Keriekitho 13 - Angami Naga CL (Re-edited) Bible (BSI)

Abram mu Lot Unie Kekhoketa

¹ Abram-e puo kimia mu puo vie pete se di Ijipt nunu tuo Negeb nu vota, mu Lot puo ze vota.

² Abram-e kicükiri siro suna mu raka nyi se.

³ Puoe sünunu tuo Bethel tsa vota. Sidi puo thiedzü puo pfheki bakecü Bethel mu Ai-nie donu thechüu nu volie,

⁴ puo thiedzü ruosuoba puo chüpie keba thechüu nu; sidi puo sünunu Jihova za kie.

⁵ Abram ze ketuo Lot rei tekuo, temvü tsiu peri kroko mu pfhekiko nyi.

⁶ Mu unie vieko krathorketa la, unie kenienie la kijüu mereta di kepeza lhou balie reta.

⁷ Süla Abram thupfheko mu Lot thupfheko kegeita. Süki Kananmia mu Perizmia kijü sünu lhou tuo zo.

⁸ Süla Abram-e Lot ki, “Avu sü siezedzürie ze, siro avu mu avu themiako bu kegei tuo hiecie.

⁹ Kijü pete n mhodzüki zhü mo üme? N thuo a kinu krei pratacie. No thevitsa vata ro a thezatsa vatatuo, no thezatsa ro a thevitsa votatuo.”

¹⁰ Sitse Lot-e kijüu mehoshü ru Jordan razhau pete, Jihova zieu, mu Ijipt kijü süu Zoar kevatsa mhiei dzü vi sekecü ngulie. Hau Jihova Sodom mu Gomora pekakewa mhodzü.

¹¹ Süla Lot-e puo thuo Jordan razhau pete kedalie di niathutsa vata. Sümhie di unie kekhota.

¹² Abram-e Kanan kijü nu bata mu Lot vo Sodom kepenuoki Razhau nadiko donu lhouta.

¹³ Ru Sodom nu themiako lhou rüzhü mu Jihova gei phouma pezha seta.

¹⁴ Lot tuoketa sie Jihovae Abram ki, “No n tha nunu tosie pesotsa, pekhrotsa, niathutsa mu niakratsa mehoshücie;

¹⁵ ae n bu n mhipie kengu kijü pete pie no mu n nuosenuoyieko tsütuo, tsiu süu kechachie n vie chütuo.

¹⁶ A n nuosenuoyie chü pekrapie nyophe mhieshütuo, sidi mia puoe nyopheko phrü hulie vi liro, n nuosenuoyieko rei phrülietatuo.

¹⁷ Sielie di tuo kijüu puochapuochie meho vocie, ae süu pie n tsüketuo la.”

¹⁸ Süla Abram-e puo pfheki rhuose Hebron nu phriebo keba Mamre nu vota, di sünu rei puoe ruosuoba puo chüpie Jihova tsü.