Kediko Kerieu 10 - Angami Naga CL (Re-edited) Bible (BSI)

Sheba Kedipfüe Solomon ki Kevor

¹ Siro Sheba kedipfüe Jihova za nunu Solomon-e zapuzayie chü keba silie tse, puoe ketsokecü kere kro puo se puo dojütuoü vor.

² Mu hapfüe mha kekra se Jerusalem nu vor, kethengu, suna kekra, ketsie puoma kere ut geinu toupfü vor, mu puoe Solomon ki vorlie tse, puoe puo nou kedipuo ba shiü pete se puo rüchü.

³ Tsiu Solomon hapfü puo ketsokecü pete kelashü; kediue puo ki mhapuorei keviewa mo, puoe mhapuorei pulie kenjüketa chü mo.

⁴ Mu kedipfü Shebae Solomon mhasi pete, mu puoe ki chükelie,

⁵ puo mizhü gei kecükekrie, puo kituoko keba, kituoko puo pfhe ketha uko pfhenei, puo hie kepieko, mu puoe Jihova kinu kekho chapra ngushü tse, puo ngo rei ngodapfü chü mota.

⁶ Sidi puoe sie kediu üse, “A a kijü nu n mhatho mu n mhasi dze kesi ketho tou zo.

⁷ Derei a vor di a mhi üse nguwa kemochie, a die süko pelelie mo, mu harie, süko ketou puode rei a ki pushü molie, n mhasi mu n kinyi-e a kesi zie se.

⁸ N themiako, n kituomiako, n mhodzüki tha di n mhasi dieko rünyü bayakezhako we thejakepfüthomia zo.

⁹ Jihova n Kepenuopfü n ngu puo neiyakezhau, sidi n khapie Israel kediba gei keshüu bu zapuzayie chüliecie! Kekreilamonyü Jihovae kechachie Israel khrieya, puoe n chüpie n bu kedi chüliete, kemezhü mu kemiatho mhatho chütuo üdi.”

¹⁰ Sidi puoe suna talent krie puo di mepfü, mhare kevi kekra mu ketsie puoma kere pie kediu tsü, Sheba kedipfü mhare kevi pie kediu Solomon ketsü de-icü süsie la vor sa mota.

¹¹ Süsie Hiram rou themiakoe Ofir nunu suna, almug sei mu ketsie puoma kere kekra se vor.

¹² Mu kediue almug seiko pie Jihova ki coko, mu kediu kiu, nyarübouko rei sa mu ükechümiako la übouko chülie; almug sei süthede vor sa mota, morei thie ketso rei ngu mo zo.

¹³ Siro Kediu Solomon-e Sheba kedipfü mengu pete chüshü, puo ketsokecü pete, sütsügei rei puoe puo kedi kinyi nunu mha pie puo tsü. Süsie hapfü puo kituoko zelie di tuo puo ra la vota.

Solomon Kinyiko mu Puo Za Meyie Phiketa

¹⁴ Siro teicie puo nu suna mesi talent krie sorou di hiesorouesorou Solomon ki vorya.

¹⁵ Sütsügei rei puoe lhitholhiü chüyakezhamia mu mhare kevi lhithomia mu Arabia kediko pete mu rüna ahngko kinu ngulieya.

¹⁶ Mu Kediu Solomon-e suna rükreikelie pie pezhü kezha krie kenie chülie, pezhü puo la suna shekel krie sorourou.

¹⁷ Süsie rei puo suna rükreikelie pie pezhü krie se chülie; pezhü puo la suna mina sese, sidi kediu süko khapie Lebanon Ketsa Kiu nu ba.

¹⁸ Sizomoü kediue tsohu pie kediba kezha se puo chülie, sidi puo mhogei suna kevithopfü pie dalie.

¹⁹ Kedibau gei chapra sorou ba, mu kediba tsü gei puo sietsatie metou, siro thebau lutsahatsa puobou ba mu puokhie losha puopuoe tha.

²⁰ Mu chapra sorouko yopuo gei lutsahatsa losha puopuo idi kerekenie tha. Kediba puo nu rei sükemhie chüya chie mo.

²¹ Mu kediu Solomon krieyakezha hie pete rei suna se chü phre, mu Lebanon Ketsa Kiu nu mhabouko pete rei suna se chü, rakachü pie yopuorei chü mo; Solomon teiki süu üse mhatho kemo chüta.

²² Kekreilamonyü kediue dzükezha nu Tarshish rouko bu Hiram rouko ze tuo; teicie se donu va puo Tarshish routhumia, suna, rakachü, tsohu, tepfi mu rüüra se vorya.

²³ Sükemhiei di Kediu Solomon-e kinyi nu rei mu mhasi nu rei kijüu gei kedimia pete ki vikuota.

²⁴ Mu kijüu pete Solomon mhasi Kepenuopfüe khapie puo nou keshü rünyütuoü puo pfhüya.

²⁵ Tsiu uko mia puopuokecü mha methuo se vorya, rakachü, mu suna se kechü mhanya mu pfhemenei, mu terhünyie, mhare kevi, kier mu gadako teiciekepra se vorya.

Solomon-e Thelhi Kechü

²⁶ Siro Solomon-e kierbagei mu kier themia kie kengulie, mu puoe kierbagei nyie puo di krie dia, mu kierthemia nyie kerekenie ba, puoe süko pie kierbagei nadiko mu Jerusalem nu kediu bu seya.

²⁷ Kediue Jerusalem nu rakachü pie ketsie kemhie se luuhau chü zo, mu sedarbo kijüthezha nu krathortacü pie khrabvübo kemhieta.

²⁸ Mu Solomon-e Ijipt mu Kue nunu kier se vorlie mu kediu lhithomiakoe Kue nu puoma kepukelie nunu lielieya.

²⁹ Ijipt nunu kierbagei puo raka shekel krie sorou mu kier puo krie puo di hiepengou, sidi lhithomiako geinu ukoe Hitmia kediko mu Arammia kediko ki ketseshülieya.