Kediko Kenieu 9 - Angami Naga CL (Re-edited) Bible (BSI)

Jehu Kenhekelie

¹ Siro Elisha siedzekesiue siedzekesikokro nu mia puo kielie, di sie puo ki, “N chieca phaliecie, sidi n dzie nu tierbou hau pielie sidi Ramot-gilid nu vocie.

² No sünu volie tse, Nimshi nuo Jehoshafat nuou Jehu pfhüliecie, sidi tuo lelie, di puo zeko donunu puo ze tuotalie, mu puo ze kinu kesou nu lelie.

³ Süsie tierbouu chülie, di rupie puo tsü gei shücie, sidi sie, ‘Jihovae puya: Ae n kenhepie Israel mho kedi chüwate ho,’ silie. Süsie kikha khrülie di tatalie mu ge bata hie,” sita.

⁴ Süla khriesau, siedzekesiu tuo Ramot-gilid nu vo.

⁵ Puo rüpfhünuoko mhokezhakoe kehou keba teiki vorlie, ru puoe sie, “Kezhau, a dielie puo n la se tuolie.” Sitse Jehue sie, “Hieko supuo la ga?” Sitse puoe sie, “N lalie, kezhau.”

⁶ Sitse puoe sielie, sidi ki nu leta, tsiu puoe tier rupie puo tsü gei shü di sie, “Jihova Israel Kepenuopfüe puya; ae n kenhepie n bu Jihova themiako, Israel pete mho kedi chüliete ho.

⁷ Mu noe n niepuu Ahab kinumia pekawatuo, sidi a bu a kituo siedzekesiko zie, tsiu Jihova kituo pete zie Jezebel geinu khepu lielieketuo la.

⁸ Kekreilamonyü Ahab kinumiako pete katatuo: Ae Israel nu Ahab kinumia thepfumia ükecü kheko kediemia rei morei kedie kemomia rei pekawatuo.

⁹ Ae Ahab chüpie Nebat nuou Jeroboam ki, siro Ahija nuou Basha ki tuoiwatuo.

¹⁰ Tefükoe Jezril kijüko nunu Jezebel cütuo, tsiu miapuorei hapfü khrulie lho,” sita. Süsie puoe kikha khrülie di tata.

¹¹ Siro Jehue puo niepuu kezhako ki la vor tse, uko sie puo ki, “Mha pete puotou zo nhie? Kiüdi themia kenya cüu n ki vor ga?” Sitse puoe sie uko ki, “Nieko themiau mu puo kedipuo puya shi si ba.”

¹² Sitse ukoe sie, “Kecürüu! Vor di hieko ki pushücie!” si. Süla puoe sie, “Puo hau se a ki pushülie: ‘Jihovae puya, a n kenhepie n bu Israel mho kedi chüliete,’ ” sishü.

¹³ Sitse uko rükri sie u pfheneiko chülie, sidi puo la süko kelhapie chaprako khrashü, sidi ketsü khoushü di sie, “Jehu kedi chüte ho,” sita.

Jehu Joram Dukhrikewa

¹⁴ Sükemhie di Nimshi tsuu Jehu Jehoshafat nuoue sie di Joram perhieta. Joram mu Israel pete Aram Kediu Hazael perhietuo üdi Ramot-gilid nu pfhe bata.

¹⁵ Derei Joram Kediu Aram kediu Hazael ze kegeikecü ki Arammia puo bie kerüzakewa la puo chü kemenelietuo üdi Jezril nu vota. Süla Jehue sie, “Mhanuü hau nieko medo üliro, thedzeu pie Jezril nu putuo üdi nadiu nunu prata hie,” sita.

¹⁶ Sidi Jehue kierbagei gei sielie, di Jezril nu vota, Joram-e sünunu mhachü zhü, mu Juda Kediu Ahaziae Joram mehotuoü ker.

¹⁷ Siro Jezril tsiepfhe gei rükhoumia puo tha, mu puoe Jehu puo kro-u ze vorkezhü ngu di sie, “A themia kro puo ngute.” Sitse Joram-e sie, “Kierthemia puo pfhülie, di puo ketsepie uko ze kesecie, di puo bu, ‘Kezekevi la zo mo?’ siliecie.”

¹⁸ Süla kierthemiau vo puo ze kese di sie, “Kediue puya, ‘Kezekevi la zo mo?’ ” Sitse Jehue sie, “No kezekevi se kedipuo chütieya ga? No a sietsatie votalie.” Sitse rükhouue süu dze pu di sie, “Dielieue uko tsoliete, derei puo la vor mote.”

