Keriekitho 11 - Angami Naga CL (Re-edited) Bible (BSI)

Babel Tsiepfheu

¹ Siro kijü pete rei die puo mu pfhe puo zo.

² Ukoe niathutsa rühou tuo di Shinar nu kijüthezha puo nu vor lhouta.

³ Sitse ukoe huoniehuo ki, “Úko ita chülie mu rie pevi selie khe,” ilie. Sidi ukoe ita pie ketsie sou chülie mu süko nyhü kemaketuo la nyoba selie.

⁴ Süsie ukoe “Úko nadi puo chülie mu sünunu tsiepfhe pfhe kho teiko thulie di u za chü kemeyielie mu úko rei kijü zieu gei kezakezi tuota moketuo chülie khe,” ilie.

⁵ Süsie Jihovae themiako chüse keba nadi mu tsiepfheu mehotuoü ker.

⁶ Sitse Jihovae sie “Hako themia kro puo zo mu uko die rei puo zo, hauha uko mhatho therieu zo. Cha mo di ukoe chü kenyü pete chülie vi partatuo.

⁷ Kerlie, úko ke di uko die bie kebvüwa di uko bu huoniehuo die silie mota khe.”

⁸ Sidi Jihovae uko pfüphropie kijü lukihaki shüwata di uko bu nadiu chülie mota.

⁹ Süla nadiu za pie Babel chüte, kekreilamonyü Jihovae themiako die bie kebvüwa mu sünunu Jihovae uko bie kezapie kijüu gei lukihaki shüwaketa la.

Shem Nuosenuoyieko

¹⁰ Hako Shem nuosenuoyieko. Dzüdiu sie cie kenie cie, Shem-e puo kelhouzha cie krie puo ki puo nuo thepfumia puo, Arpakshad ngulie.

¹¹ Süsie puoe cie krie pengou lhou sa di puo nuo kekrei thepfu mu thenu ngu salie.

¹² Arpakshad-e cie serepengou ki puo nuou Shela ngulie.

¹³ Siro Arpakshad-e Shela penuokelie sie cie kriedia di se lhou sa di puo nuo kekrei thepfu mu thenu ngu salie.

¹⁴ Shelae cie ser ki puo nuou Eber ngulie,

¹⁵ mu Shelae Eber penuokelie sie cie krie dia di se lhou sa di puo nuo kekrei thepfu mu thenu ngu salie.

¹⁶ Eber-e cie seredia ki, puo nuou Peleg ngulie

¹⁷ mu Eber-e Peleg penuokelie sie cie krie dia di ser lhou sa di puo nuo thepfu mu thenu ngu salie.

¹⁸ Peleg-e cie ser ki Reu ngulie;

¹⁹ mu Reu penuokelie sie Peleg-e cie krie kenie di thepfü lhou sa di puo nuo thepfu mu thenu ngu salie.

²⁰ Reue cie serekenie ki puo nuou Serug ngulie,

²¹ mu Nahor-e Tera penuokelie sie cie krie kenie di thenie lhou sa di puo nuo kekrei thepfu mu thenu ngu salie.

²² Serug-e cie ser ki puo nuou Nahor ngulie,

²³ mu Serug-e Nahor penuokelie sie cie krie kenie lhou sa di puo nuo kekrei thepfu mu thenu ngu salie.

²⁴ Nahor-e cie mepfüethepfü ki puo nuo Tera ngulie,

²⁵ süsie puoe cie krie puo di kerethepfü lhou sa di puo nuo thepfu mu thenu ngu salie.

²⁶ Terae cie hiethenie ki puo nuo Abram, Nahor mu Haran hako ngulie.

Tera Nuosenuoyieko

²⁷ Hako Tera nuosenuoyieko: Puoe Abram, Nahor mu Haran-nuoko puou mu Haran-e Lot puo.

²⁸ Haran-e puo thuo puo rüna, Chaldia nu keba Ur rüna, puo kepenuo chüu nunu puo puo mhodzü siata.

²⁹ Abram mu Nahor unie thenu lielie. Abram kimia za Sarai mu Nahor kimia za Milka. Hapfü nuo puo liro Haran, Milka mu Iska-nuo puou.

³⁰ Derei Sarai nuojüpfü puo; puo puo nuo jü.

³¹ Siro Terae puo nuou Abram mu puo tsuu Haran nuou Lot siro puo miepfü Abram kimia Sarai, zelie di Chaldia nu keba Ur rünau khawa di Kanan kijü nu voketuo la tuota; derei uko Haran nu vor di sünu lhou bata.

³² Siro Terae puo kelhouzha cie krie kenie di pengou ki Haran nunu siata.