Kediko Kerieu 1 - Angami Naga CL (Re-edited) Bible (BSI)

Abishag David Thekekecü

¹ Tsie we David kediu tsa mu phichü phita; mu uko pfhe pie puo wheshü zo ürei puo lelie mota.

² Süla puo kituokoe sie puo ki, “A kedi niepuu la rüü phouse kemedzü puo pfhüliecie, mu puo bu kediu pfhe thalie, tsiu puo thekeshülie; puo bu n merü gei zhülie, di kediu a niepuu bu leliecümu,” si.

³ Süla ukoe Israelmia rüna pete nu rüü kezivi puo pfhü, di Shunammiapfü Abishag ngulie, di puo ze kediu ki vorshü.

⁴ Rüüpfüe zivi phi, tsiu puoe kediu pfhe ba di puo thekeshü; derei kediu puo ze kesikecü chü mo.

Adonijae Kedi Chütuo üketa

⁵ Süki Hagit nuou Adonijae puo thuo puo chü pezhalie di sie, “A kedi chütuowe;” sidi puoe kierbagei mu kier themia, mu mia hiepengou bu puo mhodzü ta votuoü keselie.

⁶ Siro puo puoe mhakipuorei puo ki, “No kiüdi hakemhie chüya ga?” ikecü pu di puo neimo chüya chie mo, Puoe themia ngu pevi secü puo; puo Absalom sie nu puo penuoshü.

⁷ Puoe Joab Zeruia nuou mu Abiathar zievo-u ze kedovalie, sidi unie-e Adonija siemedzi di puo khruohita.

⁸ Derei Zadok zievo-u, mu Benaia Jehoiada nuou, mu Nathan siedzekesiu, mu Shimei, mu Rei, mu David themia kekuoko Adonija kitsatie tha mota.

⁹ Adonijae tekuo, thudo mu peri puo phou kevi pie En-rogel khie Zohelet tsieu kinu dukhrilie, sidi puo siezedzürieko pete, kediu nuonuoko, tsiu Juda kedi kezhako pete kieshü,

¹⁰ derei puoe Nathan siedzekesiu morei Benaia morei miavimiako morei puo siezeu Solomon we kie mo.

¹¹ Süla Nathan-e Solomon zuo Bathsheba ki pu di sie, “Hagit nuou Adonija kedi chüketa no si ba me? Mu David úko niepuu süu si ba mote.

¹² Süla tsie vorcie, a bu n tarhoshü thie, silie ro no n thuo n kerheiro, tsiu n nuou Solomon kerheiro kelalietuo.

¹³ Tuo volie, sidi David ki leliecie, sidi puo ki, ‘A niepuu, kediu, n nuou Solomon n sie kedi chü tou zotuo, mu puoe a kediba gei batuo idi noe n kituopfü ki rüse pie zhü mo üme? Siliro kiüdi Adonija bu di bata ga?’

¹⁴ Siro kediu ze kerüchü thaluokecü nu, a rei n sie lerlietuo, sidi n dieko peshütuo.”

¹⁵ Sitse Bathshebae kediu kibouu nu kediu ki le. Kediu tsatota; mu Abishag Shunampfü kediu theke baya.

¹⁶ Sitse Bathsheba rünuotsu di kediu kelushü. Sitse kediu sie, “No kedipuo menguya ga?”

¹⁷ Sitse puoe sie puo ki, “A niepuu, no Jihova n Kepenuopfü za se rüse di n kituopfü ki pucü: A sie n nuou Solomon a kediba gei batuo.

¹⁸ Siro tsie, harie, Adonijae kedi chü bate, sizorei tsie a niepuu kediu we si ba mote.

¹⁹ Siro puoe pedo mu peri puo phou kevi mu tekuo kekra dukhri pie ruosuo chü, mu puo kediu nuonuo peteko, mu Abiathar zievo-u, mu Joab, rüpfhünuoko mhokezhau kie, derei puoe n kituou Solomon we kie mo.

²⁰ Mu kediu a niepuu, Israel pete mhi-e n meho ba, süusü supuo bu a niepuu sie puo kediba gei batuo shikecü uko ki pushünu thate.

²¹ Simoükecü siewe, puotei puo vortuo, kediu a niepuu puonuoko ze zhüta tse, a mu a nuou Solomon üse puotou kemo kechümia ütatie,” sishü.

²² Siro puoe kediu ki mha pu tha zoluokecü nu, Nathan siedzekesiu rei lerlie.

²³ Sitse ukoe kediu ki, “Nathan siedzekesiu haki tuo,” sishü. Ru puoe kediu mhodzü lerlie tse, puo nuketsu kijü zerepfü zhüta.

²⁴ Sitse Nathan sie, “Kediu a niepuu, noe ‘Adonijae a sie kedi chütuo, mu puo a kediba gei batuo; sikecü pushü me?’

²⁵ Kekreilamonyü puoe thie tuo vote, sidi pedo mu peri puo phou kevi mu tekuo kekra dukhripie ruosuo chüshüte, siro kediu nuonuoko pete mu rüpfhünuoko mhokezhau Joab, mu Abiathar zievo-u kie, mu harie ukoe puo mhodzü nunu cüükrie bate, sidi sie, ‘Kediu Adonija bu rhei kechau chücie!’ izhie.

²⁶ Derei a, n kituou mu Zadok zievo-u mu Benaia Jehoiada nuou, mu n kituou Solomon we kie mo.

²⁷ Mha hako kediu a niepuue chüshü di noe supuonie kediu a niepuu sie kediba gei batuo shikecü pie n kituoko pekieshü mote me?” sita.

