Keriekitho 21 - Angami Naga CL (Re-edited) Bible (BSI)

Isak Penuokelie

¹ Jihova pukeshü tuoi Sara ki vor mu Jihova phrakeshü mhiei Sara gei chüshü.

² Sitse Sara nuonipfülie, di Abraham tsa zenu thepfumia puo penuoshü puo tsü, Kepenuopfüe pukeshü tei tou ki.

³ Abraham-e Sara penuoshü puo ketsü puo nuou za thopie Isak chülie.

⁴ Sitse Abraham-e Ukepenuopfü puo ki diekhakeshü mhiei di zha thetha nhie puo nuou zhü relie.

⁵ Siro puo nuo Isak penuokelie ki Abraham cie krie puota.

⁶ Sarae sie, “Ukepenuopfüe kenyü kha a tsüshüte, kehoupuorei a dze sikeliemia a ze di nyütuo.”

⁷ Mu puo sie, “Supuonie Sarae nuoranuo ngutuo ücü Abraham ki pulie vi ta? Puo tsa zenu ae thepfunuomia puo penuoshü puo tsü ze ru.”

Hagar mu Ishmael Unie Ketsekewa

⁸ Siro unuoyo memie sie di nuokho chüta; mu Abraham-e Isak nuokholieketa nhie thehe kezha puo chüshü.

⁹ Derei Sarae Ijiptpfü Hagar-e penuopie Abraham ketsü Ishmael-e Isak ze meruo chü keba ngushü.

¹⁰ Süla puoe sie Abraham ki, “Kituo hapfü mu puo nuo unie whuowaliecie; kituo hapfü nuou a nuo Isak ze kayie chülie lhocü la.”

¹¹ Mha hau Abraham la puo noukesuo se puota, puo nuo Ishmael la.

¹² Derei Kepenuopfüe Abraham ki, “N nuou mu n kituopfü la n nousuo ba hie, mhakehoupuorei Sara n ki kepu mhie chülie, Isak nuosenuoyie geinu n za kieketuo la.

¹³ A n kituopfü nuou rei chüpie seyie puo chüshütuo, puoe n tsia zocü la.”

¹⁴ Süla Abraham-e khiserüna sielie di niekhrüda mu dzü chüzhüsü puo chüpie Hagar tsüshü, siro süu pie puo bouka gei shü di puo nuou sa di hapfü ketsewa. Hapfü tuota mu vo Beersheba rayha nu rühou tuo.

¹⁵ Siro chüzhüsü nu dzü jü tseita tse, hapfü unuoyo khapie seinyho puo khro zhüwa.

¹⁶ Sidi puo vo unuoyo ze kepeciekecü theü ciekeshü chie puo nu ba di sie, “A bu unuoyo se ngu hie zoyi,” ibata. Siro puo vo sünunu puo pfhephra di kra ba.

¹⁷ Siro Ukepenuopfüe unuoyo pfhe silie; mu Ukepenuopfü dielieu teigei nu Hagar kie di sie, “Hagar, kedipuo la n noukemezhieta ga? Michie hiecie; Ukepenuopfüe unuoyo kirapuo nu kra ba shiü puo pfhe si baketa la.

¹⁸ Sielie, di vo n dzie pie unuoyo phou pieliecie, a puo chüpie seyie kezha puo chüshüketuo la.”

¹⁹ Sitse Ukepenuopfüe puo mhi chü kemhirhoshü ru puo dzükhou puo ngulie; puo vo dzü pelipie puo süu tshulie di se vo unuoyo bu krielie.

²⁰ Siro Ukepenuopfüe unuoyo ze tuo di puo bu zhalie. Puoe rayha nu lhou sier theükesemia puo chülie.

²¹ Puoe Paran rayha nu lhou; mu puo zuo Ijipt nunu thenu puo lieshü puo tsü.

Abraham mu Abimelek Donu Dietseidiekho

²² Sümeseki Abimelek mu puo rüpfhünuo mhokezhau Fikol-e sie Abraham ki, “Ukepenuopfüe n mhatho pete nu n zetuoya.

²³ Süla tsie Ukepenuopfü se di, a gei morei a nuonuoko gei, morei a nuosenuoyieko gei dietho kemo chülie lhoü rüseshücie, a n gei tseikeshü mhie chüpie a gei mu no rüsomia chü di lhou keba kijüu gei shücie.”

²⁴ Sitse Abraham-e sie “A rüseshütuo.”

²⁵ Süsie Abimelek kituoko dzükhou selieketa la Abraham-e Abimelek ki panyashü,

²⁶ sitse Abimelek-e sie, “Supuonie hau chüwa shi a si mo, no rei a ki pu mo, mu süu thie nu zo moro si rei tuo mo.”

²⁷ Süla Abraham-e tekuo mu mithu khapie Abimelek tsüshü; di unie dietseidiekho puo chüwa.

²⁸ Abraham-e tekuokro nunu tekuokrü thenie kha kreipie balie.

²⁹ Süla Abimelek-e sie, Abraham ki, “Tekuokrü thenie kha kreipie keba hau puoca kedipuo ga?”

³⁰ Puo sie, “A dzükhou hau thieshü ücü zhapu puo chüketuo la n bu a dzie nunu tekuokrü hako lietuo üdi we.”

³¹ Süla thechü süu üse Beersheba üdi kieta; unie sükinu keze rüse puo chüwaketa la.

³² Sidi unie Beersheba nunu dietseidiekho chülie. Süsie Abimelek mu puo rüpfhünuo mhokezhau Fikol unie Filistinko kijü nu la vota.

³³ Abraham-e tamariskbo puo leipie Beersheba nu shü, sidi Kechachie ketuo Ukepenuopfü Jihova za kieshü.

³⁴ Siro Abraham-e teisozha kekra Filistinko kijü nu solhimia chü di lhou.