Keriekitho 26 - Angami Naga CL (Re-edited) Bible (BSI)

Isak mu Abimelek

¹ Abraham teiki kesier pekrie therieu rübei kemo pekrie kekrei puo kijü nu la sier, süla Isak-e Gerar nu Filistinko kediu Abimelek ki vo.

² Sitse Jihova puo pengushü, di sie, “Ijipt nu vo hie, a n ki pushütuo ükezhü kijüu nu lhoulie.

³ Thechü hau nu rüsomia chü di lhoulie, derei a n ze tuotuo mu ja n tsütuo, kijü hako pete pie no mu n nuosenuoyieko tsüshüketuo la, siro a n puo Abraham ki rüsekeshü chü tseishütuo.

⁴ A n nuosenuoyieko chü pekrapie teigei themvüko mhieshütuo, mu kijü hako pete pie n nuosenuoyieko tsütuo; tsiu n yieko geinu kijü nu seyie pete bu thejapfütuo,

⁵ Abraham-e a pfhe rünyü mu a dieko se balie, a diekhakeshüko, ae chünukeshüko mu a zhoko zekelie la.”

⁶ Süla Isak-e Gerar nu lhouta.

⁷ Siro thechü sünu themiako puo kimia dze ketsocü ki, puoe sie, “Puo a üpfülie.” Puoe puo a kimia icü pu michieketa la, puo lekecü, “Thechü hau nu themiako Rebeka la a dukhriwa rei si lhomu” icü lecü la, hapfü ngu zivi phi eru.

⁸ Puo thechü sünu ba pechaketa sie, Filistinko kediu Abimelek-e khirki nunu mha mehoshü ru Isak-e puo kimia Rebeka ze kemeruo keba ngulie.

⁹ Süla Abimelek-e Isak kielie di sie, “Harie, hapfü n kimia zo! No kiüdi ‘Puo a üpfülie’ idi pu ga?” Isak sie puo ki, “Kekreilamonyü ae hapfü la a bu siata rei si lhomu itelie.”

¹⁰ Sitse Abimelek sie, “Hieko gei chükeshü mha hau kedipuo ga? Themiako donu mia puo n kimia zezhüwaketuo sü rüü phi ze, siliro no kejo se vor hieko gei shütie.”

¹¹ Sidi Abimelek-e themia peteko ki sie, “Kehoupuorei themia hau morei puo kimia kebieu bu sia petuo zotuo.”

¹² Siro Isak-e kijü sünu tsia prushü, ru süu teicie nu süde thekrie ngu lalie. Jihova japie puo tsü.

¹³ Sidi themiau mhanyilie, mu puo mhanyi philie kemochie kruo miemiezhüta.

¹⁴ Puoe tekuo mu mithu kro rei nyi, mu puo kirinuoko rei kra seta, süla Filistinko puo ngu u rota.

¹⁵ Sitse puo puo Abraham teiki puo kituoko bu thiekeshü dzükhouko pete rei Filistinkoe khawa mu rünyo pie luowa.

¹⁶ Sitse Abimelek-e sie Isak ki, “Hie kinu tuotacie; noe hieko ki kuo phiketa la.”

¹⁷ Süla Isak-e sünunu tuota, di vo Gerar razha nu razhü chü ba di sünu lhouta.

¹⁸ Siro Isak-e puo puo Abraham teiki thiekeshü dzükhouko thie kesa lalie; Filistinko Abraham se sie khakewa la; mu puo thiedzü puo puoe thokeshü zako se süko kie lalie.

¹⁹ Derei Isak kituoko razhau nu dzükhou thielie di dzüluo ngukelie ki,

²⁰ Gerar nu thupfhekoe Isak thupfheko ze kegei di sie, “Dzü hieko vie.” Süla puo dzükhouu za thopie Esek chüwa, kekreilamonyü ukoe puo ze kemeüketa la.

²¹ Süsie uko dzükhou kekrei puo thie lalie, süu la rei uko puo ze kegei lata; süla puo süu za thopie Sitna chü la.

²² Sitse puo sünunu tuota di vo dzükhou kekrei puo thie lalie, süu la we mia uko ze kemeü mota; süla süu za thopie Rehobot chülie, di pucü, “Tsie we Jihova u la thechü khashüte ru úko kijü hau nu kruolietuo.”

²³ Sünunu puo tuose Beersheba nu vota.

²⁴ Sitse Jihova süzhü puo mho geinu puo pengushü di sie, “Ae n puo Abraham Kepenuopfü zo, michie hie, a n ze ketuo la, mu a ja n tsütuo, tsiu a kituou Abraham la n nuosenuoyie chü pekrashütuo.”

²⁵ Süla puo sükinu ruosuoba puo chülie di Jihova za kieshü, mu puo pfheki pie süki pethoupie balie. Sidi Isak kituoko dzükhou puo thielie.

Isak mu Abimelek Unie Kepfhekhokelie

²⁶ Sitse Abimelek-e Gerar nunu puo tarhoyakezhau Ahuzat mu puo rüpfhünuo mhokezhau Fikol zelie di puo ki vor.

²⁷ Isak-e uko üse, “Kiüdi a ki vorzhü ga, nie a ngumecü di nie kinu a ketsewata mo me?”

²⁸ Sitse uko sie, “Jihova n ze ketuo hie ngu toute; süla úko donu pfhekho puo bu balie di hie bu n ze dietseidiekho puo chüwacie idi hie puya.

²⁹ Siliro hieko rei n bie mo mu n gei mha kevi sie kesuo puo rei chüwa mo di kezekevi nunu n ketsekewa tuoi, n bu rei hieko pechü kelho la. Noe Jihova theja kepfüute ru.”

³⁰ Sitse puo thehe puo kesepie uko tsü, di uko bu cüükrielie.

³¹ Süsie uko khiserüna sielie di kesekiewa; mu Isak-e uko cha nu uko ketseshüwa, mu uko nou mene di puo ze kekhota.

³² Teisozha sünhiesü Isak kituoko vor di uko thie keba dzükhou dze pie puo ki pu di, “Hieko dzü nguliete.”

³³ Puoe süu za thopie Shiba chüwa; süla thie ketso rei nadi süu za üse Beersheba üdi kietuoya zo.

³⁴ Esau cie hiedia-keta ki Hitmia Biri nuopfü Judit mu Hitmia Elon nuopfü Basemat unie lielie;

³⁵ tsiu unie la Isak mu Rebeka unie bu lhou re phita.