Kediko Kerieu 7 - Angami Naga CL (Re-edited) Bible (BSI)

Solomon Kediki mu Ki Kekrei Chü Sakelie

¹ Siro Solomon cie kerese puo thuo puo kiu chü bata, sidi puoe puo ki pete chü tseilie.

² Puoe Lebanon Ketsa Kiu rei chü, puo cha thu krie puo, mu puo zha thu hiepengou, mu puo rükrie thu ser, sedar co cha dia gei mu sedar kirieko coko gei khriepfü ba.

³ Siro süu kirieko mho gei sedar pie da, mu süko cha puo nu kerepengoungou di co hiediaepengou gei ba.

⁴ Siro sünu khirki cha se chü ba, tsiu kezie-e puocha se chü di ler va ba.

⁵ Siro kikhako pete mu coko pete puocha puozha ketou khirkiko rei sa, tsiu kezie-e puocha se chü di va ba.

⁶ Siro puoe Coko Kibou puo chü, süu puocha thu hiepengou, mu puozha thu ser. Siro süko mho keya puo sa.

⁷ Sünu puo coko mhodzü kifü puo ba, mu puoe dienya kecüketuo la Kediba Kibou puo chülie, Kethoca Kibou puo rei sa, siro süue kiluou tietsatiepuo nu vo kekreitsatie ketso sedar pie khra.

⁸ Puo keba kiu sietsa kibou kekrei puo ba, süu mhatho kemhie di chü. Süu Solomon-e Faro nuopfü, puo liepie puo kimia chükeliepfü, la rei sa ki puo chü, süu kibou hau kemhie di chü.

⁹ Mha hako pete ketsie puoma kere se pie chü, ketsie mejü di phrokelie kemhiei, seigeizhie pie geilie, puonu mu puomho, puo mvüdze nunu vo puo tsüse ketso, sükemhie di chazou nu vo di kibou kezhau ketso.

¹⁰ Puo mvüdze ketsie puoma kere se se chü, ketsie kezha thu ker, tsiu thu thethatha.

¹¹ Siro puo tsü gei ketsie puoma kere, ketsie phro kewapfü tuoikecü, mu sedar tuoikecü ba.

¹² Siro kibou kezhau whi kevo-u ketsie phrokecü pie chükecü cha se, siro sedar kirie cha puo, Jihova kiu puo nu, tsiu kifükhro rei sa.

Rüsuokiu nu Hiram Mhatho

¹³ Siro Kediu Solomon mia ketseshü di Tur nunu Hiram ze vorlie.

¹⁴ Puoe Naftali yiemia samipfü puo nuo, tsiu puo puoe Turmia, mese chüyakezhamia puo: Mhasi mu kesikele puo tshupfü ketuomia puo, mu mese mhatho pete chü si. Puoe kediu Solomon ki vor, sidi puo mhatho pete chü.

¹⁵ Puoe mese co kenie selie, yopuo cha thu kerethetha, mu kero puocha thu kerekenie pie süu whi vo.

¹⁶ Conie tsügei seketuo la mese lhopie puo tsüse kenie chülie; puo tsüse puo rükrie thu pengou mu kekreiu tsüse rei thu pengou rükrie.

¹⁷ Süsie puoe dorü puokhu kekreikecü, mu rohou kedoukecüko pie conie tsü seketuo la chülie; puo tsü kese puo la thenie mu kekreiu la rei thenie idi.

¹⁸ Tsiu puoe conie pesielie, sidi dorü puo mhogei puocha kenie chüpie whishü, turaü pouko pie pesogei puo tsüseu wheshüketuo la, siro sütuoi puo tsüse kekreiu la rei chülie.

¹⁹ Siro kifükhro co tsüko mhogei kebako rhipie terhuobiepou kemhiei, thu dia idi chülie.

²⁰ Siro conie tsügei turaü rhi sa pie ba, tsiu dorü khieki metou kebau mho ba; tsiu turaü rhiko co kekreiu houpfü keba puo cha chü keba krie kenie ba.

²¹ Siro puoe rüsuoki kifükhro co seshü, mu puoe co thezatsa kebau rei seshü, sidi süusü za thopie Jakin chülie, siro puoe co thevi tsatieu seshü sidi süu za thopie Boaz chülie.

²² Siro coko mhogei terhuobiepou rhishü, sümhie di coko chü tseilie.

²³ Süsie puoe mha lhopie dzükezha puo chü, puokhie tietsapuo nu vo kekreitsa ketso thu ker, süusü puokhie houpfü votso, mu puo rükrie thu pengou, seiro puocha thu ser pie süu houpfü ba.

²⁴ Siro süu houpfü keba puokhieko khro seipie da voshü, sei süko thu kerür, dzükezhau houpfü ba; süu dakeshü cha kenie chü.

²⁵ Süu pedo kerekenie gei thatha, se-e pesotsa meho, se-e niakratsa meho, se-e pekhrotsa meho, mu se-e niathutsa meho ba; sidi dzükezhau pie uko mhogei shüpie ba, siro uko sietsatie-e puonutsa bata.

