Kediko Kenieu 4 - Angami Naga CL (Re-edited) Bible (BSI)

Samipfü Tier Chü Pekrakeshü

¹ Siro siedzekesiko kro nu mia puo kimiapfüe kra di sie Elisha ki, “N kituou a nupfue siate; mu n kituou Jihova preiyakezha puokecü noe si ba. Mha pie mia thepuyakezhamia puoe a nuonie pie puo diemia chütatuo üdi zetuoü vorte.”

² Sitse Elishae sie puo ki, “A bu n la kedipuo chünu ga? N kinu kedipuo ba ga? se a ki pucie.” Sitse hapfüe sie, “N kituopfüe kinu mhapuorei ba mo, tier pou puo rübei keba zo.”

³ Sitse puoe sie, “Vo di n siezanuomia pete ki mhabou kemethuo lukihaki nu thepuliecie mu kengu petsawa hie.

⁴ Sidi vorlie tse, kikha khapie no mu n nuonuoko khalie, sidi tier lapie mhabou süko pete nu shüshülie, siro tshuketako kelakreipie bawalie,” sishü.

⁵ Süla hapfüe puo kinu tuota, sidi kikha khapie puo mu puo nuonuoko khalie, puo nuonuoko mhabouko se vor mu puoe lapie süko nu shü ba zo.

⁶ Mhabouko tshuta tse, hapfüe puo nuou ki, “Mhabou puo se sa vorcie.” Siru puoe sie, “Mhabou ba sa motelie.” Sitse tier kru sa par mota.

⁷ Sitse hapfüe vor di Ukepenuopfü themiau ki pushü ru puoe sie, “Vo di tier-u zeliecie, sidi n puko suwalie, sidi no mu n nuo nnie mia pu chü kepeshako se di lhoulie,” sishüwa.

Elisha mu Shunampfü Dze

⁸ Khunhie puo Elishae Shunam nu vo, sünu mhakenyimiapfü puo ba, ru süpfüe puo bu puo kinu mhacünu beita, süla puoe cha süu pfüthe kevo metsei, puoe sünu ler di mhacücüya.

⁹ Sitse hapfüe sie puo nupfu ki, “Harie, tsiemelie avu pfüthe vovoyakezha hau Ukepenuopfü themia kemesamia puokecü a si bate.

¹⁰ Avu kibou kecü yopuo chülie khe, sidi puo la thezhü puo, mizhü puo, mu mitubou puo khapie balie, sitse puoe avu ki vor tse puoe sünu balietuo,” sishü.

¹¹ Khunhie puo puoe sünu vor, siru puoe kibouyo nu kho di sünu zhülie.

¹² Sitse puoe puo kituou Gehazi ki, “Shunampfü kieshücie,” si. Puoe hapfü kieshü tse, hapfüe vor puo mhodzünu thalie.

¹³ Sitse puoe puo kituou ki, “Hapfü ki, kedipuo chüpie n tsütuo ga? Noe kemezhie di hie la mha hako keseshü. Hie bu n sou nu vo kediu morei rüpfhünuoko mhokezhau ki putuo me?” Siru hapfüe sie, “A a thuo a themia donu lhou ba ze.”

¹⁴ Sitse puoe sie, “Di siliro kedipuo chüpie hapfü tsü ta?” Sitse Gehazi-e sie, “Puoe puo nuo jü, siro puo nupfu rei tsate.”

¹⁵ Sitse puoe sie, “Thenupfü kieshücie.” Sitse puoe hapfü kieshü ru puoe kikha ki thalie.

¹⁶ Siru puoe sie, “Thecie hateiki, noe n nuo thepfumia yopuo ciepie batatuo.” Sitse hapfüe sie, “Silie lho, a niepuu, he-i, Kepenuopfü themiau, n kituopfü sewa hieyi,” sita.

¹⁷ Thenupfüe nuonipfülie di Elisha puo ki pukeshü teiu vor tse thepfunuomia yopuo penuolie.

¹⁸ Siro unuoyo phichülie tse, khunhie puo, puoe lie kereko donu puo puo ki tsu.

¹⁹ Ru puoe puo puo ki melo di sie, “He-i, a tsü, a tsülie,” ita. Sitse puo puoe kituomia puo ki, “Puo pfü vo puo zuo ki shücie.”

²⁰ Sitse puoe puo pfü puo zuo ki vorshü, ru unuoyo puo zuo do gei thehe ketso balie, sidi siata.

²¹ Sitse hapfüe sielie di puo khapie Kepenuopfü themiau zhü gei zhüwa, sidi kikhapie puo khawa sidi chazou prata.

²² Süsie puoe puo nupfu kielie di sie, “Kituomia puo mu gada puo ketseshü a tsücie, sitse a rükri Kepenuopfü themiau ki vo di vortuolie,” si.

²³ Puoe sie, “No thie kiüdi votieya mu? Thie khrü kesa mo morei Sabat rei moe?” Sitse hapfüe sie, “Hamolie.”

