Kediko Kenieu 10 - Angami Naga CL (Re-edited) Bible (BSI)

Jehue Ahab Kinumiako Pekakewa

¹ Ahab-e Samaria nu puo nuonuo thepfumia hiethenie ba. Süla Jehue leshü thulie, di ketsepie Samaria nu, Jezril mia kekhayakezhako, phichüko, tsiu Ahab nuonuo meho kebako tsü di sie,

² “Nie niepuu nuonuoko nieko ze ba, siro nieko kinu kierbagei mu kier ba, dahou hou keba nadiu, mu rünyieko ba,

³ nie niepuu nuonuoko donu kevitho-u kedalie, sidi puo pie puo puo kediba gei shülie, sidi nie niepuu kiu la kegeiliecie,” sita.

⁴ Derei ukoe michiethorta, di sie, “Harie kedimia kenie thuo zorei puo mhodzü thalie mo; di siro kikidi hiekoe thalie ta?” sita.

⁵ Süla kediki kemeho-u, mu nadiu nu kezhau tsiu phichüko mu nhicuko kemehoko rei sa, mia ketsepie Jehu ki shü di sie, “Hieko sü n kituomia zo; mu noe hie bu chünukeshü pete hie chü zotuo; hiekoe miapuorei bu kedi chü lho; n mhiki kiu vi shiü chüliecie.”

⁶ Sitse puoe leshü kenieu ketsepie uko ki shü la di sie, “Mhanuü nieko a kitsa üliro mu a die zetuo üliro, sodu hateiki nieko niepuu nuonuoko tsüko se Jezril nu a ki vorcie,” sita. Süla kediu nuonuoko, mia hiethenie, ukoe nadiu nu kezhako uko thekese sierkecüko ze ba.

⁷ Sidi leshüu uko tsolie tse, ukoe kediu nuonuoko zelie, di mia hiethenieko dukhriwa, sidi uko tsü ziepie mekho nu shülie di süko ketsepie Jezril nu Jehu ki shüwa.

⁸ Sitse dieliemia puoe vor di puo ki, “Ukoe kediu nuonuoko tsü ziese vorte,” sishü. Ru puo sie, “Süko pie kharu nu kele ki pfhe kenie chülie di teisolie kemochie khapie baliecie,” sita.

⁹ Süsieduü puo vo, thalie, di sie themia peteko ki, “Nieko kejo jü zo, hau a sie a niepuu perhie di puo dukhriwa, derei suomia hako pete dukhriwa ga?

¹⁰ Jihovae Ahab kiu dze kepu yopuorei kijü hau nu chü tseilie motalie lhokecü nieko siliecie, kekreilamonyü Jihovae puo kituou Elija ki kepu dieu chü tseishüwate.”

¹¹ Sidi Jehue Jezril nu peshapie keba Ahab kinumiako pete, tsiu puo themia kezhako pete, mu puo kicükinumia mu puo zievoko bie tseiwa kemochie dukhri zo vo di bie phrewa.

¹² Süsie puo sielie di Samaria nu vota. Siro chala nu tekuokepfheko tekuo mie kebe kiu kiki ba tse,

¹³ Jehue Juda Kediu Ahazia kicükinumia ze keselie, sidi sie, “Nieko suomia ga?” Siru sükoe sie, “Hiekoe Ahazia kicükinumialie, mu hiekoe kedimia nuonuo siro kedipfü Jezebel nuonuoko kelutuoü tsurzhülie,” sishü.

¹⁴ Sitse puoe sie, “Perhei uko teliecie.” Sitse ukoe perhei uko telie, sidi tekuo mie kebe kiu kheho nunu dukhriwa, uko mia hiediaekenie; sidi miapuorei lhieshü mo.

¹⁵ Sidi puoe sünunu tuota tse, Jehonadab Rekab nuou vor puo zelietuoü zhü di puo dzülie; puoe puo kelushü, di sie puo ki, “A nou n kitsa ketuo tuoi, n nou a gei dietho ba zo mo?” Sitse Jehonadab-e puo die kela di, “U zo,” si. Sitse Jehu sie, “Mhanuü siüliro, n dzie pie a tsücie,” sishü. Süla puoe puo dzie chashü. Sitse Jehue puo teshüpie puo kierbagei gei shülie.

¹⁶ Tsiu puoe sie, “A ze vorliecie, sidi Jihova la a shürhei kidepuo ba shiü, mehoshücie,” sita. Sidi puo bu Jehu kierbagei gei vota.

