Kediko Kenieu 3 - Angami Naga CL (Re-edited) Bible (BSI)

Jehoram-e Israel Mho Dikecü

¹ Juda Kediu Jehoshafat dikelie cie kerethetha cie, Ahab nuou Jehoram-e Samaria nunu Israel mho kedi chülie, sidi cie kerekenie di.

² Puoe Jihova mhodzünu mha kesuo shüüko chü, derei puo puo mu puo zuo unie kemhie zota mo, kekreilamonyü puoe puo puo chükeshü Baal miarhi chüwa.

³ Sirei puoe Nebat nuou Jeroboam, Israel chü kephoumakewau kephoumako chü tuota, puoe sünunu rüdilie mo.

Israelko Moab Mho Kuolieketuo Elishae Pukeshü

⁴ Moab kediu Meshae tekuo periya, sidi puoe tekuo lakh puo mu mvüdo lakh puo siro chümie sa di pie Israel kediu khruo khruoya.

⁵ Derei Ahab siata tse, Moab kediu sie Israel kediu perhieta.

⁶ Süla Jehoram kediue Samaria nunu pra di Israel pete kezulie.

⁷ Süsie puoe tuo vo di mia ketsepie Juda kediu Jehoshafat ki shü di sie, “Moab kediu sier a perhie bate; no a ze vo di Moab perhietieya mo?” Sitse puoe sie, “A khotuo; a n ze keyapietuo, a themia sü n themia zo, mu a kier sü n kier kemhie zo,” sishü.

⁸ Sidi puoe, “Avu kiu cha ze kho ta?” si. Jehoram puo die kela di, “Edom rayhau pfüthe votuo,” sita.

⁹ Sidi Israel kediu, Juda kediu mu Edom kediu uko keze tuoshü. Siro ukoe zha thenie whi tuota mu chüpahiko siro uko krodiko, mu uko siemedzi ketuo khunuoko la dzü jüta.

¹⁰ Sitse Israel kediu sie, “Hou! Jihova kedi se hako kie kengukeshü, úko pie Moabmia dzie nu shüwaketuo zote ha.”

¹¹ Derei Jehoshafat-e sie, “Haki Jihova siedzekesimia ba di puo ki, Jihova ketsolieketuo puorei ba mo me?” Siru Israel kediu kituoko mia puoe sie, “Hakiha Shafat nuou Elisha dzü lapie Elija dzie nu keshüu bayalie.”

¹² Sitse Jehoshafat-e sie, “Jihova dieu puo gei tuoya ho,” sita. Süla Israel kediu, Jehoshafat mu Edom kediu uko puo ki tsu.

¹³ Sitse Elishae sie Israel kediu ki, “A n ze kedipuo chü ta? N thuo n puo mu n zuo siedzekesiko ki voliecie.” Siru Israel kediue sie, “Mo, kekreilamonyü Jihova thuo hieko kedimia se hako kie kengupie Moabmia dzie nu khashüwatuo üzhie.”

¹⁴ Sitse Elishae sie, “Krodiko Jihova, a puo lie chüyakezhau, rhei ketuo tuoi, a Juda kediu Jehoshafat rhuyakezha la kemosie we, a rürei n kitsa vor, morei meho reilie lhociü.

¹⁵ Derei tsie ütsali chüyakezhamia puo ze vor a tsücie,” sita. Siro ütsali chüyakezhau puo bazha khou keba ki, Jihova kekuou puo gei vorta.

¹⁶ Sitse puoe sie, “Jihovae puya, ‘A dzükhou chüpie razha hau ketshu chüshütuo’ si.

¹⁷ Kekreilamonyü Jihovae puya, ‘Nieko teikhrie morei teirü ngulie lho, derei dzükhouko nu dzü thu tshupfü batatuo, sidi nieko, nieko thuko, mu nie khunuoko bu krielietuo.’

¹⁸ Jihova mhodzüki we hau mha kerüü puo zo, sizomoü puoe Moabmia rei sa pie nieko dzie nu shüwatuo.

¹⁹ Siro nieko dahou houpie keba rüna pete, mu nadi kevi pete penyülietuo, mu seibo kevi pete wiwatuo, siro dzüluo pete khawatuo, tsiu ketsie pie kijü kevi pete bie pesuowatuo,” sita.

²⁰ Süsieduü, ruosuo khashüketuo teiki, harie, Edom tsatie nu dzü vorta, sidi nadiko nu dzü thu tshulieta.

²¹ Siro Moabmiakoe kedi hako uko ze kegeituoü vorketa silie tse, ukoe nhicutho nunu phichütho ketso rünyie selie kevi pete kie kengulie, sidi kho kijü tierie nu thalie.

²² Sidi ukoe khiserüna sielie, tsiu niaki ziepie dzüva shü, siru Moabmiakoe lutsakhie nu dzü ngupie thezie kemhieta.

²³ Sitse ukoe sie, “Hauha thezie zo; kediko keze kegei di uko huoniehuo dukhrita meciete; süla tsie, Moab sie di mha valiecie,” sita.

²⁴ Derei ukoe Israel razhüchü nu vor tse, Israelkoe sie di Moabmiako bieta, mu sükoe uko mhodzü nunu tata kemochie uko perhie zo vo; mu ukoe Moabko bie zo se uko rüna nu rei vota.

²⁵ Ukoe nadiko biewa, siro uko mia puopuokecü ketsie kelhou di ketsie pie kijü kevi pete tshuwata, siro ukoe dzükhou pete luowa, tsiu seibo kevi pete wiwa; si vo Kir-hareset tsiepfhe rübei biewa mo ba di tsiedeiro kesemiako bu vor süu biewata.

²⁶ Tsiu Moab kediue terhüu puo la reseketa ngu tse, puoe zhiecha kepie mia krie thenie zelie di Edom kediu mese nu pfüphapfü votuoü sie, derei ukoe chülie kenjüta.

²⁷ Sitse puoe puo nuo nuorieu, puo sou nu kedi chüketuou zelie, di puo pie dahouu geinu kethe ruosuo puo chüwa. Sitse noupfhü kere Israel gei sieta, sidi ukoe puo kinu tuota, sidi la u thuo u ra vota.