei Isak sie puo nuou üse “A nuo kedipuo mhie di mha ngu mhailiete mu?” Puo sie, “Jihova n Kepenuopfü a bu khriekelie la zemu.”

²¹ Sitse Isak sie Jakob ki, “A nuo phircie, a bu n keseshüketuo la, no a nuo Esau tou zo mo mo shi silieketuo la.”

²² Süla Jakob-e tuo puo puo Isak penuo phi, ru puo puoe puo kese di sie, “Puo pfhe we Jakob pfhe, derei puo dzie we Esau dzie ze.”

²³ Sidi puo silie mota, kekreilamonyü puo dzienie-e puo dzürieu Esau dzie tuoi puo mie nyiketa la; süla puo japie puo tsüwa.

²⁴ Isak sie, “No a nuo Esau tou zo mo?” puo sie “N zo,” si.

²⁵ Süla puo sie, “Süu se phirshücie, a bu a nuo chügeichüu cülie di jashü n tsüketuo la.” Süla puo süu se puo penuo phishü di puo bu cülie; siro puo khubedzü se vorshü ru puo krielie.

²⁶ Süsie puo puo Isak-e sie puo ki, “A nuo, penuo phir di a meboshücie.”

²⁷ Süla puo puo penuo phi di puo meboshü, ru Isak-e puo pfhenei thengu di jashü puo tsü di sie, “Harie, a nuo re sü, Jihova japie ketsü lieu re mhielie!

²⁸ Ukepenuopfü bu teigei thezeiu se n tsücie, tsiu telha mu khubedzü ketshukelhuo kechü.

²⁹ Themiako bu n theke chücie, tsiu seyieko bu tsu n kelucie. N siezedzürieko mhokezha chücie, mu n zuo nuonuoko bu tsu n kelucie. N kerüse kehoupuo bu rei rüsepfücie, mu ja n ketsü kehoupuo bu rei thejapfücie!”

Esau Theja Pejükewa

³⁰ Siro Isak-e japie Jakob tsü tseiwa di Jakob-e puo mhodzü nunu tuo prata mumetha puo dzürieu Esau sü chüwhuoketuo nunu vorlie.

³¹ Sidi puo rei ga chapie cü vi selie, di se puo puo ki vor. Sidi puo puo ki, “A puo bu sielie, di puo nuou chügeichü cücie, n bu jashü a tsüketuo la.”

³² Sitse puo puo Isak sie puo üse, “No supuo ga?” Puo sie, “A n nuo, nuorieu Esau lie.”

³³ Sitse Isak pekhrukhru di sie, “Di siro no vor kemonu khunuo chügei üdi chase vor a bu cülie mu a bu japie puo tsüwaketau supuo ga? Uwe, puo thejapfülieta zotuo!”

³⁴ Esau sü puo puo die sikelie ki kra meleimekuoi di sie, puo puo ki, “Jashü a rei tsü zocie, a puo,” ita.

³⁵ Derei puo sie, “N siezeu vor a sewa di n thejau sete.”

³⁶ Esau sie, “Puo za thopie Jakob chü toulie mo üme? Puo tsieu va sa va kenie a selieketa la. Puo a phichüzhau lielie, mu harie, tsie we a theja rei lieliete.” Sidi puo sie, “No a la theja puorei khapie ba mote me?”

³⁷ Isak-e Esau üse, “Harie, a puo bu n niepu chüketuo chüwate, siro puo siezedzürie pete bu puo kituo chüketuo a kha puo tsüwate, tsiu a telha mu khubedzü kha puo khruohishüwate. A nuo, a bu n la kedipuo chü salietuo mu?”

³⁸ Süsie rei Esau sü puo puo ki, “No theja puo rübei bacü zo me? Japie a rei tsü zocümu, a puo.” Sidi Esau sü puo pfhephra di kra bata.

³⁹ Sitse puo puo Isak sie puo ki: “Harie, n bu kijü kekruoko nu lhou motatuo mu tei peso geinu thezei khashüyakezha n ketsüko nu lhou motatuo,

⁴⁰ Siro zhiecha se di n bu lhoutuo, mu no n siezeu theketuo; derei no puo petsou kesie nhie we, n vo gei puo vocieu lhouwatuo.”

Jakob-e Esau Nouyie Therhieketa

⁴¹ Süsie Esaue puo puo japie Jakob tsükewa thejau la Jakob ngumecüta, süla Esaue puo thuo puo rüchü di sie, “A puo la thekrü chüketuo zhako penuo bate; süla a a siezeu Jakob dukhriwatuo.”

⁴² Derei puo nuo phichüu Esau dieko pu vo Rebeka bu silieta; sitse puo puo nuo nhicuu Jakob kielie di sie, puo ki, “Harie, n dzürieu Esau sü n dukhriwatuoü rhükelieu pie puo thuo puo nou thupeluo se bate.

⁴³ Süla a nuo no tsie a die zeliecie; sidi sielie di tase a prüu Laban Haran nu kebau ki votalie.

⁴⁴ Sidi dopuo puo ze batalie, n dzürieu bu puo noupfhünouyie rükreta kemochie;

⁴⁵ n dzürieu bu puo noukemeyie nu rüdita, di no puo gei chükeshüu rükra moketa sie, a mia ketseshü di sünunu n zelietuo. Kiüdi a bu khunhie puo nu nnie kenienie pejü phrewatuo dimu?”

⁴⁶ Süsie Rebekae Isak ki, “A we Hitmiapfüko la a nyieta zolie. Mhanuü Jakob rei rüna hau nu lhou keba Hitmiapfü haikecüpfü puo lie latuo üro, a kelhou kedipuo kemevi ba ta?”