Keriekitho 12 - Angami Naga CL (Re-edited) Bible (BSI)

Ukepenuopfü Abram Kekie

¹ Siro Jihovae Abram ki “N rüna mu n seyiemia mu n puou ki khawa di, a kijü puo thapie n kieketuou nu voliecie.

² A n chüpie seyie kezha puo chüshütuo, mu a japie n tsütuo, tsiu n za chü pezhashütuo, sidi n bu theja puo chütuo.

³ Ae japie ja n ketsümia tsütuo mu n kerüsemia rüsetuo; mu n geinu kijü nu kikru pete bu theja ngutuo.”

⁴ Abram kelhouzha cie hietheniepengou keta ki, Jihova puo ki pukeshü mhiei Haran nunu tuota, mu Lot rei puo ze tuota.

⁵ Abram-e puo kimia Sarai, mu puo siezeu nuo Lot, siro Haran nunu kengukelie puo kinyiko pete, mu kituo pete rei zelie di Kanan nu voketuo la tuoshü. Ukoe Kanan nu volie tse,

⁶ Abram-e kijü süu pfüthese Shekem nu keba Moreh phrietsa nu vorlie. Süteiki Kananmia sünu lhou tuo zo.

⁷ Sitse Jihovae Abram pengushü di puo ki, “A kijü hau khapie n nuosenuoyie tsütuo.” Süsie Abram-e sükinu ruosuoba puo chüpie puo pengukeshü Jihova tsü.

⁸ Sünunu puoe tuose Bethel niathutsa kijüthou gei volie di puo pfheki pethoulie, Bethel-e niakratsa mu Ai niathutsa icü nunu, mu sünu rei puo ruosuoba puo chülie di Jihova za kieshü.

⁹ Süsie rei Abram-e tuo Negeb kijütsa va miemie tsuta.

Abram Ijipt nu Ketsu

¹⁰ Siro kijü nu pekrie puo sier, mu süu re seta, süla Abram-e solhimia chü di tsu Ijipt nu lhoutuoü tuota.

¹¹ Puoe Ijipt nu letaketuo ki puo kimia Sarai üse. “Noe thenu kezivipfü puocü a si.

¹² Mu Ijiptmia n ngu tse, ukoe sie, ‘Hapfü puo kimia’ ita mecie, sidi uko a dukhriwatuo derei n bu we rheilietuo.

¹³ Süla noe a üpfü zo üdi puwacie, siro n la ukoe a perheishü mu a gei vishütuo.”

¹⁴ Siro puoe Ijipt nu vorkelie ki, Ijiptmiae puo kimia zivi secü ngulie.

¹⁵ Faro kinu kezhamia kro puo puo ngushü di Faro ki puo ziviu tsheshü, sitse puo ze Faro kinu vota.

¹⁶ Mu puo la Kediu Abram gei vi di, tekuo, thudo, gada puokrü puochü, mithu, gada, kituo thepfu mu thenu tsiu ut rei pie puo tsü sashü.

¹⁷ Derei Abram kimia Sarai la Jihovae thepe kere khapie Faro mu puo kinu themiako pechüta.

¹⁸ Süla Faroe Abram kie ze vor di puo ki, “No kedipuo chüpie a gei shüwata ga? No kiüdi puo üse n kimia üdi pu mota ga?

¹⁹ Kiüdi no, ‘Puoe a üpfülie,’ ishü di a bu puo pie a kimia chütuoü puo zelieta ga? Harie, n kimia sü, puo ze di tuotalie.”

²⁰ Faroe ahza khashü di puo themiako bu, puo mu puo kimia, tsiu puo vie pete sa di ketsewa.