Keriekitho 25 - Angami Naga CL (Re-edited) Bible (BSI)

Abraham-e Ketura Liekelie

¹ Abraham-e thenu kekreipfü puo lie la, puo zae Ketura.

² Süpfü geinu lhoukelieko hako Zimran, Jokshan, Medan, Midian, Ishbak mu Shua.

³ Jokshan-e Sheba mu Dedan unie Puou. Dedan nuoko Ashurim, Letushim mu Leumim.

⁴ Midian nuonuoko ro: Efa, Efer, Hanok, Abida mu Elda. Hako pete Ketura nuonuo.

⁵ Abraham-e puo vie keba pete khapie Isak tsüwa.

⁶ Derei Abraham-e puo pelipfüko nuonuo la rei mha methuo khapie uko tsü. Sidi puo rhei baluocü nu Isak kinu uko ketsepie niathutsa rüna nu shüwa.

Abraham Se

⁷ Abraham kelhouzha, cie krie puo di hietheniepengou.

⁸ Abraham-e phichümia puo chü tsatota mu teicie kekra lhoulie di puo keha thelau chüwa di siata, mu puo themiako ki vota.

⁹ Puo nuonie Isak mu Ishmael-e Hitmia Zohar nuo Efron lieu nu, Mamre niathutsa kezhü Makpela tsiepfüu nunu puo khruwa.

¹⁰ Lie hau Abraham-e Hitmia kinu khrülie. Sünunu puo kimia Sara mu Abraham khru.

¹¹ Abraham se sie Ukepenuopfü japie puo nuo Isak tsüshü mu Isak-e Beer-lahai-roi nu lhouta.

Ishmael Yiemiako

¹² Hakohae Sara die Ijiptpfü geinu penuopie Abraham ketsü nuou Ishmael nuosenuoyieko.

¹³ Ishmael nuonuo kesieso di penuokelieko za hamhie: Ishmael nuorieu Nebaiot, süsie Kedar, Adbil, Mibsam.

¹⁴ Mishma, Duma, Masa,

¹⁵ Hadad, Tema, Jetur, Nafish mu Kedema.

¹⁶ Hako Ishmael nuonuoko mu uko za, uko rüna tsiu kebachüko mu uko seyie geinu lekeshü kedinuo kerekenie.

¹⁷ Hako Ishmael lhoukelie teicieko, cie krie puo di serethenie sidi puo siata, mu puo ze puo themiako kinu vota.

¹⁸ Ishmael nuosenuoyiekoe Havila nunu vo Shur ketso donu lhou, süu Asiria kevatsa Ijipt kepetsou nu zhü mu puo siezedzürieko donu lhou tuota.

Esau mu Jakob Unie Kepenuo

¹⁹ Hako Abraham nuou Isak nuosenuoyieko: Abraham-e Isak Puou

²⁰ mu Isak-e Rebeka, Padan-aram nu Arammia Bethuel nuopfü mu Laban üpfü kelie ki puo kelhouzha cie hiediata.

²¹ Isak-e puo kimia nuojüpfü puocü la Jihova ki cha; sitse Jihova puo kecha chü puo tsü, di puo kimia Rebeka bu nuonipfülie.

²² Puo nuonie puo vanu tuoluocünu kegei tuota; süla puoe sie, “Haituoü ro, kiüdi a bu rheituo shi?” ituoya. Süla puoe Jihova ki ketsotuoü vo.

²³ Sitse Jihovae puo ki, “Seyie kenie-e n va nu tuo, tsiu n geinu penuokeshünie kepfüphrotatuo; mu mia puoe kekreiu ki kuokuotuo, phichüu nhicuu lie chütuo.”

²⁴ Puo nuoze tei tsolie tse, harie puo va nu nuobi tuo.

²⁵ Phichüu penuolie ru puo mo pete merie mu puomie tsüpie pfhemie tuoi zo; süla uko puo za thopie Esau chülie.

²⁶ Süsie puo siezeu penuolie, mu puo dzie-e Esau phitshü teshü par; süla puo za thopie Jakob chülie. Siro Rebekae nuo sünie penuokeshü ki Isak-e cie hiesorouta.

²⁷ Unuonie zha sierkelie ki, Esaue nha nu chüwhuo kevimia puo chü, derei Jakob-e zei-i di pfheki nu baya.

²⁸ Isak-e Esau khrieya, kekreilamonyü puoe süu chügei puo neiyakezha la, derei Rebekae Jakob khriekuoya.

Esau Phichüzhau Zecükelie

²⁹ Khunhie puo Jakob-e gadzü puo kemeluopie zha; süki Esau lie nunu vor, mu puo va merü se tuo.

³⁰ Süla Esaue Jakob ki, “A bu no mhacha kemerieyharapie kebau huo cücie, a merüketa la.” (Süla puo za üse Edom) üya.

³¹ Jakob sie, “N phichüzhau se a ki ze riecie.”

³² Esau sie, “A siatatuo üzhie, mu a a phichüzhau se kedipuo chü ta?”

³³ Sitse Jakob sie, “A ki rüseshü riecie.” Süla puo rüsewa di puo phichüzhau se Jakob ki zewa.

³⁴ Süsie Jakob-e niekhrüda tsiu rücü galuou pie Esau tsüshü; mu puo mhacümhakrielie di sie tuota. Hamhie di Esau puo phichüzhau zhasewa.