Kediko Kenieu 11 - Angami Naga CL (Re-edited) Bible (BSI)Athalia Kedi Kechü ( 2 Seyie 22:10—23:15 ) 1 Siro Ahazia-nuo zuo Athaliae puo nuo siaketa ngu tse, puoe kediu kikru pete pekawatuoü sieta. 2 Derei Jehosheba, kediu Joram nuopfü, Ahazia üpfüe Ahazia nuou Joash zelie, sidi kediu nuonuo dukhriwatuoü kebako donunu puo rügu zeta; sidi hapfüe puo mu puo thekepfü unie ze vo thezhü bou nu keviewa. Hamhie di Athalia kinu puo kevielie, di puo dukhriwa molie. 3 Puoe Jihova kiu nunu rüshü di cie sorou hapfü ze ba, mu süki Athaliae kijü süu mho kedipfü chü. Jehoiadae Unuoyo Joash Kenhekelie 4 Derei cie thenie cie Jehoiadae mia ketseshü di kriemhokezhako, mia kekhayakezhako mu kepfheko kielie, sidi uko ze Jihova kiu nu puo ki vorlie. Puoe uko ze dietseidiekholie sidi uko bu Jihova kiu nunu rüse, süsie puoe kediu nuou pie uko pekieshü. 5 Süsie puoe diekhashü di sie, “Nieko mha hau chüliecie: nieko sabat zhanhie rüleiyakezha mu kediu kiu pfheyakezha se-zapuokoe, 6 (siro se-za kekrei puoe Sur kharuki baya, mu se-za kekreiu bu kharu nu kepfheko sietsa baya,) kediu kiu pfheliecie. 7 Siro nieko donu za kenie sabat nhie vor Jihova kiu pfheyakezhako, 8 nieko kediu pfheliecie: Mia puopuokecü puo dzie nu rünyie thezese balie, sidi themia nieko donu kelermia sümia dukhriwalie; siro kediu pa mu lekecü pete nu nieko kediu ze tuoliecie,” si. 9 Siro kriemhokezhakoe Jehoiada zievo-u diekhakeshü pete chülie; sidi ukoe u themia sabat nhie rüleiketuoko mu sabat nhie vorketuoko zelie, ukoe Jehoiada zievo-u ki vor. 10 Siro zievo-ue kediu David rüngou mu pezhü, Jihova rüsuoki nu kebako khapie kriemhokezhako tsüshü, 11 sidi kepfhekoe thalie, mia puopuokecü puo dzie nu rünyie se di kediu houpfü tha, rüsuokiu puoke pekhrotsa nu vo rüsuokiu ke pesotsa ketso, ruosuobau tsiu rüsuokiu houpfü tha, lutsahatsa kediu pfhelieketuo la. 12 Sidi puoe kediu nuou ze parshü, tsiu keditsüre pie puo tsü gei shüshü, sidi dietseidiekho-u pie puo tsüshü, sidi ukoe puo chüpie puo bu kedi chülie, tsiu puo kenheshülie; mu ukoe dzieda di sie, “Kediu bu rhei kechau chücie,” sita. Athalia Siaketa 13 Siro Athaliae kepfhemiako mu themiako pfhe si tse, hapfüe Jihova rüsuokiu nu themiako ki vor; 14 sidi puoe mehoshü ru kediu zho ki ze puo khro kezhako mu ketsükekhouko co puo khieki tha, tsiu kijü süu nu themia pete-e u nei se di ketsü khou keba nguta, sitse Athalia puo pfhe cierha mu kra di sie, “Ngumvümia mhatho puote, ngumvümia mhatho puote,” sita. 15 Sitse Jehoiada zievo-ue rüpfhünuo kekhayakezha kriemhokezhako ki diekhashü di sie, “Hapfü ze chazou prawaliecie, siro zhiecha pie hapfü siemedzi kephir kehoupuorei dukhriwaliecie,” si. Kekreilamonyü zievo-ue, “Jihova kiu nunu puo dukhrishü hie,” sicü la. 16 Süla ukoe hapfü telie, sidi hapfü ze kier bu kediu ki nu keler chau ze prata, sidi sünunu hapfü dukhriwata. 17 Siro Jehoiadae Jihova mu kediu tsiu themiako donu dietseidiekho chülie, uko bu Jihova themia chüketuo la; siro kediu mu themiako donu rei chülie. 18 Siro kijü nu themia peteko Baal kiu nu vo, sidi süu bierhuowa; puo ruosuobako mu puo terhuorhiko bietshebietshawa, sidi ruosuoba mhodzü nunu Baal zievo-u Matan dukhriwa. Siro zievo-ue Jihova kiu mehoketuo la kepfhemia kedashüwa. 19 Sidi puoe kriemhokezhamia, themia kekhayakezhako mu kepfheko, mu kijü themia pete zelie, sidi ukoe Jihova kiu nunu kediu ze kerlie, sidi puo ze kepfhemia ketha careu ze di kediu kiu nu vorlie. Siro puoe kediko kedibau gei balie. 20 Sidi kijüu nu themia pete u nei phi, siro ukoe kediu kiu nu zhiechau pie Athalia dukhrikewa sie nadiu tshüimhiei bata. 21 Jehoash puo kelhouzha cie thenieketa ki kedi chü sedelie. |
The Bible Society of India
© 2023, Used by permission. All rights reserved. More
Bible Society of India