Keriekitho 14 - Angami Naga CL (Re-edited) Bible (BSI)

Abram-e Lot Kelakeshü

¹ Süki Shinar kediu Amrafel, Elasar nu kediu Ariok, Elam nu kediu Kedorlaomer mu Goim nu kediu Tidal,

² ukoe kedi kekrei pengou: Sodom nu kediu Bera, Gomora nu kediu Birsha, Adma nu kediu Shinab, Zeboim nu kediu Shemeber mu Bela, süu Zoar nu kediu uko ze terhü chüta.

³ Kedi pengoukoe uko rüpfhünuoko ze vor Sidim Razhau, (tsiedo Kesia Dzükezha ücüu) nu kengulie.

⁴ Ukoe cie kerekenie Kedorlaomer khro tuota di cie kerese cie puo petsou sierta.

⁵ Cie keredia cie Kedorlaomer-e puo keze kedi kekreiko ze vor Ashterot-karnaim nu Refako, Ham nu Zuziko, Shave-kiriathaim nu Emimko,

⁶ mu Seir kijüthou geinu Horko penyü zo vo rayha ze ketieriekecü El-paran ketso shüwa.

⁷ Süsie uko rürei lalie di En-mishpat, (süu Kadesh, ükecüu) nu volie, di Amalekmiako kijü pete, mu Hazazon-tamar nu lhou keba Amormia pete penyüwa.

⁸ Süsie Sodom, Gomora, Adma, Zeboim mu Bela, süu Zoar nu kedikoe uko rüpfhünuoko kezu ze vor Sidim Razha nunu

⁹ Elam nu kediu Kedorlaomer, Goim nu kediu Tidal, Shinar nu kediu Amrafel mu Elasar nu kediu Ariok kediko ze terhü chütuo üdi kengulie. Kedi diae pengou ze terhü chü.

¹⁰ Siro alakatar kheho thuo Sidim Razhau tshupfü zhü, süki Sodom mu Gomora nu kediko tatatuoü kesie ki, huomia te thekhe nu leta mu huomia ta kijüthou gei vota.

¹¹ Süki uko ngumvüko vo Sodom mu Gomora-nie nu mha pete va pfülieta, kecüca pete sa;

¹² Abram siezeu nuou Lot Sodom nu lhou baya, mu ukoe puo vie pete valie mu puo te rei sa zeta.

¹³ Derei mia puo talie di vor Amormia Mamre ükecüu phrie seiko khieki lhou keba Ibriu Abram ki rükhruoshü; Mamre mu puo siezenie Eshkol mu Aner; uko liro Abram khriethomia.

¹⁴ Siro Abram-e puo siezeu tezeketa silie tse, puo themia krie se di kerethetha kie kengulie di süko ze luko whuo Dan ketso vo.

¹⁵ Sidi puoe puo themiako keza petselie di pezei ze ngumvümia whuo le di uko penyüwa. Puoe uko whuo se Damaska mhotsa keba Hoba ketso vowa.

¹⁶ Sidi ukoe mha va pfüketa pete kela lalie. Puo siezeu nuou Lot mu puo vieko pete siro thenuko rei mu themia kekreiko rei pete ze la vorta.

Melkizedek Japie Abram Ketsü

¹⁷ Siro Abram-e Kedorlaomer mu kedi kekreiko mho kuolie di la kevor ki Sodom nu kediue Shave Razhau, kedimia Razha irei di kieyakezhau nunu puo ze kesetuoü pra.

¹⁸ Salem nu kediu Melkizedek rei niekhrüda mu khubezu se vor Abram tsü, puoe Kerükrietho Kepenuopfü zievo chüya.

¹⁹ Siro japie puo tsü di, “Kerükrietho Kepenuopfü, tei mu kijü chükeshüu, bu japie Abram ketsüu chülie.

²⁰ N ngumvümia mho kuokelie pie n ketsü, Kerükrietho Kepenuopfü bu thetshepfücie.” Siro Abram-e mha ngukelie nunu ker-zapuo pie puo tsü.

²¹ Siro Sodom nu kediue Abram ki, “Terhü mhavako pete n thuo lielie derei themiako pie a tsücie.”

²² Sitse Abram-e Sodom nu kediu ki,

²³ “A n vie puorei, kelo yopuo morei phikourhü yopuorei lielie lho zo ücü tei mu kijü chükeshü Kerükrietho Kepenuopfü Jihova mhodzünu rüseshüwate. Noe, ‘A la Abram mhanyiliewe,’ ituotalie vicü la.

²⁴ Khriesakoe cükelieko zo moliro a mhapuorei lielie lho. Derei a ze kevo Aner, Eshkol mu Mamre uko ya zo kemosie; uko bu we uko ya pieliecie.”