Kediko Kenieu 5 - Angami Naga CL (Re-edited) Bible (BSI)

Naman Chü Keshürhokeshü

¹ Naman, Aram kediu rüpfhünuo mhokezhaue themia kezha puo mu puo niepuu mhodzünu therhupfü phi, kekreilamonyü Jihovae puo la kuokelie pie Arammia ketsü la. Puoe thepfu phikecü puo, derei puo mpa kechümia puo.

² Arammiae terhü whuo kepra tei puo nu, Israelmia kijü nunu kediemia yopuo ze vor; mu hapfüe Naman kimia theke chüya.

³ Siro puoe sie puo niepupfü ki, “A niepuu bu Samaria nu siedzekesiu ze ba ücüwe! Puoe mpa kechüu chü kemeneshüwatuomu ru!” sishü.

⁴ Süla Naman-e le di puo niepuu ki Israel kijü nu kevor kituopfü kepu die pushü.

⁵ Sitse Aram kediu sie, “Tsie volie, mu a leshü puo pie Israel kediu tsüshütuo” sishü. Süla puoe rakachü talent ker, suna shekel nyie sorou mu pfhenei thuli ker sa selie di tuo vota.

⁶ Sidi puoe leshüu se Israel kediu ki vor, sünu thupie ketuo hamhie, “A leshü hau vor n tsolie ro, a a kituou Naman ketseshüzhücü siliecie, süusü n bu puo mpa kechü chü kemeneshünukecü la.”

⁷ Siro Israel kediu leshüu phrüshü tse, puo pfhenei cierha di sie, “A Ukepenuopfü üme, dukhriwa mu perheilie vi üdi, themia hau mpa kechümia puo chü kemeneshünu ketse a ki shüya me? Leshücie, puoe kimhie di a ze kezesuolietuo shicü cha pfhü bate,” sita.

⁸ Elisha, Kepenuopfü themiaue kediu puo pfhenei cierhakewa silie tse, mia ketsepie kediu ki shü di sie, “No kiüdi n pfhenei cierhata ga? Puo bu a ki vorcie, puo bu Israel nu siedzekesi puo ba ükecü silietuo,” sita.

⁹ Süla Naman-e puo kier tsiu puo kierbagei ze vor Elisha kikha ki thalie.

¹⁰ Sitse Elishae dieliemia puo ketseshü di sie, “Tuo vo di Jordan rü nunu va thenie n khrüwaliecie, sitse n chüu vi lalietuo, mu no mesalietuo ho,” sishü.

¹¹ Derei Naman puo nou meyie di tuota, sidi puoe, “Harie, ae puo tuo par thalie di Jihova puo Kepenuopfü za kieshü, sidi puo dzie kegepie kechüpfü mhogei shü sidi mpa kechüu chü kemeneshükecü le.

¹² Damaska nu kerü Abana mu Farpar-e Israel nu dzü pete ki rei vikuo mo üme? Sünie nunu a khrüwa di mesalie lho üme?” Sidi puo rüreilie di puo nei mo se di tuota.

¹³ Derei puo kituou puo penuo phir di sie puo ki, “A puo, mhanuü siedzekesiue n bu mha kere huo chünu ro, no chü motatuo me? Puo n ki, ‘Khrüwa di mesatacie,’ ikeshü chülie lho üme?”

¹⁴ Sitse puoe tuo ke, sidi Kepenuopfü themiau die tuoi va thenie Jordan nunu petseshü, sitse puo chü nuoranuomia chü tuoi parta, di puoe mesalieta.

¹⁵ Süsie puo mu puo ze ketuo pete Kepenuopfü themiau ki vorlie, sidi puoe vor puo mhodzünu thalie, di sie, “Harie, a tsie we, Israel nu zo kemosie kijü pete nu Ukepenuopfü tuo mokecü siliete, süla tsie n kituou kinu mha hako lieliecie” sita.

¹⁶ Derei puoe sie, “Jihova, a puo lie chüyakezhau rhei ketuo tuoi a mhapuorei lielie lho,” sishü. Sitse puoe puo bu lielienu beita, derei puoe mvüta.

¹⁷ Sitse Naman-e sie, “Siüliro, a n ki chaya rünyo kier pie kenie pie n kituou tsüwacie, kekreilamonyü n kituoue Jihova rübei sie kethe ruosuo morei ruosuo chüpie terhuo kekrei tsü salie lhote.

¹⁸ Mha hau la Jihova bu n kituou kejo vashücümu: A niepuue a dzie mengupie rüsuotuoü Rimon ki nu kele ki, Rimon ki nu nuketsuya, mu ae Rimon ki nu nuketsukecü ki, Jihova bu hanunu n kituou kejo vashücümu.”

¹⁹ Sitse puoe sie puo ki, “N nou mene di tuo votaliecie,” siwa. Derei Naman-e tuo za votazhü tse,

Gehazi Mha Mehoukecü

²⁰ Gehazi, Kepenuopfü themiau Elisha kituou sie, “A niepuu Aram-u Naman mha se kevor puo dzie nunu lielie mo di kelawate, Jihova rhei ketuo tuoi, a ta puo sie whuo votuo, sidi puo kinu mha huo lielietuo,” sita.

²¹ Sidi Gehazi-e Naman siemedzi vo. Tsiu Naman-e mia puoe ta puo sie whuo kevor ngu tse, puo ze kesetuoü kierbagei geinu kerlie, sidi sie, “Mhapuo ta mo nhie?”

²² Ru puoe sie, “Mhapuoreita mo. A niepuue a ketseshü di a bu, ‘Tsie kinu Efraim kijüthou geinu siedzekesiko kro nu khriesamia kenie a ki vorte; a n ki chaya, rakachü talent puo mu pfhenei thuli kenie pie unie tsüyi,’ idi pushünulie.”

²³ Sitse Naman sie, “N pezie rei talent kenie rei lieliecie,” sita. Sidi puo bu lielienu beita, di likhuo kenie nu rakachü talent kenie phashü, pfhe thuli kenie sashü, sidi süko pie puo kituomia kenie bu pielie, sidi unie-e Gehazi mhodzünu toupie vota.

²⁴ Sidi puoe dahou penuo vorlie tse, puoe unie dzie nunu pielie, sidi pie kinu shüwa, sidi puoe unie ketsewa, tsiu unie-e tuota.

²⁵ Puoe le puo niepuu mhodzünu thalie, siru Elishae puo ki, “Gehazi no kirapuo vo ga?” si. Sitse puoe sie, “N kituou mhakipuorei vo molie,” sita.

²⁶ Derei puoe sie puo ki, “Themia puo kierbagei geinu ker n ze kesekecü ki a ruopfü nunu n ze tuo mo üme? Puotei haue raka mu pfhenei, siro oliv lie nu khubelie, siro tekuo mu thudo, tsiu kituo thepfumia mu thenumia liekecü teiu üba me?

²⁷ Süla Naman mpa kechüu n gei mu n nuonuoko gei kechachie tuotatuo” si. Sitse puoe puo mhodzü nunu mpa chü di krapie pekrie mhiei parta.