Biblia Todo Logo
Bìoball air-loidhne

- Sanasan -

Kediko Kenieu 21 - Angami Naga CL (Re-edited) Bible (BSI)


Manasseh Kedi Chükelie
( 2 Seyie 33:1-20 )

1 Manasseh-e di sedekelie ki puo kelhouzha cie kerekenieta, mu puoe Jerusalem nu cie hiepengouepengou di. Puo zuo zae Hefziba.

2 Puoe Jihova mhodzüki mha kesuo shüüko chü, Jihovae Israelmiako mhodzü nunu seyie whuokewako kerütsekecü kechü tuoi.

3 Kekreilamonyü puoe, puo puo Hezekia thechü kerükrie bie pesuokewako chü lalie; tsiu Baal la ruosuobako chülie, siro Ashera chülie, Israel kediu Ahab tuoikecü chü, sidi teigei ketuo pete rüsuo mu süko lie chü.

4 Puoe Jihova kinu ruosuoba chülie, süu dze Jihovae pukecü, “A a za pie Jerusalem nu shütuo,” si.

5 Tsiu puoe ruosuobako chüpie teigei krodiko la Jihova kiu nu kitie lhanie nu ba.

6 Siro puoe puo nuou pie mi nu the, tsiu puoe siedze pukecü mu thuophiko se mu siamiakemeikecüko siro themou rüsa, siro puoe Jihova mhodzüki kesuo shüüko chü di puo nou chü kemeyie.

7 Siro puoe Ashera mharhi doukelieu pie kiu nu doushülie, süu dze Jihovae David ki, mu puo nuou Solomon ki, “Ki hanu, mu Jerusalem nu, Israel seyieko donunu a kedakelieu, ae kechachie a za khapie batuo,

8 a khapie uko puonuoko ketsü kijü nunu Israel chü kediwalie lho, ae diekhakeshüko pete mu a kituou Mosae khakeshü thezho-u pete chüüzelie liro,” sita.

9 Derei ukoe rünyülie mota; mu Manasseh-e uko cha tha kekrüpie Jihova Israel mhodzü pekakewa seyieko ki rei mha kesuo chü sakuota.

10 Siro Jihovae puo kituo siedzekesiko geinu pu di sie,

11 “Manasseh Juda kediu mha kerütsekecü hako chükecü, tsiu puo mhodzü ketuo Amormia pete ki rei mha kesuo chükuokecü la, siro puoe terhuorhi pie Juda chü kephoumawakecü la;

12 Jihova, Israel Kepenuopfüe pucü: Ae themia kehoupuorei süu sikecü ki unyieto kemeso chü zoketuo mha kesuo sikecü pie Jerusalem mu Juda gei se vorzhie ho.

13 Ae Samaria, siro Ahab kikru kemejüro teshüpie Jerusalem mho shütuo, mia puoe mekhou süwayakezha tuoi, a Jerusalem süwatuo, süu süwa, tsiu süu phou pekhegewatuo.

14 Siro ae a kayie lhiepie kebau khawatuo, sidi süko pie uko ngumvümia dzie nu shüwatuo; sidi ukoe uko ngumvümia chüte mu mia bu pekakelie vie chütatuo.

15 Kekreilamonyü ukoe a mhinguki mha kesuo shüüko chü tuote, sidi a nou chü kemeyie, uko puonuoko Ijipt nunu parkelie yawinu vor thie ketso si tuota zo.”

16 Sizomoü Manasseh-e jokemomia zie pekruthorwate, Jerusalem tietsatiepuo nu vo kekreitsa tsota kemochie siwate, puoe Juda chü kephoumakewa sie rei, Jihova mhodzü mha kesuo shüüko chü.

17 Mu Manasseh mhatho kekreiko, tsiu puoe chükeshü peteko, siro puo phoumawaketa kephouma, süko Juda Kediko thedze Leshüda nu thupie zhü mo üme?

18 Sidi Manasseh puo puonuoko ze zezhüta, sidi puo thuo puo tezie, Uza zie nunu puo khruwa. Sitse puo nuo Amon puo sou nu kedi chülie.


Amon Kedi Kechü
( 2 Seyie 33:21-25 )

19 Amon-e di sedekelie ki puoe cie mepfüekenieta, mu puoe Jerusalem nu teicie kenie di. Siro puo zuo zae Meshulemet, Jotbamia Haruz nuopfü.

20 Tsiu puoe Jihova mhodzüki mha kesuo shüüko puo puo Manasseh tuoi di chü.

21 Siro puoe puo puo kevo cha pete nu vo, puo puoe terhuorhi lie kechüko lie chü mu süko rüsuo zo.

22 Puoe puo puonuoko Kepenuopfü khawa, tsiu Jihova cha nu tuolie mota.

23 Siro Amon kituoko sie puo perhieta, sidi kediu kiu nunu puo dukhriwa.

24 Derei kijüu nu themiako Amon kediu ngumvükecü pete dukhriwa. Sidi kijüu nu themiakoe puo nuou Josia chüpie puo sou nu kedi chülie.

25 Mu Amon mhatho kekreiko puoe chükeshüko, sükosü Juda Kediko thedze Leshüda nu thupie zhü mo üme?

26 Mu Uza tezieu nu puo mekhru nunu puo khruwa: Sitse Josia puo nuou puo sou nu kedi chülie.

The Bible Society of India

© 2023, Used by permission. All rights reserved. More

Bible Society of India
Lean sinn:



Sanasan