Keriekitho 19 - Angami Naga CL (Re-edited) Bible (BSI)

Sodom mu Gomora Kepeka

¹ Siro teigeidieliemia kenie thevatie Sodom nu vor; mu Lot-e Sodom kharuki ba. Lot-e unie ngu tse, unie ze kesetuoü sie tuota, sidi nerhutsu puo zie pie kijü zerepfü zhüta.

² Sitse puoe sie, “A niepunie, rüreise nnie kituou kinu lerliecie, nnie phi khrüwa di tsiezhü batacie. Khise nnie bu sie zilie di nnie cha nu volietuo,” sitse unie sie, “Mo, hienie teizeizhau pete chadi nu ba zotuo.”

³ Derei puo unie ki pu beilieta, süla unie puo kinu lelie, siro puo unie ze hieshü, sidi khreiüshükemo niekhrüda rieshü ru unie süu cülie.

⁴ Derei unie zhütsu kemonu, Sodom nadiu nu thepfumiako, phichünhicu pete vor kiu houpfülie;

⁵ sidi uko Lot kie di sie, “Tsiezhü n kinu vor kebanie kirapuo ba ga? ze parshücie, sitse hie unie sishütuo.”

⁶ Sitse Lot tuo uko ki par mu puo kikha shüpie kha lawa,

⁷ di sie, “A siezedzürieko, a nieko ki chaya, mha kesuo chü hai zota hiecie.

⁸ Harie, thepfu si mo zokecü a nuo rüü kenie ba, a bu unie ze par nieko ki shü, di unie gei we nie thuo chü kenyüu chüwa mu themia hanie gei we mhapuorei chü hie zocie, unie a ki khrükhro lerketa la,” si.

⁹ Derei ukoe sie, “Phir hie.” Süsie rei uko la sie, “Themia hau rüso chü vor, di puo bu u capi chütuo le! Tsie we hie unie ki rei n gei we suokuotatie.” Sidi uko Lot khu toutou zo kikha vaphapfü letatuo üta.

¹⁰ Derei themianie unie dzie chase pra Lot teshü ze ki nu lerta. Sidi ki khawa.

¹¹ Süsie unie kikha ki kethako pete, phichünhicu mhi chü pecie phrewa, di uko bu kikha pfhülie lho bata.

¹² Sitse themianie sie Lot ki, “Haki n nuo thepfu rei thenu rei, n nyanuo morei n kicükinumia huo nadi hau nu ba saluo me? Thechü hau nunu uko ze partacie;

¹³ hie thechüu pekawatuo üzhie, kekreilamonyü Jihova mhodzünu uko kepejo pfhe re se baketa la mu Jihovae süu pekaketuo la hienie ketseshüte.”

¹⁴ Süla Lot vo di puo nuopfünie lietuoü keba puo nyanie rüchü di sie, “Sielie di thechü hau nunu tuotacie; Jihova nadi hau pekawatuoü baketa la.” Derei puo nyanie-e puo üse keyu chü keba mhieta.

¹⁵ Khise teiso pi par tse, teigeidielienie Lot kesou di sie, “Sielie, di n kimia mu n nuo thenunie ze tatalie, mo üro siazha pie nadiu tsükeshü ki nieko pekawaketuo la.”

¹⁶ Derei puo rüge ba zo; sitse themianie sie puo tsiu puo kimia mu puo nuo thenunie dzie merhashülie, Jihovae puo ngumezhieshü, di puo ze par nadiu khie shüwa.

¹⁷ Süsie unie uko ze chazou parshü di sie uko ki, “Nie kerheiro la tataliecie; rei la vo nie sietsa meho hie, morei razhau nu bata mo zolie: nie pekakewa keprei la ta kijüthou gei votalie.”

¹⁸ Sitse Lot sie unie ki “He-i, si hiecie, a niepunie;

¹⁹ harie, nnie kituou nnie mhodzünu nnie neipfüliete, mu nnie-e a kerheiro kelakeshü geinu nnie kekhrie ngukemezhie se a pesipengushüte; derei a kijüthou gei ta volie kenjü zolie, kesuo a valie ro a siatatie.

²⁰ Harie, lutsakhie rüna kecü yopuo nu ta volieketuo la penuo ba, a bu vo sünu rüshütacie, süu kecü yopuo zo mo me? Siro a kelalietuo,” si.

²¹ Sitse puo sie, “Harie, a n die hau rei lieliete; süla n kepu rünau pekawalie lho.

²² Rükrilie di ta sünu volie; no sünu vo tsolie kemochie a mhapuorei chülie kenjü zocü la,” Süla nadi süu za üse Zoar üta.

²³ Lot-e Zoar nu vorkelie ki niaki thuse kijüu va bata.

²⁴ Süsie Jihovae teigei nu Jihova kinu mitsie tsiu mi perüpie Sodom mu Gomora va;

²⁵ sidi nadi sünie siro razhau pete, nadinie nu kelhou pete mu kijüu gei lhou keba pete peka phrewa.

²⁶ Derei Lot kimiapfü rürei puo sietsa meho lashü sidi metsiekro puo mevita.

²⁷ Siro Abraham khiserüna sielie di puoe Jihova mhodzünu thakecü thechüu nu vo;

²⁸ sidi puo Sodom mu Gomora, tsiu kijü razha pete mehoshü, ru harie kijü süu nu mikhu sü miü mikhu tuoi siekezhü ngulie.

²⁹ Derei Ukepenuopfüe Lot kelhou thechü razhau nu, nadinie pekakecü ki, puo Abraham rükralie, sidi kepeka nunu Lot ketsewa.

Moabko mu Ammonko Lhou Kesier Dze

³⁰ Lot-e Zoar nunu tuota, sidi puo nuopfünie ze kijüthou gei lhou tuota. Puoe Zoar nu lhou michieketa la; süla puo nuopfünie ze di tsiepfü puo nu lhou.

³¹ Sitse puo nuo phichüpfüe nhicupfü ki, “Avu puou phichüte, mu kijü pete nu thepfumia puorei kijüu zho tuoi avu ki kevor tuo mote.

³² Vorlie, avu puo bu khubezu krielie khe, sidi avu puo zezhütuo, di puo geinu avu puo tsia se tuolietuo,” ita.

³³ Süla süzhü unie puo bu khubezu krielie; sidi phichüpfü le di puo puo ze zhü, mu puoe kicükipuo süpfüe ler mu siete shi si mo.

³⁴ Süsienhie phichüpfüe puo siezepfü ki sie, “Harie, a nzhü a puo zezhüwate; avu tsiezhü rei puo bu khubezu krie lalie khe; sidi no le puo ze zhülie, siliro avu puou tsia setuolietuo.”

³⁵ Süla unie puou bu süzhü rei khubezu krie lalie, sidi nhicupfü bu le puo ze zhü, mu puoe kicükipuo süpfü ler puo ze zhü morei siete shi si mo zo.

³⁶ Sidi Lot nuopfünie unie puo geinu nuonipfü phrelie.

³⁷ Phichüpfü thepfunuomia puo penuolie mu puo za pie Moab tholie; süu tsiedo Moabmiako krüu zo.

³⁸ Siro nhicupfü rei thepfunuomia puo penuolie mu puoe puo za pie Ben-ammi tholie; süu tsiedo Ammonmiako krüu zo.