Kediko Kerieu 5 - Angami Naga CL (Re-edited) Bible (BSI)

Solomon Hiram Kediu Ze Kepfhekhokelie

¹ Sitse Hiram, Tur nu Kediu puo kituoko ketsepie Solomon ki shü; puoe uko puo kedapie puo puo sou nu kedi chü baketa sicü la; kekreilamonyü Hiram-e puotei pete nu David khriethomia zo.

² Sitse Solomon-e die ketsepie Hiram tsü di sie,

³ “Jihova uko khapie puo phizho chüwa kemochie, a puo David-e puo khie puo mhou pete nu terhü kechü la ki puo chüpie Jihova puo Kepenuopfü za nu shülie lhoketa dze no si ba.

⁴ Derei tsie we Jihova a Kepenuopfüe lutsahatsa rei kerülei kha a tsüshüte, sidi mia a ngukemvü rei jü morei mha kesuo rei vor mote.

⁵ Süla a ki puo chüpie Jihova a Kepenuopfü zanu shüketuo medoliete, süsü Jihova a puo David ki pukeshü: ‘N nuou a puo pie n kediba gei shüshüketuou, puoe ki puo a za nu chülietuo.’

⁶ Süla no tsie a la uko bu Lebanon nu sedarbo wishüketuo die khashücie; mu a kituokoe n kituoko zetuotuo, mu no n kituoko zha chiekeshü pete chüshü n tsütuo; kekreilamonyü hieko donu miapuorei Sidonmia kemhiei sei wi sikecü ba mokecü no si ba eru,” sishü.

⁷ Siro Hiram-e Solomon die silie tse, puo nei phita, sidi sie, “Thie Jihova bu zapuzayie chüliecie; puoe themia kekra hakoha la nuo mhakesi puo pie David tsükeshü la” sita.

⁸ Sidi Hiram-e Solomon ki mia ketseshü di sie, “No a ki ketsekeshü dielieu a sishüte; mu ae no sedar sei mu Fir sei dze la n kemengu pete chüshü zotuo.

⁹ A kituokoe süko Lebanon nunu se ker dzükezha nu shütuo, mu ae süko dzükezha nunu pekrupie no a ki pukeshüra shüshütuo, sidi sünunu a süko khashüwatuo, mu no süko ngulietuo, mu noe kecükekrie pie a kinumiako tsü di a menguko chü tseituo,” si.

¹⁰ Sidi Hiram-e sedarboko mu Firboko Solomon kemengu de chüshü tsü,

¹¹ tsiu Solomon-e Hiram kinumiako la kecüca thoulha kemejü nyie mepfü, siro tier kevi kemejü nyie mepfü khashü. Hakemhie di Solomon-e teiciekepra pie Hiram tsü.

¹² Tsiu Jihovae phrakeshü tuoi, mhasi pie Solomon tsü, tsiu Hiram mu Solomon unie donu kezekevi balie; mu unie-e keze kedietelie.

¹³ Tsiu kediu Solomon-e Israel pete ki khezhanuo kekhruo mhatho puo khashü; tsiu khezhanuo kekhruo themia nyie ser.

¹⁴ Sidi puo süko ketsepie Lebanon nu shü, thekhrü puo nu mia nyie kerür idi, khrü puo ukoe Lebanon nu balie, mu khrü kenie kinu balie, Adoniram bu khezhanuo mhokezha chü.

¹⁵ Siro Solomon-e thepie kepfü mia nyie hiethenie mu kijüthouko gei ketsie kechümia nyie hiethetha rei ba.

¹⁶ Sütsügei rei, themia mhakechüko kemeho, Solomon themia kezhako mhatho kemeho mia nyie se di krie se.

¹⁷ Kediu diekhakeshü nunu, ukoe ketsie kezhazhakecü, puoma kere, mu ketsie phrokewa pie kiu mvüdze chütuoü se vorlie.

¹⁸ Sidi Solomon kituomiako mu Hiram kituomiako mu ketsie kebiemiako süko phrolie, sidi ukoe kiu chütuoü seiko mu ketsieko keselieta.