Keriekitho 16 - Angami Naga CL (Re-edited) Bible (BSI)

Hagar mu Ishmael Dze

¹ Abram kimia Saraie nuojüpfü puo. Puo kituo Ijiptmiapfü puo nyi, süpfü za Hagar;

² mu Sarai Abram ki, “Harie Jihovae a bu nuo kepenuo khawate; a kituopfü ki vocie; a bu puo geinu nuo ngulie rei si lhomu.” Sitse Abram-e Sarai die zeta.

³ Sidi Abram Kanan kijü nu lhou ketuo teicie kerketa zenu puo kimiapfüe Hagar ze vo Abram bu pie puo kimia chülie.

⁴ Sitse puo Hagar ki vo, ru puo nuonipfülie; puo nuonipfüketa silie tse, puo niepupfü peseta.

⁵ Sitse Sarai Abram ki, “A gei kekrükeshü hau bu n gei pfücie! A a kituopfü khapie n merü gei shü mu puo nuonipfüketa silie tse a pesete. Jihova bu avu donu capiu chüliecie.”

⁶ Derei Abram sie Sarai ki, “Harie kituopfü sü n dzie nu ba; puo gei n thuo n medo-u chüwalie vi ze.” Sitse Sarai hapfü peseta, süla puo bu puo ki nunu tata.

⁷ Jihova dieliemia puoe Shur nu kevo chau rayha nu dzüluo puo khieki nu süpfü ngulie.

⁸ Sidi puoe sie, “Hagar, Sarai kituopfü, no kirapuo nu vor mu kirapuo votuo üzhü ga?” Puoe sie, “Ae a niepupfü Sarai ki nunu tatazhie,” si.

⁹ Jihova dielieue sie puo ki, “N niepupfü ki la volie, di n khapie puo khrükhro balie,” si.

¹⁰ Jihova dielieu puo ki pu di, “A n nuosenuoyie chü pekruo phipie phrü hulie kelho chüshütuo.”

¹¹ Sidi Jihova dielieue puo ki pu sa di, “Harie, no phoupiemo bate, no thepfumia puo penuolietuo mu no puo za pie Ishmael chüliecie; kekreilamonyü Jihovae n mezhieko rünyülieketa la.

¹² Puo nha gada puo tuoi zotuo, puo dzie-e mia pete petsoutuo, mu mia pete dzie rei puo petsoutuo; puo puo siezedzürie pete petsou di lhoutuo” si.

¹³ Süla puoe Jihova puo rüchükeshüu üse, “No El-roi” idi kieta; kekreilamonyü puo sie, “A Ukepenuopfü ngu ketho me mu a puo ngukewa sie rei rhei balie vi zo me?”

¹⁴ Süla dzükhouu za thopie Beer-lahai-roi iwa; süusü Kadesh mu Bered unie donu zhü.

¹⁵ Süsie Hagar-e thepfumia puo penuopie Abram tsü; mu Abram-e puo nuo Hagar-e penuokeshüu za thopie Ishmael chülie.

¹⁶ Siro Abram-e Hagar Ishmael penuopie puo ketsü ki cie hiethethaesorouta.