Kediko Kenieu 7 - Angami Naga CL (Re-edited) Bible (BSI)

¹ Derei Elisha sie, “Jihova pfhe rünyüshücie: Jihovae puya, sodu tsie meseki Samaria kharu nu thoulha kevithopfü kemejü puo shekel puo, mu barli kemejü kenie la shekel puo idi zeshütuo,” sita.

² Sitse kediu peleyakezha chüpahi mhokezhaue sie, “Mhanuü Jihovae teigei nu khirki chülie zorei, sükemhie chülie vi me?” sita. Derei puoe sie, “No n thuo n mhi se süu ngutuo, derei süu cülie lho,” sishü.

Aramko Taketa

³ Siro kharu sie ki mpa kechümia dia baya, ukoe huoniehuo ki, “Kiüdi we haki ba di siata ta?

⁴ Mhanuü ukoe sie, ‘Úko nadiu nu le khe’; irei nadiu nu rei pekriekecü ba, mu úko sünunu siatatie, derei úko hanu ba zorei khesiata zotie. Süla, úko Arammia rüpfhünuoko razhüchü nu vota khe, mhanuü ukoe u perheishü ro úkoe rheilietuo; mu mhanuü ukoe úko dukhriwa ro, úkoe siata zotie,” sita.

⁵ Sidi ukoe teizeitie ki sie di Aramko razhüchü nu le, sidi ukoe Aramko razhüchü nu vo, derei miapuorei sünu ba mota.

⁶ Kekreilamonyü Jihovae Aramko rüpfhünuo bu kierbagei pfhe, mu kier pfhe, siro rüpfhünuo kekra pfhe sita, sidi ukoe huoniehuo ki, “Israel kediue Hitmia kediko, mu Ijiptmiako kediko bu u perhietuo üdi uko zha khrüliete,” ibata.

⁷ Süla ukoe teizeitie ki sie tata, sidi u pfheki chüpie keba, u kierko u gadako, u kebachü chüpie kebako khawa di, u kerheiro kelalietuoü tata.

⁸ Tsiu mpa kechü hako uko razhüchü nu vorlie tse, ukoe süko pfheki puo nu le, sidi cüükrielie, sidi rakachü, suna mu pfhemenei ketalie di se vo keviewa. Süsie ukoe la vor pfheki chüpie keba kekrei puo nu le, di sünu rei mha ketalie sidi se vo keviewa.

⁹ Süsie ukoe sie huoniehuo üse, “Úko chü kebau puotou mote. Thie ha dieliekevi teisozha; mhanuü úko kemekrie di khise teikezie pfheta ro, kejo úko gei pfütuo; süla úko vo di kediu kinumiako ki pu khe,” sita.

¹⁰ Süla ukoe vor di nadiu carekepfheko kieshü, di sie uko ki, “Hieko Aramko razhüchü nu vo, derei sünu miapuorei ngu mo morei mhapfhe puorei si mote, mhapuorei ba mo derei kier khepie tha, gada khepie tha, mu pfhekiko chüpie keba touu ba zo,” sishü.

¹¹ Sitse care kepfhekoe pheshie di süu se kediu kinu kebako ki pushü.

¹² Sitse kediu theva sielie, di puo kituoko ki, “Arammia kedipuo mhie di uko petsou ba shikecü a nieko ki pushütuo, ukoe we khe keba si ba, süla ukoe razhüchü nunu prata di vo phouyo nu rüshü bate, mu ukoe lecü, ‘Úko nadiu nunu par ro, we perhei uko telietuo sidi nadiu lielietuo,’ ibate.”

¹³ Sitse puo kituoko mia puoe sie, “Huomia bu peshapie keba kier pengou selie, kekreilamonyü peshapie keba süko rei bie pejükewa Israel krodiu kemhie kemezhieta zotuo, süla uko ketseshü di meho khe,” silie.

¹⁴ Sidi ukoe kierbagei kenie selie, mu kediue uko ketsepie Aramko rüpfhünuo siepie di sie, “Tuo vo di mehoshücie,” sishü.

¹⁵ Ukoe süko siepie Jordan nu tsu, siru cha pete nu Arammia rükri di vakewa pfhemenei mu mhanyako thuo tshupfhü zhü, süla dieliemiako la vor di pie kediu ki pushü.

¹⁶ Sitse themiakoe tuo pra, sidi Aramko razhüchü valie, sidi Jihova die kemhie thoulha kevithopfü kemejü puo la shekel puo, mu barli kemejü kenie la shekel puo idi zeshü.

¹⁷ Siro kediue peleyakezha chüpahi kezhau bu care kepfheu chü tha, sitse themiakoe kharu nunu puo kedekhriwa, Kepenuopfü themiau kediu puo ki ketsur ki pukeshü mhiei di.

¹⁸ Kekreilamonyü Kepenuopfü themiau kediu ki “Sodu hateiki barli kemejü kenie la shekel puo, mu thoulha kevithopfü kemejü puo la shekel puo, Samaria kharu nu zeshütuo,” ikeshü ki,

¹⁹ kezha süue Kepenuopfü themiau die kela di sie, “Mhanuü Jihova teigei nu khirki chüshü zorei sükemhie chülie vi üme?” Ru puoe süu die kela di, “No n thuo n mhi üse süu ngutuo, derei no süu cülie lho,” ikeshü la.

²⁰ Mu puo gei sükemhie chüta zo, themiakoe careu nunu puo kedekhriwa.