Kediko Kenieu 13 - Angami Naga CL (Re-edited) Bible (BSI)Jehoahaz Kedi Chükelie 1 Ahazia nuou Kediu Joash Juda nu dikelie cie mepfüese cie Jehu nuou Jehoahaz Samaria nu Israel mho dilie, mu cie kerethenie di. 2 Siro puoe Jihova mhodzünu mha kesuo shüüko chü, tsiu Nebat nuou Jeroboam Israel bie kephoumakewa kephoumako medzi, sidi puoe süko therhielie mo. 3 Tsiu Jihovae Israel gei puo nou meyieta, sidi puoe uko khapie Aram Kediu Hazael mu Hazael nuou Ben-hadad dzie nu shü. 4 Derei Jehoahaz-e Jihova ki chalie, ru Jihova puo pfhe rünyülie, puoe Aram kediu kimhie di Israel pechüpenyü ba shicü mezhieko ngu bakecü la. 5 Süla Jihovae kelakelie puo pie Israel tsü, sidi ukoe Arammia dzie nunu talie, tsiu Israelmiakoe thiedzü tuoi uko kiko nu lhou. 6 Sishierei ukoe Jeroboam kiu, Israel bie kephoumakewa kephoumako therhielie mo, derei süko nu tuo vota, siro Ashera bako Samaria nu ba zo. 7 Süla puoe Jehoahaz bu puo rüpfhünuo kier themia hiepengou, kierbagei ker, mu phituomia mia nyie ker zie mota, kekreilamonyü Aram kediu süko pekawa, sidi süko kedepie nyophe kemhiewaketa la. 8 Siro Jehoahaz mhatho kekreiko, tsiu puo chükeshü peteko, tsiu puo kekuo, sükosü Israel Kediko thedze Leshüda nu thupie zhü mo üme? 9 Sidi Jehoahaz-e puo puonuoko ze zezhüta; tsiu ukoe Samaria nunu puo khruwa, sitse puonuou Joash puo sou nu kedi chülie. Jehoash-e Israel Mho Dikelie 10 Juda Kediu Joash dikelie cie serethenie cie Jehoahaz nuou Jehoash Samaria nu Israel mho dilie, mu puoe cie keresorou kedi chülie. 11 Siro puoe Jihova mhodzüki mha kesuo shüüko chü; puoe Nebat nuou Jeroboam Israel bie kephoumakewa kephouma therhielie mo, derei puoe sünu tuo zo vota. 12 Siro Joash mhatho kekreiko, tsiu puoe chükeshü peteko, tsiu puoe Juda Kediu Amazia ze kegeikecü puo kekuo, süko Israel Kediko thedze Leshüda nu thupie zhü mo üme? 13 Sidi Joash-e puo puonuoko ze zezhüta; sitse Jeroboam-e puo kediba gei balie, mu Joash-e Samaria nu Israel kediko sa di puo khruwa. Elisha Die Thelako mu Puo Se 14 Süki Elishae siataketuo kechüu pfü di suolie tse Israel kediu Joash-e puo ki tsur, sidi puo mhodzünu krata, di sie, “A puo, a puo! Israel kierbageiko mu kier themiako sü.” 15 Sitse Elishae puo ki, “Theü mu theütsieko seliecie.” Sitse puoe theü mu theütsie se puo ki vor. 16 Tsiu puoe sie Israel kediu ki, “Theü galie,” siru puoe süu galie sitse Elishae puo dzie pie kediu dzie gei shüshü. 17 Süsie puoe sie, “Khirki khrüpie niathutsa shüshülie.” Sitse puoe süu khrüshü, Sitse Elishae sie, “Cieshücie,” siru puoe cieshü. Sitse puoe sie, “Jihova kuokelie theütsieu, Aram mho kuolieketuo theütsieu! Kekreilamonyü noe Afek nu Arammia peka lotsowa kemochie uko bietuo,” si. 18 Mu puoe sie, “Theütsieko chüliecie.” Sitse puoe süko chülie. Mu puoe sie, Israel kediu ki, “Süko pie kijü vashücie,” siru puoe va se vashü, sidi khawa. 19 Sitse Kepenuopfü themiaue puo gei puo nei mota, di sie “No va pengou morei va sorou vakeshü mese; sishü tse no Aram peka lotsowa kemochie perhietuomu ru, derei tsie we no va se rübei Aram perhietuo,” sita. 20 Sidi Elishae siata, sitse ukoe puo khruwa. Siro teicie therie ki Moabmia vor rünau perhierhieya. 21 Khunhie ukoe themia puo khru baluokecü nu terhü whuo ketuomia kro puo ngushü tse ukoe themiau kelhoupie Elisha mekhru nu shüwa ru themiau tetsu di Elisha ruu nyüshütse, puoe rheilieta, sidi siethalieta. 22 Derei Aram Kediu Hazael-e Jehoahaz kerhei chie Israel pese tuo tso. 23 Derei Jihovae uko ngumezhieshü, mu uko khruohi tsiu uko dze leshü, puoe Abraham, Isak mu Jakob ze dietseidiekhokelieu la, sidi uko pekawa molie, morei puoe tsie rei puo mhodzü nunu uko whuowa mo. 24 Siro Aram Kediu Hazael-e siaketa sie, puo nuou Ben-hadad-e puo sou nu kedi chülie. 25 Süsie Jehoahaz nuou Jehoash-e Hazael nuou Ben-hadad dzie nunu thiedzü süunuo puoe terhü chü di Jehoahaz dzie nunu liekelie rünako lie lalie. Va se Joash-e puo penyüwa, tsiu Israel rünako lie lalieta. |
The Bible Society of India
© 2023, Used by permission. All rights reserved. More
Bible Society of India