Kediko Kerieu 6 - Angami Naga CL (Re-edited) Bible (BSI)

Solomon-e Rüsuokiu Kechü

¹ Si tuo di Israelmiako Ijipt nunu ta parkelie cie krie dia di hiethetha cie, Solomon-e Israel mho dikelie cie dia cie, Ziv-u khrü, süusü khrü kenieu, puoe Jihova kiu chü sedelie.

² Tsiu Kediu Solomon-e Jihova la ki chükecü puo cha thu hiesorou, puo zha thu mepfü, tsiu puo rükrie thu ser.

³ Siro rüsuokiu mhodzü kifükhro-u thu mepfü, kiu puo zhau ze ketou, tsiu kiu mhodzü puo kesouu thu ker.

⁴ Kiu la puoe kezie bu leketuo khirki chüshü.

⁵ Puoe sozhau peze di kibou chüpie houshü, kiluo mu kemesa sie kemesau, puoe kibou chüpie süko houshü.

⁶ Kibou kerünuotho-u thu pengou meya, tsiu metsuou thu sorou meya, tsiu seu thu thenie meya, kekreilamonyü kiu sozha chazoutsa puoe mha kemengupfü khashülie, süusü kiphiko se vo di kiu sozha ze ketouwa moketuo la.

⁷ Kiu chükecü ki, tsiekriechü nu jo toulieketa pie chü, sikelie la süu chü keba ki, metevü morei seidurü tsiu thegi pie kechü pfhe kiu nu si mota.

⁸ Kilha metsuo nu kele kikha ki pekhrotsa ba, mu chapra chü whi se kilha metsuou nu praya mu kilha seu nu rei sidi khoya.

⁹ Sidi puoe kiu chülie, mu süu chü tseilie, sidi sedar kirie mu sedar la pie kiu khrulie.

¹⁰ Puoe kibouko chüpie kiu pezeshülie, puo rükrie thu pengoungou mu sükoe sedar seiu liepie kiu gei khriepfü ba.

¹¹ Sitse Jihova die Solomon ki vor di sie,

¹² “No ki chü keba hau, mhanuü noe a zhoko nu tuolie, tsiu ahzako zelie, siro a diekhakeshüko nu tuolie liro, a a die n puo David ki pukeshüu n gei chüshütuo.

¹³ Ae Israelmia nuonuoko donu tuolietuo, tsiu a themia Israelko khawalie lho zo,” si.

¹⁴ Sükemhie di Solomon kiu chülie mu süu chü tseilie.

¹⁵ Tsiu puoe kiu puo nu sozhako, sedar la pie dashü, kiluou nunu kiluomhoya ketso; puonutsa sei pie khrawa, tsiu kiu kiluou saipres la pie khrawa.

¹⁶ Siro puoe kiu khietsa thu mepfü chüshü, kiluou mu sozhako sedar la pie chüshü, puoe puonukou rei chüshü, thechü kemesatho chüu la rei sa.

¹⁷ Siro kiu, süusü mhodzü keba kemesachüu puocha thu hiedia.

¹⁸ Siro kiu puonukou nyiepou wekeba mu poukeba rhikecü pete sedar phre zo; ketsie puorei ngu mo.

¹⁹ Siro puoe puonukou rei kinutshekou nu Jihova dietseidiekhobouu khashütuo üdi kemesachüu keselie.

²⁰ Kemesachüu puonutsatie puocha thu mepfü mu puo zha thu mepfü, tsiu puo rükrie thu mepfü, mu puoe suna pie puomho dashü; sidi ruosuobau sedar pie dawa.

²¹ Siro Solomon-e kiu nutsa suna kemesatho pie dawa, mu puoe kemesachüu sierei mesakecüu mhodzütsa suna kedoukecü pie kha kekreiwa, sidi puoe süu mho suna pie dawa.

²² Süsie puoe kiu pete suna pie dawa, kiu pete chü tseilie kemochie, siro kemesachüu nu keba ruosuobau pete puoe suna pie dawa.

²³ Siro kemesachüu sie rei mesakecüu nu puoe oliv sei pie cherub kenie chülie, puo rükrie thu ker phre.

²⁴ Siro cherub puoe puoshü thu pengou, mu cherub shü kekreiu thu pengou, puoshütie tsatie puo nu vo puoshütie kekreitsa ketso thu ker.

²⁵ Siro cherub kekreiu rei thu ker, cherub kenienie rei unie kemejü puo zo mu puo kecükezha rei puo zo.

²⁶ Cherub puoe puo rükrie thu ker, mu cherub kekreiu rei sükemhie zo.

²⁷ Puoe cherubnie pie kiu kesoutho nu shü, sidi cherubnie shü kelha, sidi puoshü puo bu vo sozha nyü phre, siro cherub kekreiu shü bu vo sozha kekreitsa nyü, siro unie shüe kiu metsuo nu huoniehuo nyü.

²⁸ Siro puoe suna pie cherubnie gei dashü.

²⁹ Siro puoe kiu sozha peteko nu cherubnie mu kukuobo mu nyiepou poukeba rhipie puonutsa tsiu puomhotsa shü.

³⁰ Tsiu kiu kiluou puonutsatie siro puomhotsatie puoe suna pie dashü.

³¹ Siro kemesachü metsuou nu leketuo la kikhako puoe oliv sei pie chü; kiprüu mu puo tsei conie donu kemeyau sozhau pengou-zapuo.

³² Puoe kikhanie rei oliv sei pie chü; siro puoe sünie gei cherubnie mu kukuobo mu nyiepou poukeba rhishü, sidi suna pie süko gei dashü, tsiu suna kezapie cherubnie mu kukuoboko gei dashü.

³³ Siro puoe ruosuoba kiu kikha coko, sozha dia-zapuo oliv sei pie chü.

³⁴ Mu kikhanie saipres sei se chü; kikha puoe puo rükhre kenienie mu kikha kekreiu rei puo rükhre kenienie

³⁵ Puoe sügei cherubnie mu kukuobo mu nyiepou kepou rhishülie; sidi rhipie keba süko mho suna pie dashü.

³⁶ Tsiu puoe kiluo puonutsa kebau mu ketsie phrokelie pie cha se chü mu sedar kirieko pie cha puo chüshü.

³⁷ Cie dia cie, Ziv-u khrü Jihova ki mvüdzeu dze tseilieta.

³⁸ Siro cie kerepuokrü cie, Bul-u khrü süu khrü thethau nu, kiu mha peteko nu mu süu rhiu nu kemhie, chü tseilie. Puoe cie thenie süu chü bata.