¹⁷ Sidi unie Samaria nu vorlie tse, Jihova die Elija ki pukeshü tuoi, puo Ahab kinumia Samaria nu lhiepie kebako dukhri tseiwa kemochie dukhri vota.

Jehue Baal Kerüsuoko Pekakewa

¹⁸ Sitse Jehue themia pete kie kengulie di sie uko üse, “Ahab-e keduo yopuo se Baal lie chü; derei Jehue sü kezie se chütuo.

¹⁹ Süla tsie Baal siedzekesiko pete, puo kerüsuoko pete mu puo zievoko; miapuorei sa mota hie, kekreilamonyü a ruosuo kezha se puo chüpie Baal tsütuo üya; kehoupuorei vor moketamia rheilie lho.” Derei Jehue Baal kerüsuoko pete dukhriwaketuo la puo dovi di haishü.

²⁰ Siro Jehue sie, “Baal la kenanyükecü kehou puo pie baliecie,” si. Süla ukoe süu pesishü.

²¹ Tsiu Jehue die ketsepie Israel pete nu shü, sidi Baal rüsuoyakezha pete vor, mu miapuorei vor moketa chü mo, sidi ukoe Baal rüsuokiu nu lelie, Baal rüsuokiu tietsapuo nu vo kekreitsa tshulie kemochie.

²² Sitse puoe pfhenei mehoyakezhau ki, “Baal rüsuoyakezhako pete la pfhe se vorlie,” siru puoe uko la pfhenei se vorshü.

²³ Sitse Jehue Rekab nuou Jehonadab ze di Baal rüsuoki nu le, sidi sie Baal rüsuoyakezhako ki, “Baal kerüsuoko rübei sie Jihova kerüsuo miapuorei bu hanu ba moketuo la pfhü mehowacie.”

²⁴ Sidi ukoe le ruosuoko mu kethe ruosuoko chütuoü tuoshü. Tsiu Jehue chazou mia hiethetha kedapie ba, sidi sie, “A se nieko dzie nu kevorko mia puo zorei bu taketa sie, petakewau puo kerheiro pie süu kerheiro sou chütuo ho.”

²⁵ Sidi puoe kethe ruosuo chüwata mumetha Jehue sie kepfheko mu kezhako ki, “Lelie di uko dukhriwacie; miapuorei bu taprata hie,” siwa. Sidi ukoe zhiecha pie süko dukhriwa; sitse kepfheko mu kezhako uko mo kelhoupie chazou shüwa, süsie tuo Baal rüsuokiu kesou nu le.

²⁶ Ukoe Baal rüsuokiu nu terhuorhiko se parlie, sidi süko thewa.

²⁷ Siro ukoe Baal terhuorhiko bierhuowa, tsiu Baal rüsuokiu pekawa, sidi süu chüpie thie ketso rei rhuketa ki puo chüwa.

²⁸ Hamhie di Jehue Israel nu Baal pekawa.

²⁹ Derei Jehue Nebat nuou Jeroboam Israel chü kephoumakecü Bethel nu keba suna pie kerhi mithunuo mu Dan nu kebako therhielie mo.

³⁰ Siro Jihovae sie Jehu ki, “Noe a mhinguki kemezhüu chü mu a nou kele mhie Ahab kiu gei chükeshü pete la, n nuonuo phou diau ketso bu Israel kediba gei batuo,” si.

³¹ Derei Jehue puo nou pete se Jihova Israel Kepenuopfü zho nu tuo volie mota; puoe Jeroboam kephouma nu, Israel chü kephoumakewau therhielie mokecü la.

³² Süteiki Jihovae Israel bie petsawataketuo sedelie. Sidi Hazael-e Israel rüna khie pete nu uko dukhriwa.

³³ Jordan niathutsa nu Gilid kijü pete, Gadmia, mu Reubenmia, mu Manassehmia, Aroer nunu Arnon Rü kinu, Gilid rei mu Bashan.

³⁴ La sie Jehu mhatho kekreiko, mu puoe chükeshü peteko, tsiu puo kekuo sükosü Israel Kediko thedze Leshüda nu thupie zhü mo üme?

³⁵ Sidi Jehue puo puonuoko ze zezhüta; tsiu ukoe Samaria nunu puo khruwa. Sitse puo nuou Jehoahaz puo sou nu kedi chülie.

³⁶ Siro Jehue Samaria nu Israel mho dikecü cie mepfüethetha.