Keriekitho 20 - Angami Naga CL (Re-edited) Bible (BSI)

Abraham mu Abimelek

¹ Süsie Abraham-e sünunu rüve se Negeb kijütsa vo di Kadesh mu Shurnie donu lhou; mu puo Gerar nu rüsomia chü di lhou.

² Abraham-e sie puo kimia Sara pu di, “Puo a üpfüwe.” Sitse kediu Abimelek-e mia ketseshü di Sara zelieta.

³ Derei Ukepenuopfüe theva Abimelek mho geinu puo ki “Harie, no zekelie thenupfü la no kesiamia puote ho, süpfüe mia nupfünuocü la.”

⁴ Derei Abimelek süpfü penuo vo mo zoluo, süla puo sie, “Niepuu no kejo kejü themiau dukhrituo me?

⁵ Puo thuo a ki, ‘Puo a üpfüwe’ si mo me? Mu süpfü thuo rei, ‘Puo a prüu zo,’ size! A a nou dietho mu jo kemo dzie se hauha chü zo.”

⁶ Sitse Jihova puo mho geinu sie, “U zo, no n nou puotou chü di hau chü zo, süla n bu kephouma chü di a petsouta molieketuo la a n bu puo nyükecü khaliete.

⁷ Tsie no themiau kimia kha lashüwalie, puoe siedzekesimia puocü la, puo n la chashütuo, mu no rheilietuo. Derei no süpfü khashü moro, no mu n themia peteko sia toutaketuo siliecie,” si.

⁸ Süla Abimelek khiserüna sie di puo kituoko pete kielie sidi mha hako pete se uko ki pushü; sitse themiako michie phita.

⁹ Süsie Abimelek Abraham kielie di sie puo ki, “No hieko gei kedipuo chüshü ga? Mu a n gei kephouma kicüpuo chüwa üdi, no a mu a kedirüvie nu kephouma kezha haicü se vorshü ga? No a gei chü zhü kemo mhathoko chüshüte.”

¹⁰ Süsie rei Abimelek-e Abraham ki, “No kedipuo le di mha hau chüshü ga?”

¹¹ Sitse Abraham sie, “Ae Ukepenuopfü khrükeprei thechü hau nu ba ücü le mo mu uko a kimia la a dukhriwatie ru idi mha hau chüwate.

¹² Sizomoü puo a üpfü ketho zo, puo a puo nuopfü derei a zuo nuopfü mo, sidi puo a kimia chüte.

¹³ Mu Ukepenuopfü a bu a puo kinu tuo rühou parketa ki, a puo ki, ‘No ketseikevi hau a gei chüshü morosuo: avu thechü kehourapuo vo zo rei, a pu di, puo a prüulie’ silienushü.”

¹⁴ Sitse Abimelek-e tekuo siro mithu, mu puo kituo thepfumia tsiu thenumia rei khapie Abraham tsü, mu puo kimia Sara kha lapie puo tsüwa.

¹⁵ Süsie rei Abimelek-e sie, “A kijü sü n mhodzünu zhü ze, n thuo n neira lhouliecie,” ita.

¹⁶ Puo Sara üse, “Harie, a rakali nyie puo se n prüu tsüshü ho; süusü bu n ze ketuo themia peteko mhiki no mezhü ücü thashüwaketuo la.”

¹⁷ Süsie Abraham-e Ukepenuopfü ki chashü, tsiu Ukepenuopfü Abimelek mu puo kimia siro puo kituopfüko pete chü keshürhoshü; sitse uko u nuonuo nyilie.

¹⁸ Kekreilamonyü Jihovae Abraham kimia Sara la Abimelek kinuko pete nuobvü khatsawaketa la.