Kediko Kenieu 8 - Angami Naga CL (Re-edited) Bible (BSI)

Shunampfü Kijü Kha Lakeshü

¹ Siro Elishae puo nuou chü perheikeshü thenupfü ki, “Sielie, sidi n kikru ze volie kevira vo lhoulie, Jihova pekriekecü kieshüte, mu süue kijüu gei cie thenie batatuocü la,” sita.

² Süla thenupfüe sielie di Kepenuopfü themiau die tuoi chülie; sidi hapfüe puo kinumiako ze tuota mu Filistinmia kijü nu cie thenie tuota.

³ Siro cie thenieu tseita tse, thenupfüe Filistinmia kijü nunu la vorta, sidi puo kinumiako mu puo kijü la kediu ki puo mezhiemelotuoü vo.

⁴ Sitse kediue Kepenuopfü themiau kituou Gehazi ze kerüchü di sie, “Elisha chükeshü mhatho kezhako pete a ki pushücie,” si.

⁵ Sidi puo kediu ki kedipuo mhie di kesiamia puo chü perheilie shikecü puthaluocü nu, harie puoe puo nuo chü perheikeshü thenupfüe puo nuou ze di puo kinumiako mu puo kijü la kediu ki puo mezhiemelotuoü vor. Sitse Gehazi-e sie, “A niepuu kediu, thenu hapfüha lie, mu hau puo nuou, Elishae chü perhei lakeshüulie,” sishü.

⁶ Siro kediue thenupfü ketso tse, hapfüe pushü, süla kediue hapfü la kezhamia puo petholie di sie, “Hapfü vie ükecü peteko, puo kijü vawa di tuoketa yawinu vor thie ketso lie nu puo si rüchükelie pete pie puo tsüwacie,” siwa.

Hazael Aramko Kedi Chükelie

⁷ Siro Elishae Damaska nu vor, siru Aram kediu Ben-hadad-e mhachüzhü, sitse mia puo ki, “Kepenuopfü themiau haki vor ba ho,” sishü.

⁸ Sitse kediu sie Hazael ki, “Mha methuo khashüketuo selie di vo Kepenuopfü themiau ze kesecie, sidi Jihova ki a kechü hanunu shürholietuo mo lho shiü ketsocie,” si.

⁹ Süla Hazael-e mha methuo khashüketuo la, puo ze kesetuoü vo, sükoe Damaska nu mha vi ükecü khe, ut hiedia pie keselie. Sidi vor puo mhodzünu thalie, di sie, “N nuou Ben-hadad Aram kediu a ketsepie n ki shüya, puo pukecü, ‘A kechü hanunu shürholietuo mo mo ga?’ ” si.

¹⁰ Sitse Elishae sie puo ki, “Tuo volie, di puo ki, ‘No shürholie tou zotuo,’ siliecie, derei Jihova puo siata tou zoketuo thashü a kiewate,” si.

¹¹ Sitse Hazael-e mengata kemochie, Elishae puo meho terü thata. Süsie Kepenuopfü themiau krata.

¹² Sitse Hazael sie, “A niepuu kiüdi kraya ga?” Siru puoe puo die kela di sie, “Kekreilamonyü noe Israelmiako gei mha kesuo chüshüketuo a si bate, uko dahou kemeteiko noe mi pie thewatuo, mu uko khriesako noe zhiecha se dukhriwatuo, siro uko nuonuoko kepfhütshie phaphawatuo, siro phoupiemo ketuoko va rhielawatuo,” sishü.

¹³ Sitse Hazael-e sie, “N kituou sü kedipuo ümu, puoe tefü yopuo ze, puoe mha kezha haikecü chülietuo me?” si. Elishae puo die kela di sie, “Jihova thashü a kiecü noe Siria mho kedi chütuo üshü.”

¹⁴ Süsie puoe Elisha kinu tuota, sidi puo niepuu Ben-hadad ki vor, ru puoe sie puo ki, “Elisha n ki, kedipuo pu ga?” Sitse puoe puo die kela di sie, “Puoe a ki noe shürholie tou zotuo üyalie,” si.

¹⁵ Derei süsienhie puoe zhükhrapfhe puo chüpie dzü nu selie, di pie kediu zie wheshü, sitse puoe siata. Sitse Hazael-e puo sou nu kedi chülie.

Jehoram-e Juda Mho Dikelie

¹⁶ Joram, Ahab nuou Israel kediu dikelie cie pengou cie, Jehoshafat nuou Jehoram-e Juda nu kedi chü sedelie.

¹⁷ Puoe kedi chükelie ki puo kelhouzha cie serekenie ta; mu puoe Jerusalem nu teicie thetha di.

¹⁸ Siro puoe Israel kediko zho nu tuo, Ahab kinumiako tuoicü chü; Ahab nuopfüe puo kimiacü la; mu puoe Jihova mhodzünu mha kesuo shüüko chü.

¹⁹ Sizorei Jihovae David puo kituou la, puoe kezie puo khapie puo mu puo nuosenuoyieko tsü seituo ükeshü la, Juda pekawa lho ülie.

²⁰ Puo teiki Edom-e sie di Juda perhieta, sidi uko thuo u kedi puo khapie balie.

²¹ Sitse Joram-e puo kierbagei pete zelie di Zair ki vo. Puoe theva geinu sielie di Edommia puo houpfü kebako, mu kierbagei mhokezhako perhie, derei puo chüpahiko ta u kinu vota.

²² Süla Edom-e thie ketso rei Juda perhie tuoya zo, siro sükisü Libna rei sie mia perhieta.

²³ Siro Joram mhatho kekreiko mu puoe chükeshü pete, sükosü Juda Kediko thedze Leshüda nu thupie zhü mo üme?

²⁴ Sidi Joram-e puo puonuoko ze zezhüta, sidi David nadiu nunu puo puonuoko ze khruwa mu puo nuou Ahazia puo sou nu kedi chülie.

Ahaziae Juda Mho Dikecü

²⁵ Ahab nuou Joram Israel mho dikelie cie kerekenie cie, Ahazia Jehoram nuou Juda nu di sedelie.

²⁶ Ahazia kedi chükelie ki puo kelhouzha cie mepfüekenieta; puoe cie puo Jerusalem nu di. Mu puo zuo zae Athalia, Israel kediu Omri tsupfü.

²⁷ Puo rei Ahab zho nu tuo, sidi Jihova mhodzüki mha kesuo shüüko chü, Ahab kinumiako mhiekecü chü, puoe Ahab-nuo kinumia nyaucü la.

²⁸ Siro puoe Ahab nuou Joram ze terhü nu vo di Ramot-gilid nu Aram kediu Hazael ze kegei, ru Arammiae Joram bie kerüzawa.

²⁹ Sitse kediu Joram-e Aram kediu ze terhü kechü ki, Rama nunu Arammia dzie nu rüzakelie chü kemenelietuo üdi Jezril nu la vo, siru Jehoram nuou Ahazia Juda kediu tsu di Joram Ahab nuou meho, puoe rüzapfü baketa la.