Kediko Kerieu 12 - Angami Naga CL (Re-edited) Bible (BSI)

Israelko Kebvü Kesier Dze

¹ Siro Rehoboam-e Shekem nu vota: Kekreilamonyü Israelmia pete-e puo bu kedi chütatuoü Shekem nu vorta.

² Siro Jeroboam Nebat nuou süu dze silie tse (kekreilamonyü puoe tsie rei Ijipt nu ba zo, puoe Kediu Solomon mhodzü nunu tata) sitse Jeroboam-e Ijipt nunu la vorlie.

³ Mu ukoe mia ketseshü di puo kielie, sitse Jeroboam mu Israel kehou pete vor di sie Rehoboam üse,

⁴ “N puoe hieko vocie chü kemesishüte, süla no tsie n puo mhatho kereu mu puo vocie kemesi hie gei keshüu chü kemedzashücümu, sitse hie n lie chülietuo,” si.

⁵ Sitse puoe uko ki, “Nieko zha se la tuotalie, sidi la a ki vorcie,” sita. Mu themiakoe tuota.

⁶ Süla kediu Rehoboam-e phichümiako ketsoshü, sükoe Solomon puo puou kerhei ki puo mhodzünu thathaya, sidi sie, “A bu kedipuo kemhie di themia hakoha die kelakeshü nieko medo ga?”

⁷ Sitse uko sie puo ki, “No thie themia hako kituomia chülie, sidi uko lie chüshülie, mu uko die kelashülie, sidi uko ki die kevi pulie liro ukoe kechachie n kituomia chülietuo,” sishü.

⁸ Derei puoe phichüko puo ki kepu dieko khawa, sidi khriesamiako puo tshümiako, puo khieki thathayakezhako ketsota.

⁹ Sidi puoe uko ki, “N puo khapie hie gei keshü vocieu chü kemedza kuoshücie, idi kepu themia hakoha ki a bu kedipuo pushüketuo nieko le ga?”

¹⁰ Sitse khriesamiako puo tshümiako puo ki, “N ki, ‘N puo hie vocie chü kemesishü, derei no hieko gei süu chü kemedzashücie’ idi kepuko ki no hakemhie pulie, ‘A dziekinuo kecüyo zorei a puo chieca ki shükuotuo.

¹¹ Sizomonyü a puoe vocie kemesi pie nie gei shü, a nieko vocie süu chü pekrashütuo, a puo seiro pie nieko petha, derei a we seba pie nie pethatuo.’ ”

¹² Süla Jeroboam mu themiako pete zha se nhie la Rehoboam ki vo, “Kediue zha se nhie a ki la vorcie,” idi pukeshü mhiei di.

¹³ Siro kediue mehiemeha zo di themiako die kelashü, tsiu phichümiakoe puo ki pukeshü dieu medzi mota.

¹⁴ Mu puoe khriesako die tuoi uko ki, “A puoe nieko vocie chü kemesishü, ae nieko vocieu chü pekra sashütuo; sizomonyü a puoe seiro pie nie petha; derei a we seba pie nieko pethatuo,” sishü.

¹⁵ Sidi kediue themiako die rünyü mvüta; mha süusü Jihova kinu kevor Ahija Shilo-u Jeroboam Nebat nuou ki kepuu chü tseilieketuo la.

¹⁶ Siro Israelmia pete rei kediu uko die rünyü moketa ngu tse, themiakoe sie kediu ki, “David kitsatie hie ya kedipuo ba ga? Hieko we Jese nuou kinu kayie puorei jü. He-i Israel! Tuo nie pfheki nu votalie! Tsie n thuo n ki meholiecie, David.” Sidi Israel-e u pfhekiko nu vota.

¹⁷ Derei Israel themia Juda nadiko nu kelhouko we Rehoboam bu uko mho kedi chü.

¹⁸ Süsie Kediu Rehoboam-e khezhanuo mehoyakezhau Adoram ketseshü, süki Israel pete-e ketsie pie puo vakhriwa. Süla kediu Rehoboam-e ta Jerusalem nu votatuoü rükri puo kierbagei gei pfülie.

¹⁹ Süla Israel thie ketso rei David kiu petsou tuoya zo.

²⁰ Si tuo di Israelmia pete Jeroboam la vorketa silie tse puo chüpie puo bu Israel pete mho kedi chü; süko donu Juda yieu sie, mia kekreipuorei David kikru medzi mota.

²¹ Siro Rehoboam-e Jerusalem nu vorlie tse, Israel kikru ze kegei di kedirüvie lie lapie Solomon nuou Rehoboam tsütuoü Juda kiu pete mu Benjamin yieu sa terhümiavimia lakh puo di nyie hiethetha kie kengulie.

²² Derei Kepenuopfü die Shemaia, Kepenuopfü themiau ki vor di sie,

²³ Rehoboam, Solomon nuou, Juda kediu mu Juda mu Benjamin kikru pete, mu themia lhiekelieko ki pushücie,

²⁴ “Jihovae puya, nieko nie siezedzüriemia Israel themiako ze kegeituoü kho hie. Mia pete u thuo u kinu votalie; mha hauha a kinu vorta zocü la.” Süla ukoe Jihova die rünyülie di Jihova die tuoi u thuo u kinu la vota.

Jeroboam Israel Chüpie Phoumakewa

²⁵ Süsie Jeroboam we Efraim kijükhru geinu Shekem chülie, sidi sünu lhou bata, mu puoe sünunu pra di Penuel chülie.

²⁶ Sitse Jeroboam-e puo nou nu sie, “Tsie we kedirüvie se David kiu nu la vortatuo.

²⁷ Mhanuü themia hako kho Jerusalem nu Jihova ki nu ruosuo chü üro, uko noue la uko niepuu kitsa votatie, Juda Kediu Rehoboam kitsa votatie, sidi uko sie a dukhriwatie, sidi la Juda Kediu Rehoboam kitsa votatie,” sita.

²⁸ Süla kediue mia sanyülie, sidi suna pie mithunuo kenie rhilie, sidi sie uko ki, “Jerusalem nu khokecü nie la rethorte. Harie Israel, Ijipt nunu nie ze parkeshü nie rhuoko sü cüge.”

²⁹ Sidi puoe puo pie Bethel nu, mu kekreiu pie Dan nu shü.

³⁰ Mu mha hauha kephouma mhatho puo chüta, kekreilamonyü themiakoe vo di Bethel nu kebau nu mu vo Dan nu kebau ketso rei rüsuota.

³¹ Puoe thechü kerükrieko gei rei ki chüshü, sidi Levimia kemo miahoumia bu zievoko chüta.

³² Siro Jeroboam-e thekhrü thelau nu, zha kerepengou nhie, Juda nu thehe mhiekecü puo keselie, sidi puoe ruosuoba geinu ruosuo chü, sümhie di puoe Bethel nu rei chü, ruosuo chüpie puoe chükelie mithunuoko tsü, siro puoe zievoko khapie puoe chükeshü thechü kerükrieko gei shüshü.

³³ Sidi puoe Bethel nu chükelie ruosuoba gei thekhrü thethau nu zha kerepengou nhie; puo nou nu rhükelie thekhrü nu ruosuo chü, tsiu Israel themiako la thehe puo chütuo ülie, sidi puoe kho ruosuoba geinu ruosuo chü, tsiu kethengu theshü.