²⁴ Sitse puoe gadau gei balie di puo kituou ki, “Gadau whuo zo volie; a n ki pu zo kemosie a la üdi rüleita hie.”

²⁵ Sidi puoe tuoshü di Karmel Kijüthou gei Kepenuopfü themiau ki vorlie. Süki Ukepenuopfü themiau kepetse nunu hapfü ngu tse, puo kituou Gehazi ki, “Mehoshücie, lutsakhie Shunampfü vorzhie.

²⁶ Ta mhai vo puo ze kesecie, sidi sie puo ki, No vi ba zo mo? N nupfu vi ba zo mo? N nuoyo vi ba zo mo?” Siru hapfüe sie, “Vi ba zowe,” si.

²⁷ Siro hapfüe kijüthou gei Ukepenuopfü themiau ki vorlie tse, puoe puo phi thezelie, sitse Gehazi-e puo newatuoü phi. Derei Ukepenuopfü themiau sie, “Puo bu ci bacie, kekreilamonyü puo thenou kemezhie secü nu bate, Jihova süu a kinu keviewate tsiu a ki pushü mote.”

²⁸ Sitse hapfüe sie, “A niepuu bu thepfumia puo a tsünu cha me? Ae sie, a se hiecie, imo me?”

²⁹ Ru puoe sie Gehazi ki, “N chie phalie, tsiu n dzie pie a the thezelie di tuoshülie. Mhanuü no mia ze kese zorei, mia kelu hie, mu mhanuü mia n kelu zorei, mia die kela hie, sidi a the pie unuoyo zie gei shücie” sita.

³⁰ Sitse unuoyonuo zuoe sie, “Jihova rhei ketuo tuoi, mu no rei rhei ketuo tuoi, a n sa mo di vo lho.” Siru puoe sielie, sidi hapfü siemedzi vota.

³¹ Siro Gehazi vo rielie, sidi ketheu pie unuoyo zie gei bashü, derei mhapfhe morei rheikelie puorei chülie mo, süla puo la vor di sie puo ki, “Unuoyo colie molie,” si.

³² Elishae kinu lelie tse, unuoyo puo zhü geinu siazhü ngulie.

³³ Süla puoe lelie mu kikhapie unie khalie, di Jihova ki chashü.

³⁴ Süsie puoe sie unuoyo gei zhülie, sidi puo tie pie puo tie merelie, puo mhipie puo mhi relie, siro puo dzienie pie puo dzienie ba shülie, sidi unuoyo gei zhüshü tse, unuoyo mo le parta.

³⁵ Sidi puo la kerlie, di kinu tuo phi mu phishü, süsie la sie puo gei zhü lashü, sitse unuoyo va thenie rüthieshü, sidi unuoyo mhirho parta.

³⁶ Sitse Elisha Gehazi kie di sie, “Shunampfü kieshücie.” Ru puoe puo kieshü. Hapfüe puo ki vor tse, puoe sie, “N nuou zeliecie.”

³⁷ Sitse hapfüe vor di tsu puo phi nu zhüta, sidi kijü zerepfü zhüta; süsie puoe puo nuoyo pielie di tuota.

Elishae Ungomhatho Chükeshü

³⁸ Siro Elishae Gilgal nu la kevor ki, kijüu gei pekrie bata. Siro siedzekesiko kro puo mhodzüki ba; ru puoe sie puo kituou ki, “Gali kezhau peleshülie, sidi siedzekesiko kro la ga chaliecie.”

³⁹ Sitse mia puoe gadatuoü lie nu vo, sitse nhaga puoro chükezhü puo ngulie, sidi puoe süu si puo pfhethula ketshu rielie, sidi vor, dapie gali nu chashü, kekreilamonyü ukoe süu kedipuo shi si mo.

⁴⁰ Sidi ukoe kapie themiako bu cütuoü sie derei ukoe gau cü ba tse, ukoe sie, “He-i, Kepenuopfü themiau, gali nu kesia batelie.”

⁴¹ Sitse puoe sie, “Siro thou huo se vorlie,” sidi puoe süu kelhoupie galiu nu shü, di sie, “Kapie themiako bu cüliecie.” Siru gali nu mhapuorei u va pesuo mo.

Elisha Mia Krie Puo Vachükeshü

⁴² Mia puoe Baal-shalisha nunu vor, mu puo lieyie kerieu chieshü se vor, niekhrüda mepfü, tsiu telha icü puo likhuo nunu se vor Kepenuopfü themiau tsü, siru puoe sie, “Se themiako tsüshü di uko bu cüliecie,” sita.

⁴³ Puo kituou sie, “A kimhie di hakoyo pie mia krie puo mhodzü shülie ta?” sita. Puoe la sie, “Themiako tsüshü di uko bu cüliecie, kekreilamonyü Jihovae puya, ‘Ukoe cülietuo, tsiu pesha reilietuo,’ ” sita.

⁴⁴ Süla puoe süko pie uko mhodzünu shü, mu ukoe süu cülie, tsiu Jihova die tuoi huo peshalieta.