Kediko Kenieu 16 - Angami Naga CL (Re-edited) Bible (BSI)

Ahaz Kedi Kechü

¹ Remalia nuou Peka dikelie cie kerethenie cie Jotham nuou Ahaz-e Juda mho dilie.

² Ahaz-e di sedekelie ki puo kelhouzha cie mepfüta, sidi Jerusalem nu cie keresorou di, mu Jihova puo Kepenuopfü mhodzünu puo puo David tuoi kemezhüu chü mo.

³ Derei puo Israel kediko zho nu lhou. Jihovae Israel mhodzü nunu whuokewa pele kemo seyieko chüyakezha tuoi puo nuou rei thepie ruosuo chü.

⁴ Siro puoe thechü kerükrieko gei, kijüthouko gei, tsiu seibo kepejo pete khro nu ruosuo chü, tsiu kethengu the.

⁵ Sitse Aram Kediu Rezin mu Remalia nuou Peka Israel Kediu unie vor Ahaz ze terhü chü di Jerusalem re, derei puo penyülie kenjüta.

⁶ Süki Aram kediu Rezin Elat lie lalie, sidi Elat nunu Judako whuowa; sidi Arammia bu Elat nu vorta, mu thie ketso rei uko sünu lhou tuote.

⁷ Ahaz-e dieliemia ketsepie Tiglat-pileser Asiria Kediu ki shü di, “Ae n kituou mu n nuou zo, khorcie, sidi Aram kediu mu Israel kediu dzie nunu a kelashücie, unie-e a perhie bate,” si.

⁸ Siro Ahaz-e Jihova kiu nu mu kediu kinyibou nunu rakachü mu suna ngukelieko chülie, sidi süko methuo ketsepie Asiria kediu tsüshü.

⁹ Siru Asiria kediue puo pfhe rünyülie; sidi Asiria kediu khor di Damaska re di süu lielie, tsiu themia sünu kebako teze kedie chü Kir nu vota, mu puoe Rezin dukhriwa.

¹⁰ Siro Ahaz kediue Asiria Kediu Tiglat-pileser ze kesetuoü Damaska nu vo tse, puoe Damaska nu ruosuoba kebau ngushü. Sitse Ahaz Kediue mia ketsepie Uria zievo-u ki shü di, ruosuoba dze, puo rhi kedipuo mhie shikecü, kedipuo mhie di chü shikecü dzeko pesi phreshü.

¹¹ Sitse Uria zievo-ue Ahaz Kediu Damaska nunu ketsekeshü mhiecü ruosuoba puo chülie, Uria zievo-ue süu mhie tou di chülie, süu Ahaz Kediu Damaska nunu kevor mhodzü chüwa.

¹² Siro kediu Damaska nunu vor tse, kediu ruosuobau ngulie, sitse kediu ruosuobau penuo phir di sügei pfülie.

¹³ Sidi puo kethe ruosuo mu lhacülhale ruosuou khashü, siro puo kekrie ruosuou rushü, tsiu kezekevi ruosuo thezieu kegepie ruosuoba gei shü.

¹⁴ Siro puoe mese ruosuobau Jihova mhodzüki kebau kiu mhodzütsa nu se vorlie, puo ruosuobau mu Jihova kiu unie donu kebau, sidi süu khapie puo ruosuoba pesotsa shüpie bawa.

¹⁵ Sitse Kediu Ahaz-e Uria zievo-u ki, “Ruosuoba kezhau gei khise kethe ruosuou, mu thevatie lhacülhale ruosuou, mu kediu kethe ruosuou, mu lhacülhale ruosuou mu kijü nu themiako kethe ruosuou sa, uko lhacülhale ruosuo mu uko kekrie ruosuo khashülie; tsiu kediu kethe ruosuo mu puo lhacülhale ruosuo siro kijüu zie pete nu themiako kethe ruosuo, uko lhacülhale ruosuo, mu uko kekrie ruosuoko; sidi thezie kethe ruosuoko pete mu ruosuoko zie pete kegepie vashülie; derei mese pie kechü ruosuobau we Ukepenuopfü ki ketsoketuo lanu a la khapie batuo,” si.

¹⁶ Uria zievo-u Ahaz kediu diekhakeshü mhie pete chülie.

¹⁷ Siro Ahaz Kediu ruosuo kechü rako durhuo phrewa. Süko nunu dzieteikhouko chüwa; sidi sükhro mese thudoko keba dzübouu se kerwa mu süu pie ketsie pfhepie keba gei shüwa.

¹⁸ Tsiu sabat zha nhie la careu kediu kinu, mu kediu bu keler cha chüpie kebau, puoe Asiria kediu prei di Jihova ki nu kebau bie kediwa.

¹⁹ Süsie Ahaz mhatho kekreiko puoe chükeshüko, sükosü Juda Kediko thedze Leshüda nu thupie zhü mo üme?

²⁰ Tsiu Ahaz-e puo puonuoko ze zezhüta. Sidi puo puo David nadiu nunu puo puonuoko sa di khruwa; tsiu puo nuou Hezekia puo sou nu kedi chülie.