Keriekitho 23 - Angami Naga CL (Re-edited) Bible (BSI)

Sara Se

¹ Sarae teicie krie puo di mepfüethenie lhoulie. Sara kelhou teicie-e hade.

² Sarae Kanan nu Kiriat-arba (süu Hebron) nunu siata; mu Abraham-e le Sara krü mu puo la kra.

³ Siro Abraham kesiamo mhodzü nunu sielie di vo Hitmiako ki pu di sie,

⁴ “Ae sikemomia mu solhimia chü nieko donu lhouketuomia zo; nieko do nunu mekhru chü puo kha a tsücie, a bu a themia siaketa ki khru keviewaketuo la.”

⁵ Sitse Hitmiako Abraham ki,

⁶ “Hieko pfhe rünyüshücie, a niepuu; noe hieko donu kedinuo kekuo puo zo. Hieko mekhruchüko n thuo n nei kedalie di kesiamia khruliecie, n bu kesiamia khruketuo la hie miapuorei mekhru chü khashü n tsü khrieta morei chakha chütalie lho.”

⁷ Sitse Abraham-e sielie di vo Hitmia, kijü niepuko mhodzü nuketsushü.

⁸ Sidi puo uko ki, “Nieko medo di a bu kesiamia khru kevielieketuo sie, a pfhe rünyüshücie, a la Zohar nuou Efron ki chacie.

⁹ A bu se mekhru chü chülieketuo la, puo lieu mei ki kezhü Makpela tsiepfüu puoma lie tsei di se a tsücie.”

¹⁰ Efron-e Hitmiako donu ba, di Efron-e Hitmiako mhodzü nunu Abraham die kelashü, puo nadiu kharu nu keler pete mhodzü nunu sie,

¹¹ “Mo, a niepuu a pfhe rünyüliecie; a lieu mu puo nu keba tsiepfüu sa kha n tsüshüte, a themiako mhodzü nunu n bu kesiamia khrulieketuo la kha n tsüshüte.”

¹² Sitse Abraham-e kijü nu themiako mhodzü nuketsushü.

¹³ Sidi puo kijüu nu themiako mhodzünu Efron ki pu di sie, “Derei no n medotuo ro, a pfhe rünyüshücie; a lieu ma khashütuo, a kinu süu pieliecie, sitse a kesiamo se sünu khrulietuo,” sishü.

¹⁴ Efron-e Abraham die kela di sie,

¹⁵ “A niepuu, a pfhe rünyüshücie; kijü rakachü shekel krie dia ma ba: süu avu donu kedipuoü mu? Kesiamia khruliecie.”

¹⁶ Siro Abraham-e Efron dieu puo medolie, di Abraham Hitmiako puo die kerünyüko mhodzünu rakachü shekel krie dia mejüpie Efron tsüwa, lhithomia donu priesa mejüyakezha medzi di.

¹⁷ Süla Makpela nu Efron lietsa Mamre niathutsa kezhüu, sünu kezhü tsiepfüu tsiu ketsau nu keba seibo pete tsiu sükhieümhou houpfü keba peteko

¹⁸ Hitmiako mu nadi kharuu nu keler pete mhodzünu Abraham vie chüta.

¹⁹ Hako sie Abraham-e puo kimia Sara pie Kanan kijü Mamre (Hebron ücüu) niathutsa kezhü Makpela nu tsiepfü nunu khruwa.

²⁰ Siro lieu mu sünu kezhü tsiepfüu Abraham-e se mia kekhru chü chütuo üdi Hitmia kinu khrüpie puo vie chülieta.