Kediko Kerieu 3 - Angami Naga CL (Re-edited) Bible (BSI)

Solomon Faro Nuopfü Liekelie

¹ Solomon-e Ijipt nu kediu Faro ze kekhrietholie di Faro nuopfü lielie, sidi puo ze David nadiu nu vor bata, puo kiu, siro Jihova kiu mu Jerusalem khieümhou dahou chü tseilie kemochie.

² Themiakoe thechü kerükriera nu ruosuo chü, kekreilamonyü süki ki puorei chüpie Jihova za nu khapie ba mo.

Solomon Jihova Ki Mhasimhale Kecha

³ Tsiu Solomon-e Jihova khrie, puo puo David zho-u medzi di; puoe thechü kerükrieko nu ruosuo chü mu kethengu thekecü rübei zo.

⁴ Siro kediu Gibeon nu ruosuo chütuoü vo, süue thechü kerükrie kezha puocü la, Solomon-e ruosuoba sügeinu kethe ruosuo nyie puo chü.

⁵ Gibeon nunu Jihova theva gei Solomon mho geinu vor puo pengushü; mu Ukepenuopfüe sie, “A bu kedipuo pie n tsünu shiü chaliecie,” si.

⁶ Sitse Solomon sie, “No n kituou David a puou, puoe n mhodzünu miatho tsiu mezhü, mu puo nou mezhü di n ze ketuo tuoi, noe puo ngumezhiethorkecü thashüte; siro noe puo la ketseikevi hau chüshü, süusü thie tuoi, noe puo nuo thepfumia pie puo tsü di puo bu puo kediba gei batuo üshü.

⁷ Mu tsie, he-i Jihova a Kepenuopfü, noe n kituou kediu chüpie tsie puo bu a puo David sou nu shüshüe, ae nhicu zoluo; ae keprakele tei puorei si mie,

⁸ tsiu n kituoue no kedakelie n themiako donu ba, themia kra pere, krathorcü phrü hulie kenjü.

⁹ N themiako kekhaketuo la kesikele nou, kevi mu kesuo si kekreilieketuo khapie n kituou tsüshücümu, supuonie n themia krodi haha kekhalie vituo ga?” sishü.

¹⁰ Solomon-e chakeshü die hau Niepuue puo neilie.

¹¹ Sidi Ukepenuopfü sie puo ki, “No hau chakecü, n thuo n la rhei chalieketuo cha mo; morei n la kishükinyi chata mo, morei n ngumvümia kerheiro cha mo, derei n bu vikecü silieketuo la kesikele cha;

¹² a n die ki tuoi chüshütuo. Harie, ae mhasi tsiu kesikele nou khashü n tsütuo; süusü n mhodzütsa miapuorei n kemhie tuo mo, morei n sietsa rei miapuorei n kemhie lhou sierlie lho.

¹³ Sizomonyü ae no cha kemo rei sa pie n tsütuo: kinyi, tsiu thetshetherhu, süla n teisozha pete nu kedimia donu n kemhie miapuorei balie lho.

¹⁴ Siro mhanuü noe a zhoko nu tuo volie, a diekhakeshüko mu a dieko chüüzelie, n puo David ketuo nu tuolie liro a n teisozhako chü pechashütuo.”

¹⁵ Siro Solomon cosierlie, ru harie, süue puo mho puo zo. Süsie puo Jerusalem nu la vorlie. Sidi Jihova ze dietseidiekhokecüu mhodzünu thalie, sidi kethe ruosuo tsiu vitho ruosuo chüshü, sidi puo kituoko pete la thehe puo chüshü.

Solomon Mhasi Capi Chükeshü

¹⁶ Süsie thethenumiapfü kenie kediu ki vor puo mhodzünu thalie.

¹⁷ Sitse thenumiapfü puoe puo ki, “He-i, a niepuu, thenu hapfü hienie ki puo nu baya, mu puo kinu bakecü ki a nuo hayo zelie.

¹⁸ Süsie a nuo zekelie zha se nhie, hapfü rei nuo zelie mu hienie rübei ba, kinu hienie zo kemosie, mia kekreimia puorei ba mo.

¹⁹ Sitse thenu hapfü nuoyo theva siata, kekreilamonyü puo thuo puo nuo pezhüwaketa la.

²⁰ Puoe khisoteiluo sielie di n kituopfü zekezhü nu a khieki nu a nuoyo pielie di puo merü nu zhülie mu puo nuo kesiayo pie a merü ki zhüwa.

²¹ A khise a nuoyo nutuoü sielie tse, harie, süyo siazhüta, derei a khise a nuo meho menuoshü tse, harie, süyoe a penuokeshü thepfuyo mota.”

²² Derei thenu kekreipfüe sie, “Molie, rheikebayo a nuo zo, mu kesiayo n nuolie,” sita. Mu keriepfüe sie, “Molie, kesiayo n nuo zo, mu rhei kebayo a nuolie,” sita. Sükemhie unie-e kediu mhodzünu kemeüta.

²³ Sitse kediu sie, “Miapfü puoe sie, ‘Kerheiyo a nuo, mu n nuoyoe kesiayo;’ mu kekreiue sie, ‘Mo; derei n nuoyoe kesiayo, mu a nuoe rheikebayo,’ ite.”

²⁴ Süla kediu sie, “Zhiecha puo se vor a tsücie.” Sitse ukoe zhiecha puo se kediu mhodzü vorlie.

²⁵ Siru kediu sie, “Rheikebayo da kenie chülie, sidi ketoupuo pie miapfü puo tsüwa, mu ketou puo pie kekreipfü tsüwalie.”

²⁶ Sitse kerheiyo-nuo zuoe puo nuo la puo noumezhieta, di sie kediu üse, “He-i a niepuu, nuo kerheiyo pie puo tsüwalie, sidi puo dukhriwa hie zocie,” sita. Derei kekreipfüe sie, “Süu bu a vie rei chü hie morei n vie rei chü hie, derei kezawalie,” sita.

²⁷ Sitse kediu sie: “Kerheiyo pie keriepfü tsüwalie, mu puo dukhriwa hie, puoe süyo-nuo zuo eru.”

²⁸ Sitse Israelmia pete kediu dienya kecükeshü capiu dze silie; sidi ukoe kediu preita, kekreilamonyü ukoe puo dietho tou di capi chülie kevi Ukepenuopfü mhasi tuokecü ngulieketa la.