Kediko Kerieu 11 - Angami Naga CL (Re-edited) Bible (BSI)

Solomon Rütsiketa

¹ Solomon-e Faro nuopfü sa di seyie kekreimiapfü kekra Moabmiapfü, Ammonmiapfü, Edommiapfü, Sidonmiapfü mu Hitmiapfü ngu puo neita.

² Seyie sükosü dze Jihovae Israelmiako ki pukeshü, “Nieko süko lielie lho morei süko ki nyilie lho, kekreilamonyü sükoe nieko nou chüpie uko rhuoko kitsatie vota tou zotuo,” isi, Solomon hako ngu puo neita di uko kitsatie tuota.

³ Puoe puo kimia kedimia nuonuo krie thenie mu puo pelipfüko krie se; tsiu puo kimianuoko puo nou chü kediwata.

⁴ Kekreilamonyü Solomon-e tsaketa ki puo kimiakoe puo nou teshüpie terhuo kekrei kitsa shüwa, sidi puo noue Jihova puo Kepenuopfü ze puotou chütuo mota, puo puo David nou kemhiei tuo mota.

⁵ Kekreilamonyü Solomon-e Sidonmia rhuo Ashtoret mu Ammonmia kerütsekecüu Milkom medzita.

⁶ Sidi Solomon-e Jihova mhodzünu mha kesuo chü, sidi Jihova medzi tsei mota, puo puo David kemhie tuo mota.

⁷ Sitse Solomon-e Kemosh Moabmia kerütsekecüu la Jerusalem mhodzünu kijüthouu geinu thechü kerükrie puo chüshü, siro Molek Ammonmia kerütsekecüu la chüshü.

⁸ Sidi puo kimia seyie kekreipfüko kethengu the mu ruosuo chüpie uko rhuoko tsükecü pete puo rei chüta.

⁹ Sitse Jihovae Solomon ngu puo nei mota, puo noue Jihova Israel Kepenuopfü, va kenie puo pengukeshüu kinu rüdiketa la.

¹⁰ Siro mha hauha dze puo ki pushüwata zo, süusü puo bu terhuo kekrei medzita suokecü: derei puo Jihova puo ki pukeshüu chüüzelie mota.

¹¹ Süla Jihova sie Solomon ki, “No mha hau chüwaketa la, mu noe a dietseidiekho mu a zhoko, a n ki diekhakeshüko chüüzelie moketa la a n geinu n kediba cierhawatatuo, sidi khapie n kituomia tsüwatatuo.

¹² Sishierei n puou David la nu n teiki siwalie lho, derei a n nuou dzie nunu cierhawatuo.

¹³ Sirei a kediba pete cierhawalie lho; sidi a kituou David mu a kedakelieu Jerusalem lanu seyie puo pie n nuou tsüshütuo.”

Solomon Kepetsouko

¹⁴ Sidi Jihovae Solomon ngumvümia puo peseshü, Hadad Edom-u puoe Edom nu kedi seyiemia puo.

¹⁵ Kekreilamonyü David-e Edom nu keba ki, rüpfhünuoko mhokezhau Joab-e Edom nu thepfumiako pete dukhrikewa sie kesiamoko khruwatuo üdi khota.

¹⁶ (Kekreilamonyü Joab-e Edom nu thepfumia pete dukhriwa kemochie, thekhrü sorou Israelmiako ze sünu bata;)

¹⁷ derei Hadad puo mu puo puo kituo Edommiako puo zelie di Ijipt nu ta vota; Hadad-e medzü ba zoluo.

¹⁸ Ukoe Midian nunu sielie di Paran nu volie. Mu ukoe Paran nunu themia pie uko salie, sidi ukoe Ijipt nu Faro kediu ki vorlie, puoe ki puo khashü puo tsü mu kecükekrie keseshü, mu kijü khashü puo tsü.

¹⁹ Siro Hadad-e Faro khriepfülieta, süla puo thuo puo kimia siezepfü pie puo ki penyishü, Tahpen kedipfü siezepfü.

²⁰ Mu Tahpen siezepfüe Hadad nuo Genubat penuoshü puo tsü, Tahpen-e Faro ki nunu thekekeshüu, tsiu Genubat-e Faro nuonuo ze di Faro kinu baya.

²¹ Derei Hadad-e Ijipt nu ketuo ki David-e siata di puo puonuoko ze khruwataü mu rüpfhünuoko mhokezhau Joab siaketa silie tse, Hadad-e sie Faro ki, “A bu tuotayi, sitse a tuo a ra votatuo,” sita.

