Kediko Kerieu 16 - Angami Naga CL (Re-edited) Bible (BSI)

¹ Sitse Jihova die Jehu, Hanani nuou ki vor di Basha kerhie di sie,

² “Ae nyophe nunu n chü pezhashü ze, sidi n chüpie n bu a themia Israel mhokezha chü; mu noe Jeroboam zho-u nu lhou, siro a themia Israel chü kephouma sidi uko kephoumako se a nou chü kemeyie,

³ harie, ae Basha mu puo kikru pekawatuo, sidi n ki chüpie Jeroboam Nebat nuou kikru mhiewatuo.

⁴ Basha themia nadi nunu siakecüko tefüe cütuo; tsiu puo themia lie nunu siakecüko teirakoe cütuo.”

⁵ Siro Basha mhatho kekreiko mu puoe kedipuo chü shikecü, tsiu puo kekuo, süko Israel Kediko dze Leshüda nu thupie zhü mo üme?

⁶ Sidi Bashae puo puonuoko ze zezhüta, sidi Tirza nunu puo khruwa; sitse Ela puo nuou puo sou nu kedi chülie.

⁷ Süsie siedzekesiu Jehu Hanani nuou geinu Jihova die Basha mu puo kikru petsou, puoe Jihova mhinguki mha kesuo kechü pete la, puo dzie mhatho pie puo nou chü kemeyie di Jeroboam kikru kemhietakecü la, siro puoe süu rei pekawa.

Ela Kedi Chükelie

⁸ Juda Kediu Asa dikelie cie mepfüesorou cie, Basha nuou Ela Tirza nu Israel mho cie kenie di.

⁹ Derei puo kituou Zimri, puo kierbageiko ketou puo mhokezhau, puo petsou sierta. Puoe Tirza nu keba ki Tirza kediki kepfheu Arza ki nu zukrie meze ba.

¹⁰ Zimri vor di puo vü khriwa, sidi puo sou nu kedi chülie, Juda Kediu Asa dikelie cie mepfüethenie cie.

¹¹ Puoe kedi chü sedelie mu kediba gei balie mumetha, puoe Basha themiako pete dukhriwata, puoe puo seyiemia morei puo khriethokhriechü thepfumia puorei lhieshü tsü mo.

¹² Hamhie di Zimri-e Basha kikru pete pekawa, Jihova die kheki sü chü, puoe Jehu siedzekesiu geinu Basha petsoukeshü mhie di.

¹³ Kekreilamonyü Basha kephouma pete la mu puo nuou Ela kephouma pete la, sünunu ukoe Israel chü kephoumawa, uko mharhiko se di Jihova Israel Kepenuopfü nou chü kemeyie.

¹⁴ Siro Ela mhatho kekreiko mu puoe chükeshü peteko, süko Israel Kediko dze Leshüda nu thupie zhü mo üme?

Zimri Kedi Chükelie

¹⁵ Juda Kediu Asa dikelie cie mepfüethenie cie Zimri-e Tirza nu zha thenie kedi chü. Sitse chüpahi krokoe Gibethon, Filistinmia kijüu perhietuoü vo balie.

¹⁶ Sitse whuotuoü vo batakecükoe die puo sikecü, “Zimri-e sie kediu dukhrituoü rhü di puo dukhriwate,” si. Süla Israel pete-e, Omri, chüpahi mhokezhau bu sünhiesünu Israel mho kedi chülieta.

¹⁷ Sidi Omri mu Israel pete rei puo ze di Gibethon nunu khota, sidi ukoe Tirza whuo.

¹⁸ Mu Zimri-e nadiu lielieketa ngu tse, puoe kediu kediki nu le, sidi mi pie kediu ki theshü, sidi mi nunu puo thuo puo thekhriwa,

¹⁹ kekreilamonyü Jihova mhodzüki nu mha kesuo chükecü, puo kephouma la, Jeroboam zho nu tuokecü la, tsiu puo kephouma la Israel chü kephoumawa.

²⁰ Tsiu Zimri mhatho kekreiko, mu puoe mia gei mha kesuo rhükecüko, süko Israel Kediko dze Leshüda nu thupie zhü mo üme?

Omri Kedi Chükelie

²¹ Süsie Israelko chükho kenie chüwa. Mia ketoupuoe Ginat nuou Tibni bu kedi chütuo üdi puo siemedzita; mu ketoupuoe Omri siemedzita.

²² Derei Omri siedzikoe Ginat nuou Tibni siedziko mho kuolieta: Süla Tibni siata, mu Omri kedi chülie

²³ Juda Kediu Asa kedi chükelie cie serepuokrü cie, Omri Israel nu kedi chü sedelie di cie kerekenie di: Süki puo cie sorou Tirza nu di.

²⁴ Siro puoe rakachü talent kenie pie Shemer kinu Samaria kijüthouu khrülie, mu kijüthou geinu ki chülie, sidi puoe chükelie nadiu üse Samaria chülie, Shemer kijükhru niepuu za se di.

²⁵ Omri-e Jihova mhodzü mha kesuo shüüko chü, sidi puo mhodzü kelhouko pete ki rei suokuota.

²⁶ Kekreilamonyü puoe Nebat nuou Jeroboam cha pete nu tuo, di puo kephouma zho pete chü, mu puo kephouma nunu Israel chü kephoumawa, mharhiko se di Jihova Israel Kepenuopfü nou chü kemeyie.

²⁷ Siro Omri mhatho chükeshü kekreiko tsiu puo kekuo pengukeshüko, süko Israel Kediko dze Leshüda nu thupie zhü mo üme?

²⁸ Sidi Omri-e puo puonuoko ze zezhüta, mu Samaria nunu khruwa, siro puo nuo Ahab puo sou nu kedi chülie.

Ahab Kedi Chükelie

²⁹ Juda Kediu Asa dikelie cie serethetha cie Omri nuou Ahab-e Israel mho kedi chülie; siro Omri nuo Ahab-e Samaria nu Israel mho cie mepfüekenie di.

³⁰ Tsiu Omri nuo Ahab-e puo mhodzü kelhouko pete ki rei Jihova mhodzünu mha kesuo chütho.

³¹ Si tuo di mhale kerüdza di puoe Nebat nuou Jeroboam kephouma nu tuota, sidi puoe Sidonmia Etbal nuopfü Jezebel lielie, sidi vo Baal lie chü, di puo rüsuota.

³² Puoe Samaria nu Baal ki chükelie nunu Baal la ruosuoba puo chülie.

³³ Ahab-e Ashera puo chülie, sidi Ahab-e Israelmia kediko puo mhodzü ketuoko pete ki rei Jihova, Israel Kepenuopfü nou chü kemeyiekuota.

³⁴ Puo teiki Bethel-u Hiel-e Jeriko rüna chülie, puoe puo nuo nuorieu Abiram pekawaketuo le mo zo di puo mvü dzepie zhüwa, sidi Jihovae Nun nuou Joshua geinu pukeshü kheki sü chü puo nuo nhicutho-u Segub bu kata zorei kharuko chülie.