Kediko Kerieu 2 - Angami Naga CL (Re-edited) Bible (BSI)

David Thepie Khapie Solomon Pelekeshü

¹ David siataketuo teiu penuo vorketa ki; puoe puo nuou Solomon ki diekhashü di sie:

² “Ae kijüu zho tuoi tuotatuo üzhie. Süla meteilie, thepfulie.

³ Sidi Jihova n Kepenuopfü diekhakeshüko chüüzelie, puo zhoko nu tuo volie, puo pukeshüko, puo diekhakeshüko, mu puo capiko, mu puo zhapuko nu, Mosa zho nu thupie kezhü tuoi, chüüzelie, silie ro n mhatho peteko nu, mu n kevo peteko nu no vilietuo.

⁴ Silie ro Jihova a dze kepuko chüshülietuo, süu pukecü: ‘Mhanuü n nuonuoko u cha nu menuolie, u melou pete mu u ruopfü pete se di a mhodzünu ketho cha nu tuo volie ro, Israel kediba nu n sou kechü themia jütalie lho,’ puoe sishü.

⁵ “Sizomoü no rei Joab Zeruia nuou a gei kedipuo chüshü shikecü, mu Israel rüpfhünuo krütanie, Ner nuou Abner gei, mu Amasa Jether nuou unie gei kedipuo chüshü shiü no rei si ba eru, puoe sünie dukhriwa, sidi kezekevi teiki terhü zie pekruwate, sidi kejo kejüko zie pie puo chiecha nu, puo chiepha nu, siro puo phikou nu shüwate.

⁶ Süla n mhasi se di mhachülie, derei puo tsüpou bu thenou mene di Sheol nu le hie.

⁷ Derei ketseikevi thapie Barzilai Gilid-u nuonuoko pekieshücie, siro süko bu n mizhü geinu mhacüükrieyakezhamia chücie, kekreilamonyü sikecü ae n dzürieu Absalom lataketuo ki a ki vorwate.

⁸ Siro n ze keba Shimei Gera nuou, Bahurim nunu kevor Benjamin-u, a Mahanaim nu kevo ki puoe rüse kere se pie a rüse, derei puoe Jordan nu a ze kesetuoü ker, mu ae Jihova ki, ‘Ae zhiechaü n dukhrilie lhowe,’ idi rüsewate.

⁹ Süla no tsie puo üse jo moü hiecie, noe mhakesimia puo eru, mu puo gei kedipuo chüshükecü mese shikecü si ba eru; mu no puo tsü kerüpouu thezie sa di pie Sheol nu shüwacie,” sishü.

David Se

¹⁰ Sidi David-e puo puonuoko ze di zhüta, mu David nadiu nunu puo khruwa.

¹¹ Siro David-e teicie hiedia Israel mho kedi chü, teicie thenie puoe Hebron nu di, tsiu teicie serese Jerusalem nu kedi chü.

¹² Süsie Solomon-e puo puou David kediba gei balie, sidi puo kediba chü pezhalie.

Solomon Kedi Chükelie

¹³ Sitse Adonija Hagit nuou Bathsheba Solomon-nuo zuo ki vor, sitse hapfüe sie, “No n nou vi di vorzhü mo?” si. Puo sie, “Vi di vorzhie.”

¹⁴ Sitse puoe sie, “A n ki mhapuo pu nyüyalie,” ru hapfü sie, “Pushülie.”

¹⁵ Sitse puoe sie, “kedibau a viekecü no si ba, mu Israelmia pete rei a kedi chüketuo a merü ba; sirei kedibau teshü kewhiwa, sidi a siezeu tsüwate, kekreilamonyü süu Jihova kinu puo vie üvorte.

¹⁶ Mu tsie a n ki mhapuo chaya, khashü a tsü mvüta hiecie,” sitse hapfüe sie puo ki “Pushücie.”

¹⁷ Sitse puoe sie, “Kediu Solomon ki pushücie, puo n melietalie lho, süusü puo bu Abishag Shunampfü pie a kimia chücümu.”

¹⁸ Sitse Bathsheba sie, “Viwe, a n la kediu ki pushütuo,” sishü.

¹⁹ Süla Bathshebae kediu Solomon ki Adonija sou die putuoü vo. Siru kediue puo ze kesetuoü par di puo mhodzünu nuketsushü; süsie puo kediba gei ke balie, siro kediu puo zuo la theba puo rei se vorshü, sidi hapfüe puo zatsa balie.

²⁰ Sitse hapfüe sie, “A n ki mhakecü yopuo chayalie, a meliewa hiecie.” Sitse kediu puo üse, “Chaliecie, a zuo, a n ki lho ütalie lhocü la.”

²¹ Sitse puoe sie, “Abishag Shunampfü pie n dzürieu Adonija ki penyishücie.”

²² Sitse kediu Solomon puo zuo die kela di sie, “No kiüdi Adonija la Abishag Shunampfü ketsoya ga? Puo la kedibau sa chaliecie, kekreilamonyü puoe a dzürieu ze, puo la rei, siro Abiathar zievo-u la, mu Joab Zeruia la rei chaliecie.”

²³ Sitse Kediu Solomon Jihova za se rüse di sie, “Adonijae die hauha puo thuo puo kerheiro kepeka la puwata moliro, Kepenuopfü bu a gei sükemhiei, tsiu sü kezie rei chüshüliecie.