¹⁹ Sitse puoe va kenie kier geinu mia puo ketse lashü, süue uko ki vor di sie, “Kediue puya, ‘Kezekevi la zo mo?’ ” Sitse Jehue puo die kela di sie, “No kezekevi se kedipuo chütieya ga? No a sietsatie votalie” sita.

²⁰ Siru rükhouu süu dze pu di sie, “Puoe uko tsoliete, derei la vor motelie, siro Nimshi nuou Jehu kier kese mhietelie, kekreilamonyü puoe se ta vipie kenyamia mhiei tuote.”

²¹ Sitse Joram-e sie, “Dojüliecie.” Sitse ukoe puo kier-u dojüshü, sidi Israel Kediu Joram mu Juda Kediu Ahazia unie u thuo u kierbagei nunu Jehu ze kesetuoü pra, mu unie Nabot Jezril-u lie nunu puo selie.

²² Joram-e Jehu ngu tse, sie, “Jehu, kezekevi la zo mo?” si. Ru puoe puo die kela di sie, “N zuo Jezebel pieü kechü mu themouko si sei ba zo di kiüdi kezekevi balietuo mu?”

²³ Sitse Joram-e puo dzie kereilie di tata, di sie Ahazia ki, “Ahazia, kengukemvü bate ho,” sita.

²⁴ Sitse Jehue puo kekuo pete se puo theü gashü, sitse Joram boukanie donu pewa, tsiu theütsieu puo melou vakhropfü pata, sidi puoe puo kierbagei geinu tetsuta.

²⁵ Sitse Jehue sie puo khro kezhau Bidkar ki, “Puo chüliecie, sidi puo kelhoupie Nabot Jezril-u lie nu shüwacie: kekreilamonyü rükrashücie, a mu no puo puo Ahab siewhuo vokezhü ki, Jihovae puo perhielienukecü hau pie a noushüte.

²⁶ Kekreilamonyü ndu ae Nabot zieu, siro puo nuonuoko zie, nguwata tou zo, Jihovae puya; mu ae thechü hanunu n zhadavüshütuo, isi. Süla tsie Jihova die tuoi puo kelhoupie lieu nu shüwacie,” sita.

Jehu Ahazia Dukhrikewa

²⁷ Siro Juda Kediu Ahaziae hau ngu tse puoe Bet-hagantsa ta vota. Siru Jehue puo siewhuo vo di sie, “Puo rei pekawaliecie,” sitse ukoe puo kierbagei geinu puo peshü, süu Gur kekhotsa Ibliam nunu. Sitse puoe tase Megido nu vota, sidi sünunu siata.

²⁸ Sidi puo kezhako kierbagei geinu puo toupfü Jerusalem nu volie, mu David nadi nu puo puonuoko mekhru nunu puo khruwa.

²⁹ Tsiu Ahab nuo Joram dikelie cie kerepuokrü cie Ahaziae Juda nu dilie.

Jezebel Sesuo Chüketa

³⁰ Siro Jehue Jezril nu vorlie tse, Jezebel-e süu dze silie, puoe puo mhi kenhelie, mu puo tsü kezilie, di khirki nunu mehoshü.

³¹ Sitse Jehue careu nu ler tse, hapfüe sie, “Zimri, n niepuu dukhrikewau, n nou mene bate mo?”

³² Sitse puoe khirki mehoshü di sie, “Supuo a kitsa ba ga? Supuo ga?” si. Süsie iunukmia keniekese-e puo mehoshü.

³³ Ru puoe sie, “Cüpfü chü kelhouwalie,” sishü. Süla ukoe hapfü chü kelhouwa; sitse süpfü zie huoe sozha gei mu huo kier gei dawata mu puoe puo phi pie süpfü kedewa.

³⁴ Süsie puo ler di mhacümhakrielie di sie, “Rüsekewa thenu hapfü mehoshüyi, sidi puo khruwalie, kekreilamonyü hapfüe kedimia nuonuo ze eru,” si.

³⁵ Derei ukoe puo khruwatuoü vo tse, hapfü tsütsoru, puo phi, tsiu puo dziezhü sie mha kekrei ngu salie mota.

³⁶ Süla ukoe la vor di puo ki pushü, sitse puo sie, “Hauha Jihova die puo kituou Tishbiu Elija ki pukeshüu zo, ‘Jezril lie nunu tefükoe Jezebel chü cütuo.

³⁷ Siro Jezebel kesiamo-u Jezril lieu nu thubuo tuoita zotuo; süla miapuorei sie, hauha Jezebel we’ sikecü pulie lho,” ishü zo.