Keriekitho 15 - Angami Naga CL (Re-edited) Bible (BSI)

Ukepenuopfü Abram Ze Dietseidiekhokelie

¹ Mha hako sie ziemho nunu Jihovae Abram ki, “Michie hiecie Abram, a n zhüu, mu n zhakhra kezhau zo.”

² Derei Abram la sie, “He-i Niepuu Jihova, no kedipuo pie a tsü ta? A tsie rei a nuo jü zocü la, a kayie sü Damaskamia Eliezer zote.”

³ Sidi Abram-e sie, “Noe nuo puorei pie a tsü mote, mu a kinu penuokelie diemia puo thuo a kayie zotatie.”

⁴ Sitse Jihova die puo ki la vorcü, “Themia hau bu n ka welie lho zo. N nuo n noupra puo bu n ka we zotuo.”

⁵ Sidi puo ze chazou vo di, “Tosie tei mehoshü di themvüko phrülie vi ro phrüshücie. N nuosenuoyie bu luko tuoi zotuo ho.”

⁶ Sitse puoe Jihova pelelie, mu süla Jihovae puo üse miatho üta.

⁷ Süsie puoe puo ki “Ae kijü hau pie n bu n vie chütuo üdi Chaldiamia rüna Ur nunu n ze parkeshüu Jihova zo.”

⁸ Derei Abram puo ketso la di, “He-i Niepuu Jihova kedipuo mhie di hau a vie chütuo ücü a silietuo ga?”

⁹ Sitse puoe puo ki, “Teicie seketa thukrüpfü puo, temvükrü puo mu tekuochü puo siro mekhru puo tsiu paruonuo yopuo se a ki vorshücie.”

¹⁰ Süla puoe süko se puo ki voshü, di da kenienie chülie, di tietsapuo pie kekreitsatieu ze kepetsoushü; derei puo perako we dawa mo.

¹¹ Mu tekecü rako tsur kesiamoko gei bakelie ki Abram-e süko whuowa.

¹² Niaki letakezhü ki, Abram-e ze pesou seta, mu harie kemerie mu zeibouikecü puo puo gei vor.

¹³ Sitse Jihovae sie Abram ki, “N nuosenuoyiekoe u kijü kemo puo nu solhimia chü di miadiemia chü di mia bu cie krie dia uko peseketuo si touliecie;

¹⁴ derei a kepejo se uko pesekecü seyieko gei shütuo, süsie uko mhanyi phi di tuo partatuo.

¹⁵ Derei no we n nou mene di n puonuoko ki votatuo; n tsa zenu n khrutuo.

¹⁶ Siro n nuosenuoyieko phou diau sie nu hanu la vortuo, Amormia kejokemou kechü tsie rei tsei moluokecü la.”

¹⁷ Niaki leta di zeibouiketa ki, harie, mikhu miü puo mu mitu puo themuo donu vota.

¹⁸ Sünhie Jihovae Abram ze dietseidiekho puo chülie, di puo ki, “A Ijipt rüu nunu vo kerü kezhau Eufrat rüu ketso,

¹⁹ Kenmiako, Kenizmiako, Kadmonmiako,

²⁰ Hitmiako, Perizmiako, Refamiako,

²¹ Amormiako, Kananmiako, Girgashmiako mu Jebusmiako lhou keba kijü hau pie n nuosenuoyieko tsüwate.”