Keriekitho 22 - Angami Naga CL (Re-edited) Bible (BSI)

Abraham Kepele Dojükecü

¹ Mha hako sie Ukepenuopfüe Abraham dojü, di puo ki, “Abraham” siru puo sie “A haki bawe.”

² Sitse puo sie, “N nuou zelie, n nuo pfuliu Isak, no puo khrieyakezhau, sidi tuose Moria kijü nu volie, di a n ki pushüketuo kijüthouko puo geinu puo khapie kethe ruosuo chüshücie.”

³ Süla Abraham khiserüna sielie, di puo gadayo gei theba keselie, mu puo khriesamia kenie mu puo nuo Isak zelie, siro kethe ruosuo la sei phrolie, sidi Ukepenuopfü puo ki pukeshü thechüu nu vo.

⁴ Zha se nhie Abraham tosie ru thechüu petse phinu keba ngulie.

⁵ Sitse Abraham-e puo khriesanie ki, “Nnie gadayo ze di haki balie; a mu unuou hienie lutsakhie vo ruosuo chüwa di nnie ki la vortuo.”

⁶ Sidi Abraham-e kethe ruosuo kechü seiko chüpie puo nuou Isak bu pfülie; mu puo puo dzie nu mi mu zhietenuo pielie. Sidi unie keze tuo vota.

⁷ Sitse Isak puo puo Abraham ki, “A Puo!” isi. Sitse puo sie, “A nuo a haki tuo zo.” Puo sie, “Harie mi mu sei we tuo, derei kethe ruosuo la tekuonuou kirapuo ba ga?”

⁸ Abraham sie, “A nuo Ukepenuopfü thuo kethe ruosuo la tekuonuou khashütuo.” Sidi unie keze tuo vota.

⁹ Unie vor Ukepenuopfü pukeshü chüu tsokelie ki, Abraham-e sükinu ruosuobau chülie, di sei khapie sügei shülie. Sidi puo nuo Isak phalie di puo khapie ruosuobau gei seiko gei pie zhülie.

¹⁰ Süsie Abraham puo nuou dukhrituoü puo dzie se zhietenuoyo chülie.

¹¹ Derei Jihova dielieu teigei nu puo kie di sie, “Abraham! Abraham!” isi. Puo sie, “A haki bawe” sishü.

¹² Sitse puo sie, “N dzie khapie unuoyo gei shü hiecie, puo gei mhapuorei chüwa hie; a tsie no Ukepenuopfü khrüpreiyakecü siliete, no a kinu n nuou, n nuo pfuliu se bata mo ze ru.”

¹³ Süsie Abraham tosie mehoshü ru harie, puo sietsa tekuochü puo ronyho nunu puo kianie doupfü tha di ngulie, sitse Abraham vo tekuochüu ze vor di puo nuo sou nu süu khapie kethe ruosuo chüwa.

¹⁴ Süla Abraham-e thechü süu üse “Jihova Jireh,” ilie mu thie ketso rei hai di pu tuoya “Jihova kijüthouu geinu süu keseshütuo.”

¹⁵ Siro Jihova dielieue teigei nu va kenieu va Abraham kie,

¹⁶ di sie, “A a thuo rüseshüte, idi Jihovae puya, no mha hau chükeshü, n thuo n nuo pfuliu se bata mo zocü la,

¹⁷ a ja n tsü tou zotuo, mu a n nuosenuoyie chü pekrapie teigei themvüko mu dzükezha khie huocanyo mhieshütuo; siro n nuosenuoyiekoe uko ngumvümia kharu pevielietuo,

¹⁸ tsiu n nuosenuoyie geinu kijü seyieko theja ngulietuo, kekreilamonyü no a die zeliete.”

¹⁹ Sitse Abraham tuo khriesanie ki la vorlie, sidi uko keze Beersheba nu vota; mu Abraham Beersheba nu lhou bata.

Nahor Nuosenuoyieko

²⁰ Mha hako sie Abraham ki pukecü, “Harie, Milka rei nuo penuopie n siezeu Nahor tsüshüte.

²¹ Nuorieu Uz, puo siezeu Buz, Aram puou Kemuel,

²² Kesed, Hazo, Pildash, Jidlaf mu Bethuel.”

²³ Bethuel sier Rebeka puou chülie. Mia thetha hako Milkae penuopie Abraham siezeu Nahor tsüshü.

²⁴ Sümhonu puo pelipfü, puo za Reuma üyakezhapfü rei Teba, Gaham, Tahash mu Maka hako penuolie.