²⁴ Süla tsie Jihova rheikeba tuoi, puoe a pesieshü, mu a khapie a puou David kediba gei shüshü, mu puoe ki puo chüshü a tsü, puo phrakeshü tuoi, thie Adonija bu siatatuo.”

²⁵ Sidi kediu Solomon-e Jehoiada nuou Benaia ketseshü di puo biewa mu puo siata.

²⁶ Siro kediue Abiathar zievo-u ki, “Anathot nu, n lie nu votacie, kekreilamonyü noe siaketa mesete. Derei a tsie teiki n pesiawalie lho, kekreilamonyü noe a puo David mhodzü Niepuu Jihova, dietseidiekhobouu toupie tuo, mu no puo kemezhiekelie pete nu puo ze kemezhieshü.”

²⁷ Sidi Solomon-e Abiathar bu Jihova zievo chü mota; süusü Jihova die, puoe Shilo nu Eli-nuo kinumia dze kepu chü tseilieketuo la zo.

²⁸ Siro dielieu Joab ki vor, kekreilamonyü Joab-e Adonija yapieya, puoe Absalom yapie moürei. Joab-e tase Jihova rüsuopfhekiu nu vota, di ruosuoba kia theze se bata.

²⁹ Mu süu se Solomon ki pu di “Joab-e ta vo Jihova rüsuopfhekiu nu bate, mu harie, puoe ruosuoba kiki bate.” Sitse Solomon-e Jehoiada nuou Benaia ketse di puo ki, “Tuo volie, di puo biewaliecie,” sita.

³⁰ Süla Benaia Jihova rüsuopfhekiu nu vor di puo ki, “Kediu diekhashüte, ‘Parliecie,’ si.” Derei puo sie, “Lho; a haki nu siatatuo,” sita. Süsie Benaia die se la kediu ki vor di sie, “Joab hakemhie pu, mu hakemhie di a die kelate.”

³¹ Sitse kediu sie puo üse, “Puo kepu tuoi chüshücie, mu puo biewaliecie, sidi puo khruwalie, mu no Joab-e pekrukewa kejo kejü zieu, a geinu mu a puonuoko ki nunu chüwaliecie.

³² Jihovae puo zie pie puo tsü gei shütuo, puoe a puo David pesi mo di zhiecha pie puo ki miathokuo mu vikuokecü mia kenie dukhriwa, süniesü Abner, Ner nuou, Israelmia rüpfhünuo krütau, mu Amasa, Jether nuou, Judamia rüpfhünuo krütau.

³³ Süla uko gei Joab mu puosepuoyieko tsü gei tuo seitatuo; derei David, mu puo seyieko, puo kinuko, mu puo kediba gei we Jihova kinu nouneu kechachie uko gei tuotuo,” sishü.

³⁴ Süsie Jehoiada nuou Benaiae tuo kho, sidi puo bie di puo dukhriwa sidi rayha nu puo ki nu puo khruwata.

³⁵ Siro kediue Jehoiada nuou Benaia khapie puo chüu nu rüpfhünuoko mho shüshü, mu kediue Zadok zievo-u pie Abiathar sou nu shüwa.

³⁶ Siro kediu mia ketsepie Shimei kie di sie puo ki, “N thuo n la Jerusalem nu ki puo chüliecie, di sünu lhouliecie, mu sünunu tuo thechü kekrei puonurei vota hiecie.

³⁷ Kekreilamonyü no chazou kepra nhie, Kidron ciekevo nhie, no sia toutaketuo si touliecie, n zieu sü n tsü geituo.”

³⁸ Sitse Shimei sie kediu ki, “N kepuu vi zo; a niepuu kediu kepu tuoi, n kituou sükemhie chülietuo,” sishü, süla Shimei-e Jerusalem nu teisozha kekra lhou.

³⁹ Derei cie se tseitakezhü ki Shimei kituomia kenie ta Gath nu kediu Maka nuou Akish ki vota mu süu se Shimei ki, “Harie n kituonie Gath nu bate ho,” sishü.

⁴⁰ Sitse Shimei sielie di puo gada keselie, sidi puo kituonie pfhütuoü Gath nu Akish ki vo; sidi Shimei vo di Gath nunu puo kituonie ze vor.

⁴¹ Siro Shimei Jerusalem nunu Gath nu vo di la vortakecü Solomon ki pushü tse,

⁴² kediu mia ketsepie Shimei kie di sie puo ki, “A n bu Jihova za se rüse mu n ki, ‘No chazou kepra teisozhanhie, kehourapuo tuo zo shierei sia tou zotuokecü si touliecie, sishü mo üme’? Mu no a ki, ‘N kepuu vi zo we, a zelietuo,’ sishü ze.

⁴³ Siliro no kiüdi Jihova ki phrakeshüu, mu a n ki pukeshü die se balie mota ga?” si.

⁴⁴ Sizomoü kediue sie Shimei ki, “A puo David gei mha kesuo chükeshü pete n melouu thuo si ba ze; süla Jihovae n kesuou pie n tsü gei shüshütuo.

⁴⁵ Derei Kediu Solomon we thejapfülietuo, mu kedibau Jihova mhodzü kechachie balietuo,” si.

⁴⁶ Süsie kediue Jehoiada nuou Benaia ki diekhashü; mu puoe tuoprata, di vo puo biewa mu puoe siata. Süla kedibau Solomon dzie nu pesielieta.