Keriekitho 17 - Angami Naga CL (Re-edited) Bible (BSI)

Zhükere Dietseidiekho-u

¹ Abram cie hiethepfüethepfüketa ki Jihovae puo pengu di puo ki, “Ae Kepenuopfü Kuokejokejüu zowe, a mhodzüki tuolie, mu no vi tseilie.

² Sitse a avu donu dietseidiekho puo chüshütuo mu n chü pekruo phishütuo.”

³ Sitse Abram tsu zerepfü zhüta mu Ukepenuopfü puo rüchü di sie,

⁴ “Harie, a la we a dietseidiekho-u n ze tuo zo, mu no seyie krodi puou chütuo.

⁵ N za bu Abram ü salie lhote, derei n za bu Abraham itatuo, kekreilamonyü a n chüpie seyieko krodi puotsau chüshüketa la.

⁶ A n chü pekruo phishütuo; mu a n geinu seyieko pelhoushütuo, mu kedimiako n geinu siertuo.

⁷ A telhekechachie la avu mu n sie vorketuo n nuosenuoyieko la dietseidiekho puo chüshütuo, n nuosenuoyie mu n Kepenuopfü chülieketuo la.

⁸ Siro ae kechachie la no, tsie solhimia chü lhouketuo Kanan kijü pete pie no mu n nuosenuoyieko tsütuo, mu a uko Kepenuopfü chütuo,” si.

⁹ Siro Ukepenuopfüe Abraham ki, “No we a n ze dietseidiekhokelieu se balie, no rei mu n nuosenuoyie n sie vorkezhü thephou pete rei.

¹⁰ Hauha nie bu ze tuo üdi, a mu no, siro n sie vorkezhü n nuosenuoyie donu dietseidiekho chükelieu: Nieko donu thepfumia pete bu rei u zhüretuo.

¹¹ Nieko nie chü nu nie zhü tieu retuo, mu süu bu a mu nie donu dietseidiekhokewa zasi puo chütuo.

¹² Nieko donu thepfumia zha thethaketa pete zhü retuo; thephou pete nu nie diemia nie kinu penuokelieko tsiu nie shükeiraka se khrükelieko rei.

¹³ Kediemia nie kinu penuokeliemia mu nie raka se khrükeliemia zhüre beituo. Hai di a dietseidiekho-u kechachie nie chü nu tuotatuo.

¹⁴ Siro thepfumia kehoupuorei puo chü nu puo zhürekemomia puo themiako do nunu kelhiwatuo, puoe a dietseidiekho-u varhuoketa la.”

¹⁵ Sitse Ukepenuopfüe Abraham ki, “N kimia Sarai, n bu puo üse Sarai üdi kie sa lhote, derei puo za bu Sara ütatuo.

¹⁶ A ja puo tsütuo, sizomonyü a puo geinu thepfunuomia puo kha n tsütuo. A ja puo tsütuo, mu puo seyieko zuopfü puo chütuo, seyieko kedimia puo geinu siertuo.”

¹⁷ Sitse Abraham tsu zerepfülie di puo dzükerüchüta, sidi puo thuo puo rüchü di, “Themia puo cie krie puoketa zenu nuo nyilie vi me? Sara cie hiethepfüta di puo nuo nyilie vi me?”

¹⁸ Sidi Abraham-e Kepenuopfü ki, “He-i Ishmael bu n mhodzünu lhou tuota zocü mu!”

¹⁹ Sitse Ukepenuopfüe sie, “Silie lho, n kimia Sara geinu thepfumia puo penuoshü n tsü zotuo, mu no puo za pie Isak chüliecie. A puo ze dietseidiekho chükelieu bu puo sie vorketuo puo nuosenuoyieko la rei sa kechachie dietseidiekhokewa puo chütuo.

²⁰ Tsiu Ishmael la we, a n pfhe sishüte; mu harie, a ja puo tsütuo mu a puo chü pekruo mu pekra phishütuo; puo kedimia kerekenie krü chütuo mu puo chüpie seyie kezha puo chüshütuo.

²¹ Derei a dietseidiekho-u zowe Isak ze chütuo, süu Sarae thecie, tsie meseki penuoshü n tsütuo.”

²² Sidi Ukepenuopfüe Abraham rüchükewa sie tuota.

²³ Sitse Abraham-e puo nuo Ishmael mu puo ki nu penuokelie puo dieko raka pie khrükelieko, Abraham kinu keba thepfumia pete zelie, di Ukepenuopfü puo ki pukeshü mhiei sünhie teiluo uko chü gei u zhütieu re phrewa.

²⁴ Abraham-e puo chü geinu puo zhütieu rekecü ki cie hiethepfüethepfüta.

²⁵ Mu puo nuo Ishmael puo chü geinu puo zhütieu rekecü ki cie kereseta.

²⁶ Sünhie teiso Abraham mu Ishmael unie rei unie zhüre phrelie,

²⁷ mu puo kinu keba thepfumia keba pete, ki nu penuokelie kedieko rei mu chazoumia kinu raka pie khrükelieko rei puo ze di u zhüre phrelie.