Keriekitho 2 - Angami Naga CL (Re-edited) Bible (BSI)

¹ Sidi teiko mu kijüu mu sünu ketuo pete chü tseilie.

² Zha thenie nhie Ukepenuopfüe puo mhathoko pete chü tseilie; sidi puoe puo mhatho chükelie peteko nunu zha thenie nhie rüleilie.

³ Siro Ukepenuopfüe japie zha thenie gei shülie sidi süu chü kemesalie; Ukepenuopfüe sünhie puo mhatho kheko nunu rüleikelie la.

⁴ Hako teiko mu kijüu chükeshü dzewe. Ukepenuopfü Jihovae teiko mu kijü chüshü tseki zowe,

Iden Zieu

⁵ kijüu gei nha lhou mo mu nha tsia rei tsü par mo, Niepuu Ukepenuopfü tei bu rü kijü tsur moluocü la; mu kijüu cielieketuo themia puorei tuo mo.

⁶ Derei kijü nu dzü rüluo par kijüu petseshüshüya.

⁷ Sitse Ukepenuopfü Jihovae kijü nu nyophe se themia chülie, di kerhei thesü hapie puo nyhüki nu shüshü sidi themia bu kerhei themia puo chülie.

⁸ Ukepenuopfü Jihovae niathu kevatsa Iden nunu tezie puo chüshü, sidi puoe chükelie themiau pie sünu shü.

⁹ Siro Ukepenuopfü Jihovae seibo, umhi ki zivi ücüko, tsiu u ca kevi chülieketuo pete rei pelhoupie sünu shü. Tezieu metsuo nunu kerheiprü bo-u siro kevi mu kesuo sikelie seibo-u rei pelhoushü.

¹⁰ Siro Iden nu kerü puo kruzhü, süu bu tezieu vaketuo la; Iden tseketa sie kerüu pro par kerü dia chüta.

¹¹ Kerü kerieu liro Pishon; süu kru suna keba Havila kijü houpfü vo ba.

¹² Sünu suna kevithopfü, kethengu sei mu onix mu delium tsie ngulieya.

¹³ Kerü kenieu liro Gihon; süu kru Kush kijü pete hou vo.

¹⁴ Kerü seu Tigris; süu Asiria mhodzütsa kruzhü, kerü diau liro Eufrat.

¹⁵ Ukepenuopfü Jihovae themiau ze vo Iden zie nu shü, puo bu süu cie cü mu rüguose balieketuo la.

¹⁶ Mu Ukepenuopfü Jihovae themiau ki, “N thuo tezie nu nhasi kehoupuorei rie cü tuolie,

¹⁷ derei kevi mu kesuo kesi seiu si we no cülie lho; süu kecü sie no sünhie siata petuo zotuo,” si.

¹⁸ Süsie Ukepenuopfü sie, “Themiau bu puo rübei keba vi molie, a puo dziesepfü puo chüpie puo khruohituo.”

¹⁹ Sidi Ukepenuopfü Jihova kijüu geinu khunuoko pete mu teirako rei pete chülie, sidi themiau bu uko za tholieketuo la uko ze puo ki vor, sümhie di themiau uko kekie zakieu se phre tuota.

²⁰ Hamhie di themiau kiriko za tho phrelie, siro teirako mu nha nu nhachü pete; derei süko donu puo dziese puo khruohilieketuo tuo mo.

²¹ Süla Ukepenuopfü Jihovae keze kesou se puo se vor themiau gei shü; ru puo zeta. Mu puo zekezhü ki, puoe themiau tieru puo bielie di puo chüu chü kema lawa.

²² Sidi puoe themiau tieru se thenumiapfü puo chülie di puo ze themiau ki vor.

²³ Sitse themiau sie; “Haha a ruko donu a ru zo, mu a chü donu a chü zo; puo üse Thenupfü ütuo, themia geinu puo se parkelie la,” si.

²⁴ Süla themiau puo puo mu puo zuo khawa di puo kimia kitsa votatuo, di unie chü puo chütatuo.

²⁵ Siro themiau mu puo kimia unie methuo phre, derei unie menga mo zo.