²⁶ Mu süu puo keshü dziezhüne puo mese, siro puo khie-e tehie khie kemhiei, süu terhuobiepou rhi, süu bath nyie kerekenie balie vi.

²⁷ Puo mese pie puoba ker chülie, puoba puoe puo cha thu dia, puo kezha thu dia mu puo rükrie thu se.

²⁸ Puo bako hakemhie di chülie; sükoe puo touchako ba, mu puo touchako pie puokhie kehouko nu ba;

²⁹ mu puokhieko donu puo touchako gei loshako, thudoko, mu cherubnie ba. Puo khieko gei, loshako mu thudoko mho mu puo khro rei kemenuo mhatho huo chü.

³⁰ Sizomonyü puoba puo gei mese thuo dia mu mese khou ba, mu puoke diako nu dzieteikhou khro phitouko ba, mu phitouko puo khu thupie ba.

³¹ Puo tsüseu nu keba puotie kecieu mho thu puo ba; puotie kecieu rei puobau kechü mhie, merü, thu puo di puotie meya, mu kecieu gei rei puokhie mharhiko puoke dia chü mu merü mo.

³² Siro süko khro nu mhathuo dia ba, tsiu mhathuo peteko puo mvüdzeu ze di puochü; mu mhathuo puoe puo rükrie thu puo di puotie.

³³ Mhathuoko chüpie kierbagei thuo ze kemhie, süko keteko, puo thuo houpfü kebako, mhathuo seiko mu puo thuo metsuo nu kebako pete mha thepezha pie chü phre zo.

³⁴ Puo bau puopuokecü puo kekheko nu puo keteu dia; puo kete süko puo bau ze kekhie.

³⁵ Puo bau mhogei mha kemetou thu puotie rükriecü puo ba, sidi puo mvüdzeu mhogei puo keteko siro touchako süu ze keze puo chü.

³⁶ Sidi puo keteko siro puo touchako nu cherubnie, loshako, kukuoboko, donu kemeyau ze di lutsahatsa mharhi rhi vo.

³⁷ Hai di puoe puo ba ker chülie; süko pete rei puozho puo, puo kemejü puo, mu puorhi puo phre.

³⁸ Süsie puoe mese pie mhakhou ker chülie; mhakhou puo nu bath hiedia balie kevi chü; sidi mhakhou puo nu thu dia sidi puo mvüdze kerko gei mhakhou puopuo ba.

³⁹ Siro puoe puo mvüdzeko pengou pie kiu pekhrotsa shü, siro pengou pie pesotsa shü, siro puoe dzükezhau pie kiu niathu pekhrotsa puoketho nu shü.

⁴⁰ Hiram-e galiko, mha keka vienyako, mu mhakhouko chülie. Sükemhie di Hiram-e Solomon Kediu la Jihova kiu mhatho pete chü tseilie.

⁴¹ Puo co kenie chükelienie, siro co kenienie mezü gei keba puo khou kenienie, tsiu puo khou kenie chükelienie se conie mezü gei keba wheketuo la dorü.

⁴² Siro dorü nie la turaü krie dia donu puo la turaü cha kenienie, süusü puo conie gei khounie wheketuo la;

⁴³ Puo mvüdze kerko, siro puo mvüdze gei keba mhabou kerko;

⁴⁴ dzükezha puo, siro süu khro pedo kerekenie ba.

⁴⁵ Sidi galiko, mha keka vienyako, mu mhakhouko, mhabou hako pete Hiram-e Solomon Kediu la Jihova kiu kechü, mese phriephrieikecü se chü.

⁴⁶ Kediue süko pie Jordan razha nu shü, Sukot mu Zarethan nie donu rüga kijü nu.

⁴⁷ Solomon-e mhabou hakoha mejü mo, kekreilamonyü süko krathor zeru; mese mesi phrülie kenjüta.

⁴⁸ Sidi Solomon-e Jihova kinu keba mhabou pete chülie: Suna pie kechü ruosuoba, kepekieniekhrüda la suna pie kechü mizhü.

⁴⁹ Suna rüpie pie kechü mitubako, thezatsa pengou mu thevitsa pengou, kemesa sie rei mesakecü mhodzünu, nyiepouko, mibouko, siro suna pie kechü mha kebe nyako,

⁵⁰ tehieko, tsübeko, mhakhouko, kecieko siro suna rüpie pie kechü kethengu ketheliko; tsiu suna pie kekhakecü, kinutshekou kikhako la, kemesa sie rei mesakecüu mu thechü kemesau mu rüsuokiu kikhako la.

⁵¹ Hakemhie di Kediu Solomon-e Jihova kiu mhatho pete chü tseilie. Solomon-e puo puo David-e chü kemesa se ketuo, rakachü, suna mu mhakhouko se vorlie sidi süko khapie Jihova kiu nu kinyibou nu shüwa.