Kediko Kenieu 1 - Angami Naga CL (Re-edited) Bible (BSI)

Ahazia Se

¹ Ahab se sie Moab-e Israel perhie sieta.

² Tsiu Ahaziae Samaria nu puo kilha peso gei mhaba geinu tetsu di rüzapfü zhüta, süla puo dieliemia ketse di uko ki, “Vocie, sidi Ekronmia rhuou Baal-zebub ki a kechü hanunu shürholietuo mo lho shiü ketsocie,” sishü.

³ Derei Jihova dielieu Tishbimia Elija ki, “Sieliecie, vo di Samaria kediu dieliemiako ze kesecie, sidi uko ki, ‘Israel nu Ukepenuopfü tuo mota üdi nieko vo Ekronmia rhuou Baal-zebub ketsotuoüya me?’

⁴ Süla tsie Jihovae puya, ‘No sie zhüketa zhüu nunu la kerlie lhote, no siata tou zotuo.’ ” Sidi Elijae tuo vota.

⁵ Dieliekoe la kediu ki vor tse, puoe uko ki, “Nieko kiüdi la vorta ga?”

⁶ Sitse ukoe puo ki, “Mia puo vor di hieko ze keselie di sie hieko ki, ‘La nieko ketsekeshü kediu ki voliecie, sidi sie puo ki: Jihovae puya: Israel nu Kepenuopfü tuo moketa la nieko vo Ekron rhuou Baal-zebub ketsotuoüya me? Süla no vozhüketa zhüu nunu la kerlie lhote, mu no siata tou zotuo’ sitelie.”

⁷ Sitse puoe uko ki, “Vor nieko ze kese di, die hako pukeshüu kimhiecü puo ga?”

⁸ Sitse ukoe puo ki, “Themia puomie tsüzhui, siro chüzhü chiepha pie puo chie phalie.” Sitse puo sie, “Süusü Tishbimia Elija mu sü,” si.

⁹ Süsie kediue mia hiepengoumhokezha chüyakezhau mu mia hiepengou sa di ketsepie puo ki shü, sitse puoe Elija, kijüthou mezü puo gei kebau ki kho di puo ki, “He-i, Kepenuopfü themiau, kediu puyalie, ‘Kerliecie.’ ”

¹⁰ Sitse Elija sie mia hiepengoumhokezha chüyakezhau ki, “A Ukepenuopfü themia üliro, teigei nu mi bu tetsur di no mu mia hiepengouko thewaliecie.” Sitse teigei nu mi tetsur, di puo mu mia hiepengouko thewata.

¹¹ Siro puoe mia hiepengoumhokezha chüyakezha kekrei puo mu mia hiepengou sa di ketse lashü mu puoe la kho, sidi puo ki, “He-i, Kepenuopfü themiau, haue kediu ahzau te: Mhai kerliecie.”

¹² Sitse Elijae uko die kela di sie, “Ae Ukepenuopfü themia üliro teigei nu mi bu tetsur no mu mia hiepengouko thewacie.” Sitse Ukepenuopfü mi teigei nu tetsur, sidi puo mu mia hiepengouko thewata.

¹³ Süsie rei puoe mia hiepengoumhokezha chüyakezha seu mu mia hiepengou sa di ketse lashü, siru mia hiepengoumhokezha chüyakezha seu tuo kho, sidi phi di Elija mhodzünu khoutoupfü zhüta, sidi puo ki puo mezhiemelo di sie, “Ukepenuopfü themiau, a n ki chaya, a kerheiro mu n kituo mia hiepengou hako kerheiro bu n mhodzüki puoma rekelieu chülieyi.

¹⁴ Harie, teigei nu mi tsur, mia hiepengoumhokezha chüyakezha kenienie, siro u themia hiepengoungou idi thewate; derei tsie we a kerheiro bu n mhodzüki puoma kereu chülieyi.”

¹⁵ Sitse Jihova dielieu sie Elija ki, “Puo ze keliecie; puo prei hiecie,” sita. Süla puo sielie, sidi puo ze kediu ki vo,

¹⁶ di sie puo ki, “Jihovae puya: Noe dieliemia ketsepie Ekronmia rhuo Baal-zebub ketsokecü, süu Israel nu ketsolieketuo Kepenuopfü tuo mota üdi me? Süla no vo zhüketa zhüu nunu la kerlie lhote, derei no siata tou zotuo,” sishü.

¹⁷ Sidi puoe Elija Jihova die pukeshü tuoi siata. Tsiu Jehoram-e puo sou nu kedi chülie, Juda kediu Jehoshafat nuou Jehoram dikelie teicie kenieu teiki; kekreilamonyü puoe puo nuonuo thepfumia jü.

¹⁸ Ahazia mhatho kekreiko puoe chükeshüko süko Israel kediko thedze leshüda nu thupie zhü mo üme?