²² Derei Faroe sie puo ki, “No a ze bakecü kedipuo nu tsopfhüta di tsie n thuo n ra la votaketuo leya ga?” Sitse puo sie puo ki, “Mhapuorei mo, derei a bu tuotacümu,” sita.

²³ Kepenuopfüe puo la ngumvümia kekrei puo peseshü, Eliada nuou Rezon, puoe puo niepuu Hadadezer Zoba kinu tatuota.

²⁴ Sitse puoe themia kie kengu pie puo ki shülie, sidi themia kro puo mhokezha chülie, David-e Zoba nu uko dukhrikecü sie, mu ukoe Damaska nu volie, sidi sünu lhou bata, sidi puo bu Damaska nu kedi chülie.

²⁵ Tsiu Solomon kerhei chie Rezon-e Israel ngumvümia chütuo tso, sütsügei rei Hadad mhiei puo kelhie sa; tsiu Rezon-e Israel ngumecü di Siria mho kedi chü.

²⁶ Solomon kituomia puo Nebat nuou Jeroboam, Efraimmia Zereda, puo zuo zae Zerua, samipfü puo zorei puo dzie yhapie kediu petsouta.

²⁷ Mu puo dzie yhapie kediu petsouketa cau ro hai: Solomon-e Milo chüshü, mu puo puo David nadi tsozhüketau kemieshü.

²⁸ Jeroboam themia kethepfu puo, siro Solomon-e khriesa hau shürheikecü ngu tse, puo bu Josef ki kemeho-u chü.

²⁹ Siro si tuo di Jeroboam-e Jerusalem nunu prata tse, Ahija siedzekesiu Shilon-u cha nunu puo ngulie; mu puoe pfhe kesa puo dzietuo; mu unie unie rübei lie nu tuo.

³⁰ Sitse Ahijae puo gei ketuo pfhe kesau rhuolie, di süu cierha pie kerekenie chüwa.

³¹ Sidi puoe Jeroboam ki: N thuo n la ker lieliecie, kekreilamonyü Jihova Israel Kepenuopfüe puya, “Harie, ae Solomon dzie nunu kedibau cierhawatatuo üzhie mu seyie ker pie n tsüshütuo.

³² (Derei puoe a kituou David la, mu Jerusalem, a Israel seyie pete donunu kedakelie rünau lanu ngulietuo),

³³ kekreilamonyü ukoe a rükra mote, sidi Sidonmia rhuopfü Ashtoret, Moabmia rhuo Kemosh mu Ammonmia nuonuoko rhuou Milkom rüsuote, sidi a cha nu tuo mote, a mhi ki puotoukecüu, mu a kepethazhoko mu ahzako keze nu puo puo David tuoilie mote.

³⁴ Sirei ae puo dzie nunu kediba pete chüwalie lho; derei a kituou David, a kedakelieu, diekhakeshüko mu a kepethazhoko chüüzekelieu lanu puo rhei chie puo bu kezha chütuo.

³⁵ Derei a puo nuou dzie nunu kedibau sesetatuo, sidi süu khapie n tsüwatuo, seyie kerko.

³⁶ Derei a seyie puo pie puo nuou tsütuo, süusü a kituou David bu Jerusalem nu, a a za khapie batuo üdi kedakelie rünau mhodzüki kechachie kezie puo chülieketuo la.

³⁷ Mu a n lielietuo, sidi n kemengu mhiei n bu kedi chütuo, mu no Israel mho kedi chütuo.

³⁸ Siro mhanuü noe a kha n ki keshüko pete rünyülie, tsiu a kituou David tuoi, a kepetha zhoko mu a diekhakeshüko ze di a mhi ki puotoukecüu chülie liro a n ze tuolietuo, tsiu ki ketho puo chüshü n tsütuo, a David la chükeshü tuoi, mu Israel khapie n tsütuo.

³⁹ Mu hau la ae David seyieko pechütuo, derei kechachie la silie lho,” sishü.

⁴⁰ Süla Solomon-e Jeroboam dukhriwatuoü puo pfhüta, derei Jeroboam sielie di ta Ijipt nu Shishak kediu ki vota, sidi Solomon siata kemochie sünu bata.

Solomon Se

⁴¹ Tsiu Solomon mhatho kekreiko, puoe chükeshü peteko mu puo mhasi, süko Solomon mhatho leshüda nu thupie zhü mo üme?

⁴² Siro Solomon Jerusalem nu teicie hiedia Israel pete mho kedi chü.

⁴³ Sidi Solomon-e puo puonuoko ze zhüta, di puo puo David nadiu nu khruwa, sitse Rehoboam puo nuou puo sou nu kedi chülie.