Kediko Kerieu 9 - Angami Naga CL (Re-edited) Bible (BSI)Ukepenuopfü Solomon Pengu Lakeshü ( 2 Seyie 7:11-22 ) 1 Solomon-e Jihova kiu, kediu kiu mu puo le keba pete chü tseilie. 2 Süki Jihovae va kenieu Solomon pengu lashü, puoe Gibeon nunu puo pengukeshü tuoi. 3 Mu Jihovae sie puo ki, “A mhodzünu no chakeshü mu n mezhiemelokeshü a siliete; a za kechachie khapie balietuoü, no ki chükelie hauha ae chü kemesawate ho; mu a mhi tsiu a melou sünu ba sei zotuo. 4 Siro mhanuü noe n puo David ketuo tuoi, a mhodzünu tuolie, thenou mezhü mu miatho, mu a n ki pukeshü pete chüüzelie, mu a zhoko tsiu ahzako se balie ro, 5 ae Israel mho kechachie n kediba pesieshütuo, ae n puo David ki phrakeshü, ‘N sie Israel kediba gei balieketuo miapuorei jüketa chülie lho,’ idi phrakeshü mhiei chüshütuo. 6 Derei mhanuü noe a siemedzi mo di rürei kekreitsa vota, no morei n nuonuo rei, sidi a pie n mhodzünu keshü dieko tsiu a zhoko mu a khakeshüko chüüzelie mota, di vo terhuo kekrei lie chü tsiu süko rüsuotuota ro, 7 süsie ae khapie uko ketsü kijüu nunu Israel dathewatuo; mu ki hau la, ae a za la chü kemesakelieu a a mhodzü nunu chü kelhouwatuo; sidi Israel bu mia pete donu miadzeüse tsiu mia krenyü chü tuotatuo. 8 Siro ki hau peruopie kepuwatuo, sidi puokhie kevo khe u ngo zo ‘ish’ chü di sie: ‘Kiüdi Jihovae kijü hau gei mu ki hau gei haite shi ha?’ ituo. 9 Sitse ukoe sie, ‘Kekreilamonyü ukoe Jihova uko Kepenuopfü, Ijipt nunu uko puonuoko ze parkeshüu khakegewate, tsiu terhuo kekrei zete, sidi süko rüsuote, mu süko lie chü tuote, süla Jihova mha kesuo hako se uko gei shüshüte,’ situo.” Solomon Mhatho Kekreiko 10 Teicie mepfü tseitakezhü ki, Solomon-e ki kenienie Jihova kiu mu kediu kiu chülieta. 11 Mu Tur nu kediu Hiram-e sedarko, saipresko mu suna, puoe lie kenyü de pie Solomon tsüshü, mu Kediu Solomon-e Galil kijüu rüna mepfü pie Hiram tsü. 12 Derei Hiram-e Tur nunu par Solomon-e pie puo ketsü nadiko meho sie, ru süko ngupie puo neilie mota. 13 Süla puoe sie, “A siezeu, no pie a ketsü nadi hako kicü kro puo mu?” sita. Süla puoe kijü süko üse Kabul üdi kieketa thie rei si tuoya zo. 14 Siro Hiram-e suna talent krie puo di mepfü ketsepie kediu tsü. 15 Siro kediu Solomon-e khezhanuo khruokecü puoca hako la: Jihova kiu chüketuo la, puo thuo puo kiu la, Milo, Jerusalem dahou, Hazor, Megido mu Gezer la. 16 (Kekreilamonyü Faro Ijipt nu kediu kho di Gezer lielieta di mi pie süu thewa, sidi nadi nu keba Kananmiako dukhriwa, di süko methuo pie puo nuopfü Solomon kimia tsüwata). 17 Süla Solomon Gezer mu Bet-horon kerünuo nu kebau, 18 mu Tamar kijü rayha nu Balat, 19 mu Solomon-e mha kengukecü nadi pete, siro puo kierbagei la nadiko mu puo kierkesemia la nadiko, mu Solomon-e Jerusalem nu ki chükecü pete, mu Lebanon nu, tsiu puo rüvie kijü pete chü lalie. 20 Siro Amormia, Hitmia, Perizmia, Hivmia, mu Jebusmia, Israelmia nuonuo kemo khawaketako, 21 kijü nu uko sietsa khapie bawaketa uko nuosenuoyieko, Israel nuonuokoe peka tseilie kenjüketako, süko gei Solomon-e lietho kechü khezhanuo khruo, thie ketso rei situo zo. 22 Derei Solomon-e Israelmiako bu we miadie chü mo; derei ukoe terhü themia chü tsiu puo kituomia, puo khro kezhako mu kriemhokezhako, puo kierbagei kekhakecüko mu kier themiamia chü. 23 Solomon mhathoko mhokezhako donu pehüko hako, krie pengou di hiepengou, hakoe themia mhakechüko kekha. 24 Derei Faro nuopfüe David nadiu nunu par di Solomon-e puo la chükelie puo kiu nu vorlie; sidi puoe Milo chülie. 25 Siro teicie puo nu va se Solomon-e kethe ruosuo mu vitho ruosuo, puo ruosuoba chüpie Jihova ketsüu geinu Jihova mhodzü kethengu thepie ruosuo chü. Sidi puoe kiu chü tseilie. Solomon Thelhi kechü 26 Siro kediu Solomon-e Ezion-geber nu rou kro puo chü, süue Elot khieki, Kemerie Dzükezhau khie, Edom kijü nu ba. 27 Siro Hiram-e puo kituomia ketsepie rou nu shü, routhumia dzükezha dze kesimia, Solomon kituoko ze dituo. 28 Mu ukoe Ofir nu vo, sidi suna talent krie dia di mepfü pielie, sidi süu se kediu Solomon ki vor. |
The Bible Society of India
© 2023, Used by permission. All rights reserved. More
Bible Society of India