Kediko Kerieu 4 - Angami Naga CL (Re-edited) Bible (BSI)

Solomon Khro Kezhako Mha kesekecü

¹ Kediu Solomon-e Israel pete mho kedi chü,

² Siro hako puo themia kezhako: Zadok nuou Azariae zievo chü.

³ Shisha nuonie Elihoref mu Ahija bu kepethanie chü; Ahilud nuo Jehoshafat bu kethuu chü.

⁴ Jehoiada nuou Benaiae rüpfhünuoko mhokezha chü; Zadok mu Abiathar unie-e zievo chü.

⁵ Nathan nuo Azariae kezhako mhokezhau chü. Nathan nuo Zabud-e zievo mu kediu khrietho-u chü,

⁶ Siro Ahishar-e kedikiu kemeho-u chü; tsiu Abda nuou Adoniram bu mhakechüko meho.

⁷ Solomon-e Israel pete mhokezhamia kerekenie khapie balie, süko bu kediu mu puo kinu la kecüca keseya, mia puoe teicie puo nu khrü puo meseseya.

⁸ Uko zae hako: Efraim kijüthouu nu Ben-hur;

⁹ Ben-deker-e Makaz, Shalbim, Betshemesh mu Elon-bet-hanan nu;

¹⁰ Ben-hesed-e Arubot nu, (puo kitsa Soko mu Hefer kijü pete puo vie);

¹¹ Ben-abinadab-e Nafat-dor pete nu, (puoe Solomon nuopfü Tafat liepie puo kimia chü);

¹² Ahilud nuou Bana, puo kitsa Tanak mu Megido, mu Bet-shean pete, süu Zarethan khieki Jezril khro, Bet-shean nunu vo Abel-mehola ketso, Jokmeam tse kevo thechüu ketso.

¹³ Ben-geber, Ramot-gilid nu; (puo kitsa Jair Manasseh nuou rünako, süko Gilid nu ba; siro puo kitsa Argob kijüko Bashan nu kebako; rüna kezha hiesorou dahouko mu mese cakhako chükecü ba).

¹⁴ Ido nuou Ahinadab, Mahanaim nu;

¹⁵ Ahimaz, Naftali nu (puoe Solomon nuopfü Basemat liepie puo kimia chü.)

¹⁶ Hushai nuou Bana, Asher mu Bialot nu;

¹⁷ Parua nuou Jehoshafat, Isakar nu;

¹⁸ Ela nuou Shimei, Benjamin nu,

¹⁹ Uri nuo Geber, Gilid kijü nu, Sihon Amormia kediu rüna nu mu Og, Bashan nu kediu, siro Juda kijü nu kezhamia puo rübei zo.

Solomon Mhasi mu Puo Kedi Vi Phikecü

²⁰ Juda mu Israel-e krapie dzükezha khie huocanyo mhie zo, ukoe cüükrie di uko nei phi ba.

²¹ Solomon-e Eufrat nunu vo Filistin kijü ketso, tsiu Ijipt tierie ketso kedirüvie peteko mho kedi chü; sükoe Solomon kerhei chie khezhanuo se vor puo tsü mu puo lie chü.

²² Siro Solomon kecüca khunhie puo la thou kevitho kemejü ser, tsiu kecüca kemejü hiesorou,

²³ thudo keluo ker, siro lie nunu pedo mepfü, tekuo krie puo, sütsügei tekhra, thelou, mu chüzhie, tsiu thevü puo phou kevi sa.

²⁴ Kekreilamonyü puoe Eufrat rü niakratsa peteko nu, Tifsa nunu vo Gaza ketso, Eufrat niakratsatie kediko pete mho kekha, siro puo khie lutsahatsa pete nu kezekevi ba.

²⁵ Siro Juda mu Israel, Dan nunu vo Beersheba ketso, themia pete u khubebo khro mu u chiedebo khro nu Solomon kerhei chie lhou khrukhre balie.

²⁶ Siro Solomon-e puo kierbagei la kier ki nyie hiedia mu kier themia nyie kerekenie ba.

²⁷ Kezhamia sükoe kediu Solomon mizhü ki kevormia pete la, thekhrü u meseu nu keseshüya; ukoe mhapuo nu rei tsopfhütaya mo.

²⁸ Ukoe kierko la mu khunuoko la barli mu rügu u thuo u mese nu se vor kezhamiako kebachü nu shüshüya.

²⁹ Siro Kepenuopfü mhasi tsiu kesikele kha phishü Solomon tsü, siro puo kesikele meyakecü bu dzükezha khie huocanyo kemhieshü zo.

³⁰ Süla Solomon mhasi-e niathutsatie themiako tsiu Ijipt nu mhasi pete ki rei vikuo.

³¹ Kekreilamonyü puoe mia pete ki rei, Ezrahitmia Ethan-u ki rei, Mahol nuonuoko Heman, mu Kalkol mu Darda, hako ki mhasikuo; sidi puokhieümhou seyie pete nu puo za meyie vota.

³² Siro puoe mhasidie nyie se pushü; tsiu puo ütsaliko nyie puo di pengou.

³³ Puo seibo dze, Lebanon nu keba sedarbo nunu vo hisop nhapfü dahou nu tsü paryakezha dze pu, tsiu puoe khunuo dze, mu pera mu gou ketuo khunuoko mu khuoko dze pu.

³⁴ Siro kijü pete nu mu kedimia pete donunu themia Solomon mhasi rünyütuoü vor.