Kediko Kenieu 6 - Angami Naga CL (Re-edited) Bible (BSI)

Seidurüu Dzü nu Rüdza Sierketa

¹ Sitse siedzekesiko kroe Elisha ki, “Harie, hieko n ze lhou keba thechü hau hieko la merethortelie.

² Hieko bu Jordan nu vo di, sünu mia puo sei puopuo toupielie, sidi sünunu thechü puo keselie di lhou batacie.” Sitse puoe sie, “Siliecie.”

³ Sitse uko mia puoe sie, “N pezie rei n kituoko ze vocie” sita. Sitse puoe sie, “A rei votuowe,” silie.

⁴ Sidi puoe süko ze vo, siro ukoe Jordan nu vorlie tse, ukoe sei wilie.

⁵ Derei mia puoe seibo puo wi keba ki, seidurüu rüzu dzü nu leta; siru puoe shiekhoui di sie, “Ce, chüwate, a niepuu hau thepukelie puomu ru!”

⁶ Sitse Kepenuopfü themiaue sie, “Süu te kirapuo tsuta ga?” Ru puoe thechüu thashü puo kie, sitse puoe seico puo talie, di süu kelhoupie sünu shü; sitse thegiu rüdza sierta.

⁷ Süla puoe sie, “Cüu chüliecie,” siru puoe puo dzie yhashü di süu chülie.

Elisha mu Aramko Dze

⁸ Siro Aram kediue Israel ze terhü chü, puoe puo kezhako ze kerüchülie di sie, “Thechü sünunu a razhü chütuowe,” sita.

⁹ Derei Kepenuopfü themiau die ketsepie Israel kediu ki shü di sie, “No thechü hanu vo moketuo leliecie, kekreilamonyü sünu Arammiako tsur bate ho,” sishü.

¹⁰ Süla Israel kediue mia ketsepie Kepenuopfü themiau pukeshü thechüu nu shü. Puoe va puo kenie zie thechü sünu kemichie baketa pu, süla sünu menuo bata.

¹¹ Haha la Aram kediue puo nou kemezhie philie, puoe puo kezhako kielie, di sie uko ki, “Úko donu supuonie Israel kediu yapie bate shi tsie a ki pushücie,” sita.

¹² Sitse puo kezhako mia puoe, “Miapuorei mowe, a niepuu kediu, süue Elisha, Israel nu siedzekesiuwe, no n zhübou nunu pukeshü dieko puoe pie Israel kediu ki puwaya.”

¹³ Sitse puoe sie, “Vo di puo kirapuo ba shiü pfhücie, sitse a mia ketsepie puo telietuomu.” Sitse miae puo ki, “Puo Dothan nu ba,” sishü.

¹⁴ Süla puoe kier mu kierbagei, tsiu rüpfhünuo kekra ketsepie sünu shü, ukoe theva nu vor, di nadiu houpfülie.

¹⁵ Siro Ukepenuopfü kituou khiserüna sielie di kitie pra ru rüpfhünuokoe kier mu kierbagei se vor nadiu houpfü ba di ngulie. Sitse puo kituoue sie, “Ce, a niepuu! Avu kedipuo chü ro vitie shi?”

¹⁶ Sitse puoe sie, “Michie hiecie, kekreilamonyü avu ze kethakoe uko kitsatie kethako ki krakuo,” sishü.

¹⁷ Süsie Elishae kecha chü di sie, “He-i Jihova, puo mhi bu mhirho parliecie, puo bu ngulieketuo la,” sishü. Süla Jihovae puo kituou mhi bie kemhirhoshü, sidi puo bu mha ngulie, kijüthou gei kier mu miü kierbagei thuo Elisha houpfü tha.

¹⁸ Sidi Aramkoe puo ki tsur puo petsou sie tse, Elishae Jihova ki cha di sie, “Themia hako bu u mhicietacie,” sishü. Ru puoe Elisha chakeshü mhiei uko mhi bie peciewa.

¹⁹ Sitse Elishae sie uko ki, “Hau chau mo, morei hau nadiu rei mo, a siemedziliecie, sitse ae nieko ze vo themia pfhü ketuou ki shütuo,” sidi puoe uko ze Samaria nu vowa.

²⁰ Ukoe Samaria nu kelie mumetha, Elishae sie, “He-i, Jihova, themia hako mhi bu mhirholiecie uko bu mha ngulieketuo la,” sishü. Jihovae uko mhi bu mhirholie, mu ukoe Samaria nu baketa ngulie.

²¹ Sitse Israel kediue uko ngu tse, puoe sie Elisha ki, “A puo, a bu uko dukhriwatuo me? A bu uko dukhriwatuo me?” sita.

²² Puoe sie, “Mo! No n zhiecha mu n theü pie uko telie di uko dukhriwa nyüya me? Niekhrüda mu dzü se vor uko mhodzünu shülie, sidi uko bu cüükrielie, sidi uko bu uko niepuu ki votacie,” sita.

²³ Sidi puoe uko la thehe kezha puo keseshü, sidi ukoe cüükrielieta tse, puoe uko ketsewa, mu ukoe uko niepuu ki vota. Süsie Arammiae vor Israel kijü whuo la sa mota.

Ben-hadad Samaria Kewhuo

²⁴ Puotei huo sie Arammia kediu Ben-hadad-e puo rüpfhünuoko pete kie kengulie; sidi Samaria whuo vor süu bolieta.

²⁵ Sidi Samaria perhie ba zoketa la sünu pekriepie mhapuochüta, sidi gada tsü puo rakachü shekel hiethetha, siro mekhrubuo mekhounuo dia-zapuo rakachü shekel pengoungou nu zeta.

²⁶ Tsiu Israel kediue nadi dahou gei tuo vozhü tse, thenumiapfü puoe sie puo ki, “A khruohishücie, a niepuu kediu!”

²⁷ Sitse puoe sie, “Mo! Jihova bu n khruohishülie. A kimhie di n khruohilie ta? Sieu nunu, morei khubedzü ketheu nunu tuo üme?”

²⁸ Derei süsie kediu hapfü ketso di sie, “N mezhie kikecüpuo ga?” si. Hapfüe puo die kela di sie, “Thenu hapfü a ki, ‘N nuou khashülie, avu thie puo cülie, mu sodu avu a nuou cütuo,’ site.

²⁹ Süla hienie a nuou cha cülie, siru süsienhie a puo ki ‘N nuou khashü di avu cütuo,’ si. Derei hapfü puo nuou keviewatelie,” sita.

³⁰ Kediu thenu hapfü die silie tse, puo pfhenei cierhata, puoe tsie nadi dahouu gei tuo vokezhü la, themiakoe puo gakhropfhe pie puo whepfü ketuo nguta.

³¹ Sitse puoe sie, “Mhanuü thie Shafat nuou Elisha tsüu puo bouka gei tuo üliro, Ukepenuopfü bu a gei sükemhiei tsiu sü kezie rei chüshücie.”

³² Sidi puoe puo mhodzü nunu mia puo ketseshü. Elisha tsie rei puo kinu ba, mu phichüko puo ze ba. Dielieu kevor mhodzü, Elishae sie phichüko ki, “Mia kedukhriue mia bu a tsü zielietuo ükecü la mia ketseshüwaketa si ba mo? Dielieu vor tse, kikha khalie, di süu nepie thatacie, puo niepuu phicha pfhe puo sietsa tuo mo üme?” sita.

³³ Puoe uko ki die pu thaluocü nu, dielieu puo ki tsur di sie, “Mha kesuo hau Jihova kinu vorwe, a kimhie di Jihova gei a kemerü ba salie ta?” sita.