Kediko Kenieu 2 - Angami Naga CL (Re-edited) Bible (BSI)

Elija Ze Teigei Khoketa

¹ Siro Jihova teikhrie khriedi nunu Elija chüse teigei khotaketuo tei vorketa ki, Elija mu Elisha unie-e Gilgal cha nu vorzhü.

² Sitse Elijae sie Elisha ki, “A n ki chaya, no haki pfhe baliecie; kekreilamonyü Jihovae a ketsepie Bethel nu shütelie,” si. Derei Elishae sie puo ki, “Jihova rhei ketuo tuoi, siro no rei rhei ketuo tuoi a n khawalie lho,” silie. Süla unie keze Bethel nu ke.

³ Sitse Bethel nu keba siedzekesiko kro Elisha ki vor di sie puo ki, “Thie Jihova n kinu n niepuu zetatuo ükecü no si ba mo?” Sitse puoe sie, “A süu si ba; nieko kemekrietacie,” sita.

⁴ Elija sie puo ki, “Elisha, a n ki chaya, no hakiha nu pfhe baliecie; kekreilamonyü Jihova a ketsepie Jeriko nu shütelie,” si. Derei puoe sie, “Jihova rhei ketuo tuoi, siro no rei rhei ketuo tuoi a n khawa lho,” silie. Süla unie Jeriko nu ke.

⁵ Sitse Jeriko nu keba siedzekesiko kroe Elisha ki vor di sie puo ki, “Thie Jihova n kinu n niepuu zetatuo ükecü no si ba mo?” Sitse puoe sie, “U, a si ba, nieko kemekrie bataliecie.”

⁶ Sitse Elija sie puo ki, “A n ki chayalie, haki nu pfhe baliecie; kekreilamonyü Jihova a ketsepie Jordan nu shütelie,” si. Sitse puoe sie, “Jihova rhei ketuo tuoi, siro no rei rhei ketuo tuoi, a n khawa lho zo,” silie. Süla unie kenienie keze vo.

⁷ Tsiu siedzekesiko kro mia hiepengou rei vo, sidi kepetse nunu mehotuoü tha, mu unie Jordan khie tha.

⁸ Sitse Elijae puo pfhe rhuopie kezilie di se dzü vüshü, sidi unie kijü keso nu parlie kemochie, dzüko kezapie lutsahatsa shüwa.

⁹ Siro unie lutsakhie pfülie tse, Elija sie Elisha ki, “N kinu a zeketa mhodzü, a bu kedipuo chüshü n tsünu shiü chaliecie.” Sitse Elisha sie, “A n ki chaya, n kekuo de kenie bu a gei balieyi.”

¹⁰ Siru puoe sie, “No mha kere puo chate, sishierei, n kinu a zeketa ki a ngu ro, süu pie n tsütuo, derei no a ngu mota tse, silie motatuo.”

¹¹ Sidi unie kerüchü di tuo vokezhü ki, harie, miü kierbagei puo mu miü kierko par di unie pfükhowa, sitse Elijae khriewhi puo geinu teigei khota.

¹² Elishae süu mehoho mu kra di sie, “A puo, a puo! Israel kierbagei mu kier themiako!” ita. Mu puoe puo ngu sa mota; sitse puo thuo puo pfhe lhelie di cierha kenie chüwa.

Elishae Elija Sou Chükelie

¹³ Siro puoe Elija geinu rülheketa pfheu chü pielie, sidi la vo Jordan rü khie thalie.

¹⁴ Sidi puoe Elija geinu rülheketa pfheu pie dzü vüshü di sie, “Jihova, Elija Ukepenuopfü kirapuo tuo ga?” si. Süsie puoe dzü vüshü tse, khopie lutsahatsa vawata; sidi Elisha tuo philie.

¹⁵ Mu siedzekesiko kro Jeriko nunu meho kethako puo ngu tse, ukoe sie, “Elija kekuo Elisha gei bate,” sita. Sidi ukoe puo ze kesetuoü vor, sidi puo mhodzü zeretsu kijü zhüta.

¹⁶ Sitse ukoe sie puo ki, “Harie, tsie, n kituomia ze keba khriesa kevi mia hiepengou ba, hieko chaya, uko bu vo n kepethau pfhücie, Jihova Ruopfüue puo toupie sie di puo petepie kijüthou huo gei, morei razha huo nu shüwa rei silie lhomu.” Sitse puoe sie, “Nieko uko ketseshü hie,” siwa.

¹⁷ Derei ukoe puo mengata kemochie pu zo bata, süla puoe sie, “Ketseshücie” sita. Süla ukoe mia hiepengou ketseshü, sidi ukoe zha se puo pfhü derei puo ngulie mota.

¹⁸ Süsie uko puo ki la vor, kekreilamonyü puo Jeriko nu ba zoluo, puoe sie uko üse, “A nieko bu vo hie, idi pushü mo üme?” sita.

¹⁹ Siro nadiu themiakoe sie Elisha ki, “Harie, a niepuu rei ngu keba tuoi, nadiu thechü kevi puo nu ba, derei dzüue suo, siro kijü kro molie,” si.

²⁰ Ru puoe sie, “Lepou kesa puo se a ki vorlie, sidi metsie pie sünu shülie,” sishü. Süla ukoe süu se vor puo tsüshü.

²¹ Sitse puoe dzüluoki nu vo, sidi metsie kelhoupie sünu shü, sidi sie, “Jihovae puya, ae dzü hako chü kemesawate ho; hasietsa hanunu kesia morei kijü kro moketa parlie lho,” sishü.

²² Sidi Elisha kepu mhie dzü chü kemesakelie thie ketso rei si tuoya zo.

²³ Puoe sünunu Bethel nu kho, sidi puoe cha nu khozhü ru nadiu nunu nhicumia kro puo par, sidi puo kre di sie, “Tsüpieu; tuotacie! Tsüpieu, tuotacie.”

²⁴ Sitse puoe rürei vor, sidi süko mehoshü di uko rüsewa, sitse ketsa nunu thega krü kenie par, sidi nhicuko mia hiediaekenieko ciechücierhawa.

²⁵ Tsiu puoe sünunu tuo Karmel Kijüthou gei khota, sidi sünunu puoe la Samaria nu vorlie.