Solomon bu Kedi Chükelie

²⁸ Sitse Kediu David-e puo die kela di sie, “Bathsheba kiepie a ki shücie.” Sitse hapfüe kediu mhodzü vor, sidi kediu mhodzü thalie.

²⁹ Sitse Kediue rüse di sie, “Jihova rhei ketuo tuoi, puoe kemezhiekecü pete nu a kelashü,

³⁰ Ae Israelmia Kepenuopfü Jihova za se rüse di pushüya, ‘N nuou Solomon-e a sie kedi chü tou zotuo, siro puo a sou nu kediba gei batuo,’ süusü a thie rei chüshü zotuo.”

³¹ Sitse Bathsheba zerelie di sie, “Kediu a niepuu David bu kechachie rheiketuou chüliecie,” sishü.

³² David-e sie, “Zadok zievo-u, Nathan siedzekesiu mu Jehoiada nuou Benaia kiepie a ki shücie,” sita. Süla ukoe kediu mhodzü vorlie.

³³ Sitse kediu sie uko üse, “Nieko Jihova kituoko zelie, sidi a nuou Solomon bu a gada gei balie, sidi puo ze Gihon gei keliecie.

³⁴ Sidi Zadok zievo-u mu Nathan siedzekesiu unie bu puo kenhepie Israel kediu chüliecie, süsie ketsüu khoushülie, di sie, ‘Kediu Solomon bu rhei kechau chücie!’ ilie.

³⁵ Süsie nieko puo medzi khorlie, sidi puo bu vor di a kedibau gei baliecie; puoe a sou nu kedi chüketuo la; mu ae puo kedapie puo bu Israel mu Juda mho kedi chütuo üwate.”

³⁶ Sitse Jehoiada nuou Benaia kediu die kela di sie, “Amen, Jihova, a niepuu Kepenuopfü bu rei sikecü pu üthienyü.

³⁷ Jihovae kediu a niepuu ze ketuo tuoi, puo bu Solomon ze tuokelieu chüliecie, tsiu puo kediba chüpie kediu a niepuu David kediba ki rei zhakuoliecie,” sita.

³⁸ Süla Zadok zievo-u, Nathan siedzekesiu, mu Jehoiada nuou Benaia, mu Keretmiako, mu Peletmiako; keze tuo ke, sidi Solomon bu kediu kier gei balie, sidi puo ze Gihon nu vorlie.

³⁹ Sünunu Zadok zievo-ue rüsuopfhekiu nunu mithukia nu keba tier chülie di Solomon kenhelie, süsie ukoe ketsüu khoushü, siro themia peteko sie, “Kediu Solomon bu rhei kechau chücie!” ishü.

⁴⁰ Süsie themia pete puo siemedzi khor, luoü khou, sidi u neipie mhapuochü, süla uko pfhe kijüu vakezapfü vota.

⁴¹ Adonija mu puo soko pete hielieta tse süu pfhe sishü. Joab-e ketsü kekhou pfhe sishü tse, puoe sie, “Kiüdi nadi nu mhapfhe kemerie chü bata ga?” sita.

⁴² Mu puoe mha pu thaluokecü nu harie, Abiathar zievo-u nuo Jonathan vor, Adonijae sie, “Lerlie, noe pelelie kesümia puo mu thedze kevi se vor mecie,” sishü.

⁴³ Sitse Jonathan-e Adonija die kela di sie, “Molie, kekreilamonyü úko niepuu kediu David-e Solomon chüpie puo bu kedi chüwate;

⁴⁴ Kediue Zadok zievo-u, Nathan siedzekesiu mu Jehoiada nuou Benaia, mu Keretmiako, mu Peletmiako bu puo ze di ketseshüwate, mu ukoe puo bu kediu kier gei balie.

⁴⁵ Siro Zadok zievo-u mu Nathan siedzekesiu unie Gihon nunu puo kenhepie puo bu kedi chüliete; mu ukoe sünunu u nei pie mhapuochü di khote, süla nadiu melemeüte. Hauha niekoe sikecü pfheülie.

⁴⁶ Solomon-e kedibau gei bate.

⁴⁷ Sizomoü kediu kituoko japie uko kediu niepuu David tsütuoü vor, di pukecü ‘N Kepenuopfü bu Solomon za chüpie n za ki rei meyiekuoshü, tsiu puo kediba chüpie n kediba ki rei zhakuoshücie.’ Tsiu kediu thuo zorei puo zhü geinu zeretsu zhüte,

⁴⁸ mu kecha chü sa di sie, ‘Jihova, Israelmia Kepenuopfü bu keviu chüliecie. Puoe a yiemia puo bu thie a kediba gei baliete, a mhinie rei süu ngushüte eru.’ ”

⁴⁹ Sitse Adonija soko pete michieta, sidi sielie, di u thuo u cha nu vo phreta.

⁵⁰ Siro Adonija Solomon preita; süla sielie di tuo vo ruosuoba kiau theze se thata.

⁵¹ Sitse mia Solomon ki, “Harie, Adonijae kediu Solomon prei bate; kekreilamonyü harie, puoe ruosuoba kiau thezelie, sidi pucü, ‘Kediu Solomon bu thie puo kituou zhiecha pie dukhriwa lho ükecü rüsepie a ki shücümu,’ si batelie.”

⁵² Sitse Solomon sie, “Mhanuü puoe pelelie kesümia puo ükecü thashükelie siewe, puo geinu thaprü yopuorei te kijü tsutalie lho; derei mhanuü puo gei mha kesuo ngulietakecü sie, puo siatatuo,” sishü,

⁵³ süla kediu Solomon mia ketseshü, sidi ukoe ruosuobau geinu puo ze kerta. Siro puoe vor di zeretsu kediu Solomon mhodzü zhüta; sitse Solomon sie puo ki, “N kinu votalie